សេដ្ឋកិច្ចកម្ពុជាកំពុងប្រសើរឡើង ខណៈពេលដែលការចុះបញ្ជី ក្រុមហ៊ុនថ្មីៗកើនឡើងជាង២០%
ដោយ ៖ អប្សរា
ថ្ងៃសុក្រ ទី៣ ខែកញ្ញា ឆ្នាំ២០១០ ម៉ោង ១៥:៣៩
រាជធានីភ្នំពេញ ៖ ពេលដែលសេដ្ឋកិច្ចរបស់កម្ពុជា បានជួបប្រទះនូវព្យុះនៃវិបត្តិសាកលនាពេលកន្លងមក ធ្វើឱ្យក្រុមហ៊ុនមួយចំនួនបានរាំងស្ទះនូវការចុះបញ្ជី ។ ប៉ុន្តែមកដល់រយៈពេល៧ខែដើមឆ្នាំ២០១០ នេះ ក្រុមហ៊ុនដែលបានចុះបញ្ជី រួចកើនឡើងជាង២០ភាគរយបើប្រៀបធៀបទៅនឹងរយៈពេលដូចគ្នាកាលពីឆ្នាំមុន ។ យោងតាមតួលេខរបស់ប្រធាននាយកដ្ឋាន ស្ថិតិនៃក្រសួងពាណិជ្ជកម្ម បានឱ្យដឹងថា ក្រុមហ៊ុនដែលបានចុះបញ្ជីរួចក្នុងរយៈពេល៧ខែដំបូង ក្នុងឆ្នាំ២០១០ នេះ មានចំនួន១.៣៦៩ក្រុមហ៊ុន បានកើនឡើងជាង២០ភាគរយ បើប្រៀបធៀបទៅនឹងរយៈពេលដូចគ្នាក្នុងឆ្នាំ២០០៩ ដែលកាលនោះមានតែ១.១៣៧ក្រុមហ៊ុនប៉ុណ្ណោះ ។
បើតាមតួលេខបានបង្ហាញទៀតថា ចាប់តាំងពីឆ្នាំ២០០៤ រហូតមកដល់ខែកក្កដា ឆ្នាំ២០១០ ចំនួនក្រុមហ៊ុនដែលបានចុះបញ្ជីរួចរាល់ សរុបមាន១២.៥៦៥ក្រុមហ៊ុន ។ លោកគង់ ពុទ្ធារ៉ា ប្រធាននាយកដ្ឋានស្ថិតិនៃក្រសួងពាណិជ្ជកម្មបានប្រាប់កោះសន្តិភាពថា ការចុះបញ្ជីរបស់ក្រុមហ៊ុនថ្មីៗក្នុងរយៈពេលនេះមានការកើនឡើងគួរឱ្យចាប់អារម្មណ៍ជាខ្លាំង ។ លោកបានលើកឡើងយ៉ាងដូច្នេះថា «ការកើនឡើងនៃការចុះបញ្ជីរបស់ក្រុមហ៊ុន នឹងជួយឱ្យប្រជាពលរដ្ឋមានការងារធ្វើកាន់តែច្រើន អាចរកប្រាក់ចំណូលបានច្រើន ក្នុងការផ្គត់ផ្គង់ជីវភាព ហើយសេដ្ឋកិច្ចជាតិក៏កើនឡើងផងដែរ» ។
លោក កង ចន្ទតារារ័ត្ន អ្នកវិភាគសេដ្ឋកិច្ចជាន់ខ្ពស់ និងជាប្រធាននាយកដ្ឋានសិក្សា ដើម្បីអភិវឌ្ឍន៍ បានថ្លែងឱ្យដឹងកាលពីថ្ងៃព្រហស្បតិ៍ ទី២ សីហា ថា ការព្យាករណ៍នាពេលកន្លងមក សេដ្ឋកិច្ចកម្ពុជា នឹងងើបឡើងក្នុងឆ្នាំ២០១០ ក្រោយពីបានទទួលរងនូវឥទិ្ធពលនៃវិបត្តិសេដ្ឋកិច្ចពិភពលោក កាលពីឆ្នាំមុន ពិតជាត្រឹមត្រូវដោយសារតែការចុះបញ្ជីរបស់ក្រុមហ៊ុនមានការកើនឡើងចាប់តាំងពីដើមឆ្នាំ២០១០ មកម្លេះ ។ លោកបានបញ្ជាក់ថា «វាជាសញ្ញាមួយដ៏ល្អដែលជួយជំរុញឱ្យសេដ្ឋកិច្ចរបស់កម្ពុជា មានសន្ទុះងើបឡើង ព្រោះថាការចុះបញ្ជីនៃក្រុមហ៊ុនថ្មីៗ ក្នុងឆ្នាំ២០១០ នេះ មានលក្ខណៈជាក្រុមដែលបង្ហាញឱ្យឃើញពីសេដ្ឋកិច្មានភាពធូរស្រាល ហើយវានឹងអាចទាក់ទាញអ្នកវិនិយោគកាន់តែច្រើនថែមទៀត» ៕
