គណៈកម្មាធិការជាតិអូឡាំពិកបង្កើតសមាគមកីឡា CRICKET ASSOCIATION CAMBODIA
ដោយ ៖ អប្សរា
ថ្ងៃចន្ទ ទី១៧ ខែតុលា ឆ្នាំ២០១១ ម៉ោង ១៦:៥៩
គេហទំព័របរទេស
លោក វ៉ាត់ ចំរើន ពេលចុះហត្ថលេខាជាមួយក្រុមហ៊ុនហុងកុង
រាជធានីភ្នំពេញ ៖ កាលពីយប់ថ្ងៃសៅរ៍ទី១៥ តុលា គណៈកម្មាធិការជាតិអូឡាពិកកម្ពុជា បានធ្វើពិធីចុះហត្ថលេខាជាមួយក្រុមហ៊ុនមួយរបស់ហុងកុង ឈ្មោះRUDRA PRIYA SPORTSដើម្បីបង្កើតឡើងនូវសមាគមកីឡាមួយថ្មីទៀតមានឈ្មោះថា CRICKET ASSOCIATION CAMBODIA ។
លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឱ្យដឹងថា សមាគមកីឡាថ្មីមួយនេះមានថ្នាក់ដឹកនាំតែ៧រូបប៉ុណ្ណោះ ដែលមួួយចំនួនជាមន្ត្រីនៅក្នុងគណៈកម្មាធិការជាតិអូឡាំពិកកម្ពុជា និងមួយចំនួនទៀតជា ជនជាតិប៉ាគីស្ថាន ឥណ្ឌា និងស្រីលង្កា។ ការបង្កើតឡើងនូវសមាគមកីឡាថ្មីមួយទៀត នេះ គឺជាការបង្ហាញឱ្យឃើញនូវភាពរីកចម្រើនលើវិស័យកីឡានៅក្នុងប្រទេសកម្ពុជា។
លោក MANISA SHARMA នាយកក្រុមហ៊ុន RUDRA PRIYA SPORTS បានគូសបញ្ជាក់ថា លោកនឹងប្រើពេល៣ឆ្នាំ ដើម្បីជួយវិស័យកីឡាមួយនេះឱ្យមានភាពរីកចម្រើនយ៉ាងឆាប់រហ័សនៅក្នុងប្រទេសកម្ពុជា ជាពិសេសគឺលោកមានបំណងធ្វើការបញ្ជ្រៀតចូលតាមរយៈសាលារៀន ដោយផ្តោតសំខាន់ទៅលើកុមារដែលមានអាយុ១៥ឆ្នាំឡើងទៅ។ ប្រភេទកីឡាមួយនេះ បច្ចុប្បន្នមានប្រទេសចំនួន៨៤នៅលើពិភពលោកកំពុងតែពេញនិយម រីឯកម្ពុជា គឺជាប្រទេសក្រោយគេដែលទើបតែចាប់ផ្តើម ។
លោកMANISA SHARMA បានបញ្ជាក់ទៀតថា នៅឆ្នាំ១៨៥០ កីឡាមួយនេះបានកើតឡើងនៅប្រទេសបារាំង ប៉ុន្តែមានភាពរីកចម្រើននៅប្រទេសអង់គ្លេស ហើយបច្ចុប្បន្នប្រទេសដែលតែងទទួលបានជាម្ចាស់ជើងឯកពិភពលោកញឹកញាប់គឺឥណ្ឌា ។ លោកសង្ឃឹមថា ប្រភេទកីឡាមួយនេះនឹងមានភាពរីកចម្រើនយ៉ាងឆាប់រហ័សនៅកម្ពុជា៕
