រាជធានីភ្នំពេញ ៖ យុវជន៣នាក់ខណៈកំពុងជិះម៉ូតូ១គ្រឿង ឌុបគ្នាបើកបរក្នុងល្បឿនយ៉ាងលឿនបានជ្រុលទៅបុករថយន្តដឹកអេតចាយដែលចតស្ងៀមពីក្រោយពេញទំហឹង បណ្តាលឱ្យស្លាប់បាត់បង់ជីវិត នៅនឹងកន្លែងទាំងអស់គ្នា ហើយក្នុងចំណោមជនរងគ្រោះទាំង៣នាក់នោះ មានម្នាក់ដាច់ខ្លួនជាពីរកំណាត់ដូចគេកាប់ ដោយមួយកំណាត់ត្រឹមចង្កេះចុះមកក្រោមនៅជាប់នឹងម៉ូតូ ឯមួយកំណាត់ទៀតត្រឹមចង្កេះឡើងលើរមៀលចេញចម្ងាយប្រមាណជិត២ម៉ែត្រ ក្បែរសាកសពយុវជនម្នាក់ទៀត ធ្វើឱ្យអ្នកទៅចោមរោមមើលញាក់សាច់រន្ធត់ចិត្តគ្រប់គ្នា។
ឧប្បត្តិហេតុគ្រោះថ្នាក់ចរាចរណ៍ដ៏កម្រនេះបានកើតឡើងកាលពីវេលាម៉ោង៩យប់ថ្ងៃទី៦ វិច្ឆិកា នៅលើកំណាត់ផ្លូវជាតិលេខ៣ ត្រង់ចំណុចខាងត្បូងខ្លោងទ្វារវត្តព្រៃស្ពឺ ប្រមាណជាង១០០ម៉ែត្រ ស្ថិតក្នុងភូមិព្រៃកំបុត សង្កាត់ចោមចៅ ។
ជនរងគ្រោះដែលស្លាប់បាត់បង់ជីវិតនោះ ១-ឈ្មោះមាន កុសល ភេទប្រុស អាយុ១៨ឆ្នាំ ២-ឈ្មោះនី ថុល ភេទប្រុស អាយុ២៦ឆ្នាំ និង៣-ឈ្មោះញឹម ធា ភេទប្រុស អាយុ២៣ឆ្នាំ ជាអ្នកបើកម៉ូតូបានដាច់ខ្លួនជាពីរកំណាត់ ដូចគេកាប់នឹងកាំបិត ពួកគេធ្វើការនៅរោងចក្រម្តុំសង្កាត់ស្ទឹងមានជ័យ ជិះម៉ូតូ១គ្រឿង ម៉ាកហុងដា ឌ្រីម C125 ស៊េរីឆ្នាំ២០០៩ ពណ៌ខ្មៅ មានទីលំនៅភូមិជាមួយគ្នា ភូមិកំបោរ ឃុំបឹងត្រាញ់ ខាងត្បូង ស្រុកសំរោង ខេត្តតាកែវ ។ ចំណែកឯរថយន្តដឹកអេតចាយ យ៉ាងសំពីងសំពោងម៉ាកហ៊ីយ៉ាន់ដាយ ពណ៌ខៀវ បើកបរដោយបុរសឈ្មោះផាន ថុង អាយុ៣២ឆ្នាំ ស្នាក់នៅស្តង់អេតចាយ ម្តុំសង្កាត់ស្វាយប៉ាក ខណ្ឌឫស្សីកែវ ត្រូវប៉ូលិសមូលដ្ឋានឃាត់ខ្លួនប្រគល់ឱ្យប៉ូលិសការិយាល័យចរាចរផ្លូវគោករាជធានីភ្នំពេញ ដើម្បីកសាងសំណុំរឿងចាត់ការតាមផ្លូវច្បាប់។
តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ រថយន្តដឹកអេតចាយបានបើកក្នុងទិសដៅពីត្បូងទៅជើងដោយមានដឹកអេតចាយយ៉ាងសំពីងសំពោងទៀតផង ក្នុងបំណងយកទៅដាក់ក្នុងស្តង់ម្តុំសង្កាត់ស្វាយប៉ាក ។ លុះពេលទៅដល់ត្រង់ចំណុចកើតហេតុ ខាងលើ រថយន្តនោះបានឈប់ ហើយអ្នកបើកបរបានចុះដងទឹកចាក់ម៉ាស៊ីនរថយន្ត ខណៈនោះជនរងគ្រោះទាំង៣នាក់បានជិះម៉ូតូក្នុងទិសដៅស្របគ្នាទៅដល់ចំណុចកើតហេតុ ហើយដោយសារសន្ទុះល្បឿន ម៉ូតូលឿនពេក ទើបគេចមិនទាន់ក៏បានបុកចំជ្រុងទ្រុងរថយន្តពីក្រោយផ្នែកខាងឆ្វេងពេញទំហឹងបណ្តាលឱ្យស្លាប់ភ្លាមៗទាំង៣នាក់ ក្នុងនោះឈ្មោះញឹម ធា ដែលជាអ្នកបើកបរម៉ូតូបានដាច់ខ្លួនជាពីរកំណាត់តែម្តង ៕
ចែករំលែកព័តមាននេះ