ប្រធានាធិបតីអាមេរិកជាអ្នកក្លាហានបានទទួលពានរង្វាន់ពីការប្រកួតធ្វើម្ហូបពងស្វាសសត្វនៅប្រទេសស៊ែប៊ី
ដោយ ៖ សាម៉ន
ថ្ងៃពុធ ទី១ ខែកញ្ញា ឆ្នាំ២០១០ ម៉ោង ១៤:០០
គេហទំព័របរទេស
លោកបារ៉ាក់ អូប៉ាម៉ា ប្រធានាធិបតីសហរដ្ឋអាមេរិក
បណ្តាចុងភៅបានចូលរួមបង្ហាញថ្វីដៃធ្វើម្ហូបអាហារដោយប្រើពងស្វាសគោជល់ ជ្រូកព្រៃ អូដ្ឋ និងកង់ហ្គារូ នៅក្នុងការប្រកួតចំអិនម្ហូបពីពងសត្វ ដើម្បីប្រជែងយកជើងឯកពិភពលោកប្រចាំឆ្នាំ២០១០ នៅក្នុងភូមិមួយស្ថិតនៅកណ្តាលជ្រលងភ្នំដ៏សែនឆ្ងាយនៃប្រទេសស៊ែប៊ី ។ អាហារដែលចំអិនពីពងស្វាសសត្វនេះ ភាសារបស់ស៊ែប៊ី ហៅថា «ក្រលៀនស»ដែលគេជឿជាក់ថា សំបូរដោយអ័រម៉ូនភេទឈ្មោល។ បណ្តាមនុស្សនៅតាមតំបន់ភ្នំចាត់ទុកថា ពងស្វាសសត្វជាថ្នាំប៉ូវកំលាំងសំរាប់បុរស ។
លោកលូបូមៀ អេរ៉ូវីស ចុងភៅជនជាតិស៊ែប៊ី អ្នកជំនាញខាងភ្លក្សម្ហូបអាហារដែលច្នៃពីពងស្វាសបានថ្លែងថា ពិធីបុណ្យប្រពៃណីនេះមានតែភាពសប្បាយរីករាយក្នុងការទទួលទានអាហារ និងភាពក្លាហាន ។ ដោយឡែកលោកសូលតាន ឡេវ៉ាយ អ្នកទទួលជ័យជំនះក្នុងការប្រកួតធ្វើម្ហូបពីពងស្វាស កាលពីឆ្នាំមុនបានថ្លែងថា ពងស្វាសរបស់គោជល់ជាប្រភេទផលិតផលដ៏លេចធ្លោក្នុងការចំអិនម្ហូប ។
ភ្ញៀវទេសចរនឹងបានទទួលទានអាហារច្នៃពីពងស្វាសរួមជាមួយស្រា ឬស្រាបៀរ និងបំបាត់ក្តៅស្អុះស្អាប់ដោយការចុះទៅងូតទឹកជ្រោះ រួមទាំងស្តាប់បទចំរៀងផងដែរ ។ ក្រៅពីនេះថែមទាំងមានហាងលក់សាច់ជ្រូកអាំង ឬសាច់ចៀមអាំង គួបផ្សំនឹងអាហារពិសេសធ្វើពីពងស្វាសសត្វផ្សេងៗផងដែរ ។ ការប្រកួតចំអិនអាហារពីពងស្វាសសត្វដណ្តើមជើងឯកពិភពលោកប្រចាំឆ្នាំ២០១០ នៅតែផ្តល់រង្វាន់ដល់បុគ្គលដែលចាត់ទុកថា ជាអ្នកក្លាហានប្រចាំឆ្នាំ ។ ដោយឡែកឆ្នាំនេះអ្នកដែលទទួលរង្វាន់ពីការប្រកួតនេះ គឺបានទៅលើលោកបារ៉ាក់ អូប៉ាម៉ា ប្រធានាធិបតីសហរដ្ឋអាមេរិក៕
