រដ្ឋបាលព្រៃឈើសង្កាត់តាខ្មៅចាប់រថយន្តទួរីសដឹកឈើគ្រញូង
ដោយ ៖ អប្សរា
ថ្ងៃព្រហស្បត្ត៏ ទី២ ខែកញ្ញា ឆ្នាំ២០១០ ម៉ោង ១៦:៣៤
បាសាក់
ឈើគ្រញូងក្រុមឈ្មួញដឹកតាមរថយន្តបំរុងលោតឆត្រចេញទៅប្រទេសវៀតណាម
ខេត្តកណ្តាល ៖ ឈើគ្រញូងជិតមួយម៉ែត្រគូប ដែលក្រុមឈ្មួញដឹកតាមរថយន្តបំរុងលោតឆត្រចេញទៅប្រទេសវៀតណាមតាមស្រុកកោះធំ ត្រូវបានកំលាំងមេព្រៃសង្កាត់តាខ្មៅ សហការជាមួយកំលាំងអធិការដ្ឋានរដ្ឋបាលព្រៃឈើខាងត្បូងបឹងទន្លេសាប និងខណ្ឌរដ្ឋបាលព្រៃឈើកណ្តាលស្ទាក់ចាប់បាន កាលពីវេលាម៉ោង១២និង៣០នាទី ថ្ងៃទី១ កញ្ញា ឆ្នាំ២០១០ នៅលើផ្លូវជាតិលេខ២១B ស្ថិតនៅភូមិត្រើយត្រឹង្ស ឃុំព្រែកអំបិល ស្រុកស្អាង ខេត្តកណ្តាល ។
លោកសេង លាង នាយសង្កាត់រដ្ឋបាលព្រៃឈើតាខ្មៅបានឱ្យកោះសន្តិភាពដឹងថា កំលាំងរដ្ឋបាលព្រៃឈើ់បានសហការគ្នាតាមដានបទល្មើសព្រៃឈើ ហើយបានប្រទះឃើញរថយន្តទួរីសមួយគ្រឿងដែលសង្ស័យដឹកឈើល្មើសច្បាប់ ក៏បានបើករថយន្តដេញតាមរហូតដល់ភូមិ ឃុំខាងលើ ទើបស្ទាក់ចាប់បាន ចំណែកអ្នកបើកបររថយន្តនេះបានរត់គេចខ្លួនបាត់នៅសល់តែកម្មករម្នាក់ឈ្មោះចំរើន សុខលី ភេទប្រុស អាយុ២៣ឆ្នាំ មានទីលំនៅភូមិកំពង់សំបួរលើ ឃុំព្រែកថ្មី ស្រុកកោះធំត្រូវបានឃាត់ខ្លួន ។ រថយន្តដឹកឈើនេះ ម៉ាកហ៊ីយ៉ាន់ដាយ ប្រភេទទួរីស១២កៅអី ពណ៌ប្រផេះ ពាក់ស្លាកលេខកណ្តាល 2A-0318 ត្រូវបានរឹបអូសជាមួយឈើគ្រញូងចំនួន១៥៩ដុំ ស្មើនឹង១.០០០គីឡូក្រាម ។
ឈ្មោះចំរើន សុខលី ដែលសមត្ថកិច្ចមេព្រៃឃាត់ខ្លួនយកមកសាកសួរបានឆ្លើយសារភាពថា ខ្លួនជាអ្នកស៊ីឈ្នួលលើកឈើឱ្យគេ តែពុំស្គាល់ឈ្មោះម្ចាស់ឈើនោះទេ គ្រាន់តែដឹងថាម្ចាស់ឈើ គឺជាជនជាតិវៀតណាម ។ ឈើទាំងនោះដឹកចេញមកពីភ្នំពេញ បំរុងយកទៅជ្រៃធំ ស្រុកកោះធំ ។ ចំលើយរបស់កម្មកររូបនេះហាក់បីដូចជាមានការលាក់លៀមចំពោះសមត្ថកិច្ច ព្រោះសូម្បីតែអ្នកបើកបររថយន្តនេះ ក៏មិនស្គាល់ ចំណែកម្ចាស់ឈើក៏ឆ្លើយថា មិនស្គាល់ទៀត ចុះហេតុអ្វីបានជាមានទំនាក់ទំនងគ្នា រហូតស្គាល់គ្នាជួលធ្វើជាកម្មករ ។ បច្ចុប្បន្នរថយន្តដឹកឈើ និងកម្មករលើកដាក់ឈើនេះ ត្រូវបានសមត្ថកិច្ចមេព្រៃកំពុងកសាងសំណុំរឿង ដើម្បីចាត់ការតាមនីតិវិធីច្បាប់ ៕
