ស្របពេលក្រុមហ៊ុនបច្ចេកវិទ្យាល្បីៗនៅលើពិភពលោកកំពុងមានការប្រកួតប្រជែងយ៉ាងខ្លាំងបំផុតនោះ ធ្វើឱ្យក្រុមហ៊ុននីមួយៗខិតខំរិះរកនូវរបកគំហើញប្លែកៗ និងងាយស្រួលសម្រាប់អ្នកប្រើប្រាស់ ក៏ដូចជាច្នៃប្រឌិតនូវរូបរាងថ្មីៗ គួរឱ្យទាក់ទាញសម្រាប់បំពេញសេចក្តីត្រូវការរបស់អតិថិជន ។
ជាក់ស្តែង តាមប្រភពពីគេហទំព័រ digitalspy របស់អង់គ្លេសចេញផ្សាយកាលពីថ្ងៃទី១០ ខែធ្នូ បានឱ្យដឹងថា ក្រុមហ៊ុន Apple នឹងចេញលក់ iPad 3 ក្នុងខែកុម្ភៈ ឆ្នាំ ២០១២ ខាងមុខ ។ នេះបើតាមការបង្ហើបឱ្យដឹងពីអ្នកវិភាគម្នាក់ ។
តាមរបាយការណ៍របស់ Business Insider លោក Richard Gardiner បាននិយាយថា iPad 3 នឹងមានទំហំ 2048 x 1536 pixel ធំជាង២ដងនៃ iPad2 ដែលមានត្រឹមតែ 1024 x 768 pixel ប៉ុណ្ណោះ ។ មានន័យថា រូបរាងរបស់ iPad3 នឹងក្រាសជាង iPad2 ប្រមាណ0.7 មីលីម៉ែត្រ ដោយសារមានតម្រូវការខាងបច្ចេកវិទ្យានៃពន្លឺខ្លាំងជាង។
Apple បញ្ចេញនូវកម្មវិធីល្បីៗសម្រាប់ឆ្នាំ២០១១
កាលពីថ្ងៃទី៦ ធ្នូ កន្លងមក ក្រុមហ៊ុនApple បានបញ្ចេញនូវកម្មវិធី iTunes Rewind 2011 និងប្រព័ន្ធ App Store Rewind 2011 ហើយកម្មវិធីនេះត្រូវបានគេចុះក្នុងបញ្ជីដែលលក់ដាច់ជាងគេបំផុតសម្រាប់ តន្ត្រី ការទស្សនាទូរទស្សន៍ មើលខ្សែភាពយន្ត និងកម្មវិធីផ្សេងៗជាច្រើនទៀត។ នេះបើតាមការឱ្យដឹងពីប្រភពពីគេហទំព័រស៊ីន ហួ ចេញផ្សាយកាលពីថ្ងៃទី៩ ខែធ្នូ កន្លងមកនេះ។
ទន្ទឹមនឹងនេះ ក្រុមហ៊ុន Apple ក៏បានដាក់កម្មវិធី Instagram នៅក្នុងប្រព័ន្ធ Software របស់ iPhone សម្រាប់ឆ្នាំនេះផងដែរ ។ Instagram គឺជាកម្មវិធី Free មួយមានមុខងារអាចឱ្យអ្នកប្រើប្រាស់កំណត់នូវរូបថត និងចែករំលែករូបថតទាំងនោះទៅក្នុងបណ្តាញទំនាក់ទំនងសង្គមបានយ៉ាងងាយស្រួល។ ជាងនេះទៅទៀត Software Snapseed សម្រាប់កែច្នៃរូបថត ក៏ត្រូវបានដាក់បញ្ចូលទៅក្នុង Application របស់ iPad ផងដែរ ។
គួរគត់សម្គាល់ថា នៅឆ្នាំ២០១១នេះ កម្មវិធីហ្គេម Angry Birds ដូចជា “Angry Birds Season” និង “Angry Birds Rio” សម្រាប់ iPhone និង iPad បានលក់ដាច់ជាងគេ និងពេញនិយមបំផុត ហើយត្រូវបានគេចុះក្នុងបញ្ជីកំពូលទាំង១០ ។ ជាងនេះទៅទៀត ខ្សែភាពយន្តដែលលក់ដាច់ជាងគេបំផុតក្នុងកម្មវិធី ITunes គឺ “The Social Network” និង “Doctor Who” ៕
ចែករំលែកព័តមាននេះ