រាជធានីភ្នំពេញ ៖ យុវជនម្នាក់ និងក្មេងប្រុសជំទង់ម្នាក់ត្រូវបានប៉ូលិសខណ្ឌដង្កោចាប់ខ្លួនក្នុងថ្ងៃតែមួយ ប៉ុន្តែនៅទីកន្លែងផ្សេងគ្នា ដោយម្នាក់ត្រូវចាប់ខ្លួនពីបទប៉ុនប៉ងរំលោភសេពសន្ថវៈក្មេងស្រីម្នាក់ និងម្នាក់ទៀតក៏បានចាប់រំលោភផងដែរ ប៉ុន្តែពុំបានសំរេច។ ករណីរំលោភសេពសន្ថវៈទី១បានកើតឡើងកាលពីវេលាម៉ោង៦ព្រឹកថ្ងៃទី១៩ មករា នៅក្នុងព្រៃទួលឥដ្ឋ ភូមិចេក ស្រុកចេក សង្កាត់ជើងឯក ខណ្ឌដង្កោ ។ យុវជនជាប់ចោទឈ្មោះវ៉េត សុខណាក់ អាយុ១៨ឆ្នាំ មុខរបរកម្មករ មានទីលំនៅក្នុងភូមិកើតហេតុខាងលើ រីឯក្មេងស្រីរងគ្រោះឈ្មោះ ជ.ភ អាយុ១៤ឆ្នាំ ។
តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ យុវតីរងគ្រោះបានចេញពីផ្ទះទៅបត់ជើងនៅក្នុងព្រៃ ចំងាយពីផ្ទះប្រហែល១០០ម៉ែត្រ ។ ពេលនោះក៏បានជួបជនសង្ស័យ ហើយគេបានចាប់ឱបនាងជាប់ តែនាងខំរើបម្រាស់យ៉ាងខ្លាំង រហូតរបូតស្បែកជើងម្ខាងនៅទីនោះ ។ បន្ទាប់មកនាងក៏បានរើរួច ហើយរត់សំដៅទៅផ្ទះទាំងភិតភ័យ ប៉ុន្តែមិនបានប្រាប់រឿងនេះ ដល់ឪពុកម្តាយនៅឡើយ ។ លុះក្រោយមកមានស្ត្រីម្នាក់ទៀត ទៅបត់ជើងនៅទីនោះដែរក៏ប្រទះឃើញស្បែកជើងរបស់យុវតីរងគ្រោះ ក៏បានរើសយកទៅបង្ហាញស្ត្រីជាម្តាយ យុវតីរងគ្រោះ ទើបម្តាយសាកសួរទៅ នាងក៏បែកធ្លាយរឿងប៉ុនប៉ងរំលោភនោះ ហើយក៏បានប្តឹងប៉ូលិសឱ្យចាប់ខ្លួនតែម្តង ។
ដោយឡែកហេតុការណ៍ចាប់រំលោភសេពសន្ថវៈមួយទៀតបានកើតឡើង កាលពីវេលាម៉ោង១២និង៤០នាទីរសៀលថ្ងៃទី១៩ មករា នៅក្នុងភូមិអញ្ចាញទី២ សង្កាត់ត្រពាំងក្រសាំង ខណ្ឌដង្កោ ។ ក្មេងប្រុសម្នាក់ត្រូវប៉ូលិសចាប់ខ្លួនឈ្មោះសាក់ ពិសិដ្ឋ អាយុ១៥ឆ្នាំ មានទីលំនៅក្នុងភូមិកើតហេតុខាងលើ ចំណែកឯកុមារីរងគ្រោះមានអាយុទើបតែ៥ឆ្នាំប៉ុណ្ណោះ ។
តាមប្រភពព័ត៌មានបានឱ្យដឹងថា នៅមុនពេលកើតហេតុ កុមារីរងគ្រោះរួមជាមួយបងប្អូនម្នាក់ទៀតដែលជាក្មេងស្រី.គ បានទៅមើលទូរទស្សន៍នៅក្នុងផ្ទះក្មេងប្រុសជំទង់នោះ ។ ពេលនោះ ដោយសារឃើញឱកាសស្ងាត់ល្អ ក្មេងប្រុសជំទង់ក៏ចាប់រំលោភកុមារីរងគ្រោះតែម្តង ចំណែកក្មេងស្រី គ ឃើញសកម្មភាពបែបនេះ ក៏រត់ទៅប្រាប់ស្ត្រីជាជីដូនរបស់ខ្លួន តាមរយៈការធ្វើកាយវិការ ហើយទើបជីដូនមានការឆោឡោនិងប្តឹងប៉ូលិសឱ្យចាប់ខ្លួនតែម្តង ៕
ចែករំលែកព័តមាននេះ