ខេត្តបាត់ដំបង ៖ ជនអគតិដែលយកទឹកថ្នាំទៅគូរពាសពេញលើរូបសំណាកព្រះបាទជ័យ វរ័្មនទី៧ តាំងនៅចំកណ្តាលសួនច្បារលោកស ខេង ខាងមុខភូមិគ្រឹះលោកអភិបាលខេត្តក្នុងក្រុងបាត់ដំបង ហើយធ្វើឱ្យភ្ញាក់ផ្អើល និងមានប្រតិកម្មយ៉ាងខ្លាំងពីមន្ត្រីថ្នាក់លើនោះត្រូវក្រុម សមត្ថកិច្ចតាមស្រាវជ្រាវ
ខេត្តបាត់ដំបង ៖ ជនអគតិដែលយកទឹកថ្នាំទៅគូរពាសពេញលើរូបសំណាកព្រះបាទជ័យវរ័្មនទី៧ តាំងនៅចំកណ្តាលសួនច្បារលោកស ខេង ខាងមុខភូមិគ្រឹះលោកអភិបាលខេត្តក្នុងក្រុងបាត់ដំបង ហើយធ្វើឱ្យភ្ញាក់ផ្អើល និងមានប្រតិកម្មយ៉ាងខ្លាំងពីមន្ត្រីថ្នាក់លើនោះត្រូវក្រុមសមត្ថកិច្ចតាមស្រាវជ្រាវចាប់បានហើយ កាលពីយប់ថ្ងៃទី២ សីហា គឺជាជនអគតិមែន ព្រោះជននោះមានសតិមិនប្រក្រតី ។
លោកជេត វណ្ណនី ស្នងការរងនគរបាលខេត្តមានប្រសាសន៍ថា ក្រោយពីមានប្រតិកម្មជុំវិញព័ត៌មានដែលថា មានជនពាលយកទឹកថ្នាំទៅគូរលើរូបសំណាកព្រះបាទជ័យវរ្ម័នទី៧ នៅលើសួនច្បារលោកស ខេង នោះ លោកក៏បានចាត់កម្លាំងឱ្យធ្វើការស្រាវជ្រាវភ្លាមៗរហូតដល់កំណត់មុខសញ្ញាបាន ។ លោកបានបញ្ជាក់ថា តាមពិតអ្នកដែលគូរផ្តេសផ្តាសលើរូបសំណាកព្រះបាទជ័យវរ្ម័នទី៧នោះ គឺជាមនុស្សមានសតិមិនប្រក្រតីឈ្មោះសាន កុសល ភេទប្រុស អាយុ២៦ឆ្នាំ រស់នៅភូមិបៃសាន ឃុំជ្រៃ ស្រុកថ្មគោល ។
បើតាមការឆ្លើយសារភាពនេះថា ខ្លួនបានគូរលើរូបសំណាកព្រះបាទជ័យវរ័្មនទី៧ នេះកាលពីរសៀលថ្ងៃទី៣១ កក្កដា កន្លងទៅដោយលើកពីមូលហេតុថា ខ្លួនតែងទៅហាត់ប្រាណជាមួយគេឯងនៅលើសួននោះ រួចឃើញរូបសំណាកព្រះបាទជ័យវរ្ម័នហាក់អង្គុយស្មឹងស្មាធិ៍មិនបើកភ្នែកសោះ ទើបខ្លួនយកទឹកថ្នាំទៅគូរលើត្របកភ្នែក ដើម្បីឱ្យបើកភ្នែកមើលមនុស្សលោកដែលកំពុងមានសេចក្តីលោភលន់មិនចេះគ្រប់គ្រាន់ ។ ជននេះនិយាយទៀតថា ចំពោះតំណក់ទឹកភ្នែករំលេចពណ៌ខ្មៅនោះ គឺចង់និយាយថា ពេលដែលព្រះអង្គបើកភ្នែកឃើញមនុស្សលោក ប្រព្រឹត្តខុសឆ្គងដូចនេះ ទើបព្រះអង្គសម្រក់ទឹកភ្នែកតែម្តង រីឯតំណក់ទឹកភ្នែករំលេចពណ៌.ស គឺព្រះអង្គយំដោយក្តីរំភើប ។ ចំណែកការគូរបញ្ចេញឆ្អឹងជំនីរនោះ គឺធម្មតាមនុស្សយើងត្រូវតែមានឆ្អឹងជំនីរអ៊ីចឹងហើយ ។
ទោះជាគេសង្កេតឃើញជននេះបង្ហាញពីចរិតមានសតិមិនប្រក្រតីក្តី តែការនិយាយបកស្រាយរបស់គេហាក់ដូចមានចេតនាអ្វីមួយដែលគេយល់ឃើញកើតមាននៅក្នុងសង្គមកម្ពុជាបច្ចុប្បន្ន ។ លោកជេត វណ្ណនី ស្នងការរង ក៏បានថ្លែងបញ្ជាក់ដែរថា យើងគ្រាន់តែធ្វើការសួរនាំហើយឱ្យជននេះត្រឡប់ទៅវិញ តែត្រូវឃ្លាំមើលសកម្មភាពរបស់គេជាប្រចាំក្រែងជននេះបង្កបញ្ហាអ្វីទៀត ។
សូមបញ្ជាក់ថា ករណីនេះបានធ្វើឱ្យប្រជាពលរដ្ឋក្នុងក្រុងបាត់ដំបងមានការភ្ញាក់ផ្អើលយ៉ាងខ្លាំង នៅពេលគេប្រទះឃើញរូបសំណាកព្រះបាទជ័យវរ្ម័នទី៧ តាំងលើសួនច្បារលោកស ខេង ត្រូវជនពាលយកទឹកថ្នាំមកគូរលើ ប៉ុន្តែគ្មានអាជ្ញាធរឬសមត្ថកិច្ចណាបានជ្រាបពីរឿងនេះទេ បើទោះជាមានក្រុមនគរបាលសណ្តាប់ធ្នាប់ក្រុងដើរប្រមូលលុយពីក្រុមអ្នកលក់ដូរតាមចិញ្ចើមថ្នល់ និងពីក្រុមអ្នកហាត់ប្រាណរៀងរាល់ថ្ងៃក្តី។ មតិនានាបានរិះគន់ថា សួនច្បារលោកស ខេង បច្ចុប្បន្នបានក្លាយជាកន្លែងធ្វើអាជីវកម្មរបស់មនុស្សមួយចំនួន តែគេមិនបានខ្វល់ខ្វាយពីសម្បត្តិសាធារណៈឡើយ ៕
ចែករំលែកព័តមាននេះ