រាជធានីភ្នំពេញ ៖ នៅវេលាម៉ោង៩ព្រឹកថ្ងៃទី ៥ ធ្នូ ឆ្នាំ២០១១សាលាក្តីខ្មែរក្រហមបើកសវនាការលើភស្តុតាងក្នុងសំណុំរឿង០០២ប្រ ឆាំងនឹងជនជាប់ចោទអៀង សារី, ខៀវ សំផន និងនួន ជា។ ក្នុងការជំនុំជម្រះនេះជនជាប់នឹងត្រូវលើកនូវរាល់ភស្តុតាងទាំងឡាយដើម្បី ដោះបន្ទុកទៅនឹងការចោទប្រកាន់របស់សហព្រះរាជអាជ្ញានៃសាលាក្តី។
រាជធានីភ្នំពេញ ៖ នៅវេលាម៉ោង៩ព្រឹកថ្ងៃទី ៥ ធ្នូ ឆ្នាំ២០១១សាលាក្តីខ្មែរក្រហមបើកសវនាការលើភស្តុតាងក្នុងសំណុំរឿង០០២ប្រឆាំងនឹងជនជាប់ចោទអៀង សារី, ខៀវ សំផន និងនួន ជា។ ក្នុងការជំនុំជម្រះនេះជនជាប់នឹងត្រូវលើកនូវរាល់ភស្តុតាងទាំងឡាយដើម្បីដោះបន្ទុកទៅនឹងការចោទប្រកាន់របស់សហព្រះរាជអាជ្ញានៃសាលាក្តី។
សំណុំរឿង០០២ ជាសំណុំរឿងទី២នៅចំពោះមុខអង្គជំនុំជម្រះវិសាមញ្ញក្នុងតុលាការប្រឆាំងនឹងជនជាប់ចោទចំនួន៣រូប។ នួន ជា អាយុ៨៤ឆ្នាំ អតីតអនុលេខាបក្សកុម្មុយនីស្តកម្ពុជា អៀង សារី អាយុ៨៥ឆ្នាំ អតីតរដ្ឋមន្រ្តីក្រសួងការបរទេស ខៀវ សំផន អាយុ៧៩ឆ្នាំអតីតប្រមុខរដ្ឋកម្ពុជាប្រជាធិបតេយ្យ។
ជនជាប់ចោទទាំង៣រូប ត្រូវបានចោទប្រកាន់លើកដំបូងនិងត្រូវបានបង្គាប់ឱ្យបញ្ជូនទៅជំនុំជម្រះក្តីតាមរយៈដីកាបញ្ជូនរឿងទៅជំនុំជម្រះរបស់សហចៅក្រមស៊ើបអង្កេតនៅថ្ងៃទី ១៥ កញ្ញា ឆ្នាំ២០១០។
ក្រោយពីទទួលបានបណ្តឹងឧទ្ធរណ៍ពីជនជាប់ចោទទាំងរូប៣អង្គបុរេជំនុំជម្រះបានបញ្ជាក់គាំទ្រនិងកែប្រែផ្នែកខ្លះក្នុងដីកាបញ្ជូនរឿងទៅជំនុំជម្រះនិងចេញសាដីកាចុះថ្ងៃទី ១៣ មករា ឆ្នាំ ២០១១ បង្គាប់ឱ្យបញ្ជូនសំណុំរឿងទៅជំនុំជម្រះ ។
ជនជាប់ចោទទាំងបីរូបត្រូវបានចោទពីបទឧក្រិដ្ឋកម្មប្រឆាំងនឹងមនុស្សជាតិ ការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងបទប្រល័យពូជសាសន៍ និងអំពើមនុស្សឃាត ការធ្វើទារុណកម្មនិងការធ្វើទុក្ខបុកម្នេញខាងផ្នែកសាសនា ក្រោមក្រមព្រហ្មទណ្ឌកម្ពុជាឆ្នាំ១៩៥៦។
នួន ជា អតីតអនុប្រធានបក្សកុម្មុយនីស្តកម្ពុជានិងជាអតីតប្រធានរដ្ឋសភាកម្ពុជាប្រជាធិបតេយ្យបានថ្លែងកាលពីថ្ងៃទី២២ វិច្ឆិកា ក្នុងសារណាការពារខ្លួននៅសាលាក្ដីខ្មែរក្រហមថា ប្រទេសកម្ពុជាមានបញ្ហាដោយសារវៀតណាមមានមហិច្ឆតាលេបយក។ មកទល់បច្ចុប្បន្នវៀតណាមនៅតែគ្រប់គ្រងប្រទេសកម្ពុជាតាមរយៈសមាគមអាណិកជនវៀតណាមនៅប្រទេសកម្ពុជា ដែលមានសាខានៅ២៤ រាជធានី-ខេត្ត។
ថ្លែងនៅក្នុងសវនាការនៃតុលាការខ្មែរក្រហមនៅពេលថ្មីៗនេះ លោកនួន ជា បានបង្ហើបថា វៀតណាមមានបំណងត្រួតត្រាប្រទេសកម្ពុជាជាយូរមកហើយ។ ការចង់ត្រួតត្រាប្រទេសកម្ពុជារបស់អ្នកដឹកនាំវៀតណាមនេះមានតាំងពីបក្សកុម្មុយនីស្តកម្ពុជាទើបតែកើតមានរហូតដល់បក្សកុម្មុយនីស្តកម្ពុជាបានទទួលជ័យជម្នះត្រួតត្រាប្រទេស និងចុងក្រោយរលាយទៅវិញ។
ជាមួយគ្នានេះ យោងតាមសេចក្តីប្រកាសព័ត៌មានរបស់សាលាក្តីនៅថ្ងៃទី ១៨ វិច្ឆិកា ឆ្នាំ២០១១ឱ្យដឹងថា អង្គជំនុំជម្រះសាលាដំបូងចេញសេចក្តីសម្រេចលើកាយសម្បទារបស់ជនជាប់ចោទ អៀង ធីរិទ្ធ ក្នុងការចូលរួមសវនា
ការ។ នៅក្នុងសេចក្តីសម្រេចនេះអង្គជំនុំជម្រះសាលាដំបូងបានយល់ថា ជនជាប់ចោទ អៀង ធីរិទ្ធ ពុំមានកាយសម្បទានិងបញ្ញាស្មារតីគ្រប់គ្រាន់ក្នុងការចូលរួមសវនាការនាពេលនេះបានទេ។ អៀង ធីរិទ្ធ ត្រូវបានរកឃើញថា មានជំងឺវង្វេងវង្វាន់ដែលកាន់តែចុះខ្សោយទៅៗ។ ដើម្បីផលប្រយោជន៍យុត្តិធម៌ អង្គជំនុំជម្រះសាលាដំបូងសម្រេចចិត្តជាឯកច្ឆន្ទបំបែកបទចោទប្រកាន់ប្រឆាំងនឹងអៀង ធីរិទ្ធ និងផ្អាកកិច្ចដំណើរការនីតិវិធីចំពោះគាត់។
បើទោះបីជាមានការពិភាក្សាគ្នាអស់រយៈពេលយ៉ាងយូរក្តី និងបើទោះជាបានយល់ស្របគ្នាថា ជនជាន់ចោទពុំមានកាយសម្បទា និងបញ្ញាស្មារតីគ្រប់គ្រាន់ក្នុងការចូលរួមសវនាការក្តីក៏អង្គជំនុំជម្រះសាលាដំបូងពុំអាចយល់ស្របគ្នាលើបញ្ហាមួយចំនួនពាក់ព័ន្ធការបន្តឃុំខ្លួនគាត់ និងលក្ខខណ្ឌនៃការដោះលែង(រួមទាំងការឃ្លាំមើលដូចជាការបង្ខំឱ្យចូលសម្រាកព្យាបាលនៅមន្ទីរពេទ្យ)។ ដូចដែលអ្នកជំនាញវេជ្ជសាស្រ្តទាំងអស់បានយល់ស្របគ្នាថា អៀង ធីរិទ្ធ នឹងមិនមានអាការធូរស្បើយពីជំងឺដែលអនុញ្ញាតឱ្យគាត់អាចត្រូវជំនុំជម្រះនាពេលអនាគត ទើបអង្គជំនុំជម្រះបានសម្រេចផ្អាកកិច្ចដំណើរការនីតិវិធីចំពោះគាត់។
ដោយសារតែគ្មានតម្រុយណាមួយដែលបង្ហាញថា ជនជាប់ចោទអាចនឹងត្រូវនាំយកមកជំនុំជម្រះបាន ចៅក្រមអន្តរជាតិយល់ឃើញថា អ.វ.ត.ក គ្មានមូលដ្ឋានណាមួយដើម្បីបង្ខំឱ្យជនជាប់ចោទចូលព្យាបាលនៅមន្ទីរពេទ្យ ឬដាក់វិធានការបង្ខំលើរូបគាត់បានឡើយ។ ក៏ប៉ុន្តែចៅក្រមជាតិវិញយល់ឃើញថា នៅមានលទ្ធភាពមួយចំនួនដែលគួរតែបញ្ជូនជនជាប់ចោទទៅ ព្យាបាលនៅមន្ទីរពេទ្យ និងដាក់គាត់ឱ្យស្ថិតនៅក្រោមវិធានការមួយចំនួន ធ្វើដូច្នេះទើបជនជាប់ចោទនឹងមិនអាចគេចវេះពីរង្វង់យុត្តិធម៌បាន។ ដើម្បីចៀសវាងនូវភាពមិនច្បាស់លាស់ចំពោះជនជាប់ចោទ អៀង ធីរិទ្ធ ដែលជាលទ្ធផលនៃកង្វះការព្រមព្រៀងគ្នាទៅលើការដាក់លក្ខខណ្ឌមួយចំនួននៅពេលដោះលែង អង្គជំនុំជម្រះសាលាដំបូងបានសម្រេចដោះលែងគាត់។ ដូច្នេះសេចក្តីសម្រេចដោះលែងអៀង ធីរិទ្ធ ពីមន្ទីរឃុំឃាំងរបស់អ.វ.ត.ក ត្រូវបានរៀបចំ។
គួរបញ្ជាក់ថា ការរកឃើញអៀង ធីរិទ្ធ ពុំមានកាយសម្បទា និងបញ្ញាស្មារតីគ្រប់គ្រាន់ក្នុងការចូលរួមការជំនុំជម្រះ ពុំមានន័យថា ជាការរកឃើញជនជាប់ចោទមានពិរុទ្ធភាពឬភាពសុចរិតនោះទេ ៕
ចែករំលែកព័តមាននេះ