ដូរឬមិនដូរ? គឺជាបទចម្រៀងរបស់ពួកក្រុមក្មេងរត់តាមចញ្ចើមថ្នល់ច្រៀងលេងកម្សាន្តសប្បាយ ដើម្បីសុំទារស្ករគ្រាប់ពីម្តាយពេលមកពីផ្សារតែប៉ុណ្ណោះ ប៉ុន្តែ ត្រូវបានមេបក្សលោក កឹម សុខា ចាប់យកមកធ្វើជាមធ្យោបាយឃោសនាបោះឆ្នោតយ៉ាងគគ្រឹកគគ្រេងតាំងពីឆ្នាំ២០០៨ រហូតមកដល់បច្ចុប្បន្ន និងបានប្រើពាក្យនេះ ក្នុងគោលបំណងចង់ផ្តួលរំលំឬដូររាជរដ្ឋាភិបាលកម្ពុជាបច្ចុប្បន្ន ដោយឥតខ្មាសអៀនទៅវិញ ។
រៀងរាល់ថ្ងៃ លោកកឹម សុខា ប្រធានគណបក្សសិទ្ធិមនុស្ស និងក្រុមរបស់ខ្លួន បានដើរស្រែកគ្រប់ច្រកល្ហកទូទាំងប្រទេស ដោយការញុះញង់ និងបំផុសប្រជាពលរដ្ឋឱ្យមានគំនិតជាតិនិយមជ្រុលក្នុងការផ្លាស់ប្តូររបប ឬប្តូររាជរដ្ឋាភិបាលដោយប្រើពាក្យថា«ដូរឬមិនដូរ?» ។ ត្រង់ចំណុចនេះត្រូវបានអ្នកវិភាគនយោបាយឯក រាជ្យវាយតម្លៃថា គណបក្សប្រឆាំង ជាពិសេសគណបក្សសិទ្ធិមនុស្សពុំមានស្នាដៃអ្វីក្នុងការជួយចូលរួមស្តារ កសាង និងអភិវឌ្ឍជាតិមាតុភូមិ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋទេ គឺមានតែសកម្មភាពខំប្រឹងដើរស្រែកជេររាជរដ្ឋាភិបាល ដើម្បីការធ្វើនយោបាយរបស់ខ្លួន ដែលផ្ទុយពីសកម្មភាពរបស់គណបក្សប្រជាជនកម្ពុជា ដែលនៅរួមសុខរួមទុក្ខដោះស្រាយបញ្ហាជូនប្រជាពលរដ្ឋដោយផ្ទាល់ ដូចជាការសង្គ្រោះពលរដ្ឋពេលមានគ្រោះទឹកជំនន់ ការខិតខំប្រឹងកសាងហេដ្ឋារចនាសម្ព័ន្ធនានា និងចូលរួមថែរក្សាសន្តិភាព ស្ថិរភាពនយោបាយ ធានាបាននូវភាពសុខសាន្តជូនប្រជាពលរដ្ឋរស់នៅដោយសុខដុមរមនាដូចសព្វថ្ងៃ ។ ទាំងនេះ គឺជាទំនុកចិត្តរបស់ប្រជាពលរដ្ឋកម្ពុជា ដែលត្រូវការគណបក្សប្រជាជនដើម្បីជាដង្ហើមរស់ ជានិច្ចនិរន្តរ៍ ។
ទិសដៅជាសារវ័ន្តរបស់រាជរដ្ឋាភិបាលគឺកសាងជាជំហានៗនូវសង្គមកម្ពុជាមួយដែលមានសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម មានការអភិវឌ្ឍប្រកបដោយចីរភាព និងសមធម៌ ជាមួយនឹងការគោរពខ្ជាប់ខ្ជួននូវគោលការណ៍លទ្ធិប្រជាធិបតេយ្យសំដៅលើកស្ទួយនីតិរដ្ឋ ការពារសិទិ្ធ និងសេចក្តីថ្លៃថ្នូររបស់មនុស្សគ្រប់រូប ។
តាមរយៈសមិទ្ធផលដ៏ច្រើនសន្ធឹកសន្ធាប់របស់គណបក្សប្រជាជនកម្ពុជា ដូចបានឃើញផ្ទាល់នឹងភ្នែកនៅតាមមូលដ្ឋាន គឺជាការវាយបំបាក់ទៅលើក្រុមគណបក្សប្រឆាំង ដែលកំពុងនាំគ្នាឃោសនាអកុសលមួលបំភ្លៃខុសពីការពិត និងបានចោទប្រកាន់ថា ប្រទេសមិនមានការរីកចម្រើន និងសង្គមជាតិកំពុងជួបនូវទុក្ខព្រួយ។ ការពិតនៅកម្ពុជា មិនអាក្រក់ដូចការចោទប្រកាន់ប្រាសចាកពីសច្ចភាពបែបនោះទេ។ ផ្ទុយទៅវិញ កម្ពុជាសព្វថ្ងៃជាប្រទេសគ្មានសង្គ្រាមបង្ហូរឈាម ពុំមានការកាប់សម្លាប់គ្នា ពុំមានការបំបិទសិទ្ធិសេរីភាព ឬគាបសង្កត់ទៅលើជនណាមួយនោះឡើយ ។ រាជរដ្ឋាភិបាលបាននិងកំពុងលើកកម្ពស់សិទ្ធិសេរីភាព និងសេចក្តីថ្លៃថ្នូររបស់មនុស្សជាតិ និងគោរពបានយ៉ាងត្រឹមត្រូវនូវច្បាប់រដ្ឋធម្មនុញ្ញរបស់ប្រទេស ដើម្បីពង្រឹងនីតិរដ្ឋនៅកម្ពុជា ។ ត្រង់នេះសបញ្ជាក់ឱ្យឃើញថា រាជរដ្ឋាភិបាលសព្វថ្ងៃ គឺធានាបាននូវស្ថិរភាពនយោបាយ សន្តិភាពបរិបូណ៌ ដូចនេះសួរថា តើប្រជាពលរដ្ឋចង់ផ្លាស់ប្តូរថ្នាក់ដឹកនាំប្រទេសដូចការលើកឡើងរបស់គណបក្សសិទ្ធិមនុស្សដែរឬទេ ? ចម្លើយដោយមិនបង្អង់យូរ គឺពលរដ្ឋគ្រប់រូបនឹងអាចឆ្លើយបានភ្លាមថា «មិនដូរជាដាច់ខាត» ផ្ទុយទៅវិញនឹងរឹតតែគាំទ្រថែមទៀត ព្រោះបទពិសោធន៍ប្រទេសកម្ពុជាបានឆ្លងកាត់ជាច្រើនជំនាន់មកហើយ ដូចជាប្រជាពលរដ្ឋកាលរស់នៅក្នុងរបបរាជានិយមថា បានសម្បូរសប្បាយរីកចម្រើនជឿនលឿន ប៉ុន្តែមានអ្នកដឹកនាំខ្លះមិនពេញចិត្តដូចជាពួកសាធារណរដ្ឋនិយមឆ្វេង គឺលោកសេនាប្រមុខលន់ នល់ បានធ្វើរដ្ឋប្រហារផ្តួលរំលំរាជបល្ល័ង្ក គឺការផ្តួលរំលំសម្តេចសីហនុ នៅទសវត្សឆ្នាំ១៩៧០ ។ បន្ទាប់មកដឹកនាំមិនបានប៉ុន្មានឆ្នាំផងក៏មានអំពើពុករលួយបក្សពួក ហើយប្រើអំពើហិង្សាឃោរឃៅពុករលួយលើសរបបរាជជានិយមបណ្តាលឱ្យមានការបះបោរបង្កើតចលនាខ្មែរក្រហមផ្តួលរំលំរបបលន់ នល់ នៅថ្ងៃទី១៧ ខែមេសា ឆ្នាំ១៩៧៥ ប្រជាជនសង្ឃឹមថា នឹងទទួលបាននូវសេរីភាព និងបានមេដឹកនាំប្រទេសកម្ពុជាឱ្យប្រសើរ ប៉ុន្តែគ្រាន់តែបីថ្ងៃប៉ុណ្ណោះ អ្នករស់នៅទីក្រុងភ្នំពេញត្រូវបានបង្ខំឱ្យចាកចេញទៅជនបទ និងបានកាប់សម្លាប់ប្រជាពលរដ្ឋកម្ពុជាអស់ជាង២លាននាក់។
បទពិសោធន៍ទាំងនេះ ត្រូវបានអ្នកវិភាគនយោបាយលើកឡើងនៅពេលឮសូរអ្នកនយោបាយប្រឆាំងមួយចំនួន ដែលប៉ុនប៉ងចង់ផ្លាស់ប្តូររបប គឺវានឹងអាចជាន់ដានស្នាមកង់ប្រវត្តិសាស្ត្រដូចរបបមុនៗ គឺនឹងអាចធ្វើឱ្យឈាមខ្មែរហូរស្រក់ជាថ្មីម្តងទៀត ។ ដូច្នេះប្រជាពលរដ្ឋមិនអនុញ្ញាតឱ្យរបបនោះកើតមានឡើងនោះទេ។
ម៉្យាងទៀត ការបញ្ចប់បាននូវសង្គ្រាមជាស្ថាពរ គឺពិតជាកើតមានតាមរយៈនយោបាយឈ្នះ=ឈ្នះរបស់សម្តេចតេជោហ៊ុន សែន នៅចុងឆ្នាំ១៩៩៨ ដែលរចនាសម្ព័ន្ធអង្គការចាត់តាំងខ្មែរក្រហមត្រូវរលំរលាយអស់ និងឈានដល់មានការបោះឆ្នោតតាមបែបលទិ្ធប្រជាធិបតេយ្យសេរីពហុបក្ស និងបន្តពង្រឹងការអនុវត្តគោលការណ៍នោះមកដល់សព្វថ្ងៃ ដែលបានផ្តល់អំណាចឱ្យប្រជាពលរដ្ឋជាម្ចាស់ជោគវាសនារបស់ប្រជាតិតាមរយៈសំឡេងឆ្នោតគាំទ្រ និងដកសេចក្តីទុកចិត្ត។
ដូច្នេះ សកម្មភាពរបស់គណបក្សសិទ្ធិមនុស្សដែលចង់ប្តូររបប មិនធ្វើតាមបែបប្រជាធិបតេយ្យ គឺជាការដើរផ្ទុយពីឆន្ទៈរបស់ប្រជាពលរដ្ឋ និងអាចចាត់ទុកថា ជាចេតនាចង់ឱ្យមានសង្គ្រាមសាជាថ្មី វាជាអំពើញុះញង់ដុតបញ្ឆេះកំហឹង និងបណ្តុះគំនិតឱ្យប្រជាពលរដ្ឋស្អប់ខ្ពើមអ្នកមាន ជានយោបាយសម្លាប់អ្នកមាន គឺវាដូចគ្នានឹងរបបប៉ុលពតអញ្ចឹងដែរ ដែលសកម្មភាពទាំងនោះនឹងបង្កឱ្យមាននូវអសន្តិសុខជាតិ និងក៏ជាការរំលោភលើច្បាប់របស់ប្រទេស ដែលរាជរដ្ឋាភិបាលនឹងត្រូវចាត់វិធានការទប់ស្តាត់ ដើម្បីការពារបាននូវច្បាប់រដ្ឋធម្មនុញ្ញដែលជាច្បាប់កំពូលរបស់កម្ពុជា ៕ រួមជាតិ
ចែករំលែកព័តមាននេះ