គណៈកម្មាធិការកណ្ដាលគណបក្សប្រជាជនកម្ពុជាបើកសន្និបាតរយៈពេល២ថ្ងៃ កោតសរសើរការដឹកនាំរបស់សម្ដេចតេជោ
ដោយ ៖ អប្សរា
ថ្ងៃពុធ ទី២១ ខែកក្កដា ឆ្នាំ២០១០ ម៉ោង ១៥:១៧
រាជធានីភ្នំពេញ ៖ គណៈកម្មាធិការ កណ្ដាលគណបក្សប្រជាជនកម្ពុជា នាព្រឹកថ្ងៃ ទី២១ ខែកក្កដា ឆ្នាំ២០១០បានប្រារឰពិធី បើកសន្និបាតគណៈកម្មាធិការកណ្ដាលលើកទី៣៥ អាណត្ដិទី៥ រយៈពេល២ថ្ងៃ ចាប់ពីថ្ងៃទី ២១ ដល់ថ្ងៃទី២២ ខែកក្កដា ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាធម្មពោធិសាល ជា ស៊ីម ប្រធានគណបក្ស សម្ដេចអគ្គមហាសេនាបតីតេជោហ៊ុន សែន អនុប្រធានគណបក្ស ស្ថិតនៅទីកន្លែងគណៈកម្មាធិការកណ្ដាល ។ សមាជិក សមាជិកាគណៈកម្មាធិការកណ្ដាលអញ្ជើញចូលរួមសន្និបាតមានចំនួន២៣៩រូប លើរចនាសម្ព័ន្ធរួម២៦៨រូប ។
បន្ថែមលើនេះ អង្គសន្និបាតក៏បានបើក ទូលាយដោយបានអញ្ជើញលោក លោកស្រី ដែលជាសមាជិក សមាជិកា រដ្ឋសភា ព្រឹទ្ធសភា រាជរដ្ឋាភិបាលនិងមន្ដ្រីជាន់ខ្ពស់មួយ ចំនួននៅតាមក្រសួង ស្ថាប័ន រាជធានី ខេត្ដ ចូលរួមចំនួនសរុបទាំង៨៩៦រូប ។ ដោយឡែកសម្ដេចអគ្គមហាពញាចក្រីហេង សំំរិន ប្រធានរដ្ឋសភា និងជាប្រធានកិត្ដិយសគណបក្សបានអវត្ដមានអាស្រ័យដោយអញ្ជើញ ទៅប្រជុំនៅក្រៅប្រទេស ។
សុន្ទរកថាបើកសន្និបាតខគណៈកម្មាធិការកណ្ដាលនេះសម្ដេចអគ្គមហាធម្មពោធិសាល ជា ស៊ីម ប្រធានគណបក្សបានគូសបញ្ជាក់ថា អ្វីៗដែលយើងទទួលបានគឺជាស្នាដៃរួមរបស់យើងទាំងអស់គ្នា តែក្នុងនោះចម្បងបំផុតគឺបានមកពីភាពអង់អាចក្លាហាន និងការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោហ៊ុន សែន ។
អង្គសន្និបាតទាំងមូល សូមគោរពកោតសរសើរស្ងប់ស្ងែង និងសំដែងនូវ កតញូតាធម៌ ដ៏ខ្ពង់ខ្ពស់បំផុតចំពោះសម្ដេចអគ្គមហាសេនាបតីតេជោហ៊ុន សែន និងលោកជំទាវ ជានិច្ចកាលយើងនៅតែមាន មនសិការថា សេចក្ដីរីករាយបំផុតរបស់ គណបក្សយើងនោះគឺជាសុភមង្គលរបស់ ប្រជាជននិងភាពជឿនលឿនរបស់ប្រទេសជាតិ ហើយដែលយើងអាចរកបានតែតាម ជំហានៗប៉ុណ្ណោះ ។ ព័ត៌មានលំអិតនឹងផ្សាយ ជូននៅពេលក្រោយ និងនៅលើទំព័រកាសែត កោះសន្ដិភាព .
