យោងតាមព័ត៌មានចុងក្រោយ គណៈកម្មាធិការបោះឆ្នោតរុស្ស៊ីប្រកាសកាលពីថ្ងៃទី៥ ធ្នូ ថា គណបក្សរុស្ស៊ីរួបរួមរបស់លោកវ៉្លាឌីមៀរ ពូទីន ដណ្តើមបានសំឡេងភាគច្រើនដាច់ខាតក្នុងសភាគឺ២៣៨កៅអី ក្នុងចំណោមកៅអីទាំង៤៥០។ គណបក្សរុស្ស៊ីរួបរួមក្នុងការបោះឆ្នោតសភាកាលពីថ្ងៃទី៤ ធ្នូ ទោះបីជាដណ្តើមបានជោគជ័យក៏ដោយ តែទទួលបានត្រឹមសំឡេងភាគច្រើនដាច់ខាតដោយប្រផិតប្រផើយដែលនោះកំណត់ពីការចុះថយប្រជាប្រិយភាពយ៉ាងច្បាស់សម្រាប់គណបក្សនេះ ដែលគ្រប់គ្រងជីវភាពនយោបាយរុស្ស៊ីចាប់តាំងពី១ទសវត្សមកហើយ ។
បើគិតពីភាគរយគណបក្សរុស្ស៊ីរួបរួមទទួលសំឡេងបាន៤៨,៥% ទល់នឹង៦៤,៣% ក្នុងការបោះឆ្នោតសភាកាលពីឆ្នាំ២០០៧ ។ បន្ទាប់មកគឺគណបក្សកុំមុយនីស្តទទួលសំឡេងបាន១៩,៨% គណបក្សរុស្ស៊ីយុត្តិធម៌ទទួលបាន១២,៨% ហើយពួកជាតិនិយមនៃគណបក្សសេរីប្រជាធិបតេយ្យទទួលសំឡេងបាន១១,៤%។ លោកវ៉្លាឌីមៀរ ពូទីន មានប្រសាសន៍ថា នេះជាលទ្ធផលមួយដែលឆ្លុះបញ្ចាំងពីសភាពការណ៍ពិតក្នុងប្រទេស។ ដោយផ្អែកលើលទ្ធផលនេះ យើងអាចធានាដល់ការអភិវឌ្ឍន៍ប្រទេសយើងប្រកបដោយស្ថិរភាព។
នេះជាការបោះឆ្នោតមួយតំណាងនៃការធ្វើតេស្តមុនការវិលត្រឡប់របស់លោកពូទីន មកកាន់វិមានក្រឹមឡាំងវិញ ។ វាជាការធ្វើតេស្តចំពោះប្រជាប្រិយភាពរបស់បុរសកម្លាំងរុស្ស៊ីរូបនេះមុនការបោះឆ្នោតប្រធានាធិបតីនាថ្ងៃទី៤ មីនា ខាងមុខ នេះ ។ អាណត្តិប្រធានាធិបតីរុស្ស៊ីលើកនេះមានរយៈពេលដល់ទៅ៦ឆ្នាំ ។ គណបក្សរុស្ស៊ីរួបរួមនឹងបាត់បង់សំឡេងភាគច្រើន២ភាគ៣ ទោះបីខ្លួនឈ្នះឆ្នោតក៏ដោយ ៕
ចែករំលែកព័តមាននេះ