ខេត្តកំពង់ចាម ៖ សំឡេងផ្ទុះបានលាន់ឮយ៉ាងកក្រើកដូចគ្រាប់ ចេញពីក្នុងទីប៉ាឆាមួយកន្លែងនៅចំណុចត្រពាំងរនាត ខណៈកំពុងបូជាសព ស្ថិតនៅខាងកើតភូមិអូរបេង ប្រហែលជា១០០ម៉ែត្រ ឃុំមេ.សជ្រៃ ស្រុកស្ទឹងត្រង់ ជាហេតុបណ្តាលឱ្យក្មេងស្រីម្នាក់អាយុ៨ឆ្នាំស្លាប់ភ្លាមៗ ហើយរបួសធ្ងន់ និងស្រាលចំនួន១២នាក់ ដេកដួលរដូករណែលនៅលើដី កាលពីវេលាម៉ោង៨និង២០នាទីព្រឹកថ្ងៃទី២ សីហា ២០១១។
អ្នករងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកចំការលើ និងបានបញ្ជូនបន្តទៅសង្គ្រោះនៅមន្ទីរពេទ្យខេត្ត ។ តាមសេចក្តីរាយការណ៍ពីលោកវរសេនីយ៍ត្រីជា ធារិទ្ធ អធិការនគរបាលស្រុកស្ទឹងត្រង់ ប្រាប់ឱ្យដឹងថា ស្របពេលដែលសាច់ញាតិកំពុងតែដុតសពស្ត្រីចំណាស់ឈ្មោះលឹម ឈីន អាយុ៦៩ឆ្នាំ រស់នៅ ភូមិកើតហេតុខាងលើ បានប្រហែល១០ទៅ២០នាទី អុសមិនសូវឆេះនោះទេ ដោយសារតែមានសំណើមពីទឹកភ្លៀង ហើយត្រូវបានក្រុមសាច់ញាតិនៃសពទៅទិញប្រេងសាំងចំនួន២លីត្រមកចាក់ស្រោចពីលើអុសដែលមិនទាន់ឆេះ ដើម្បីឱ្យឆាប់ឆេះ ហើយភ្លាមនោះសាំងក៏ឆាបឆេះវឹបតែម្តង ចំណែកអ្នកភ្លុកក៏បិទឡរង់ចាំកាយយកធាតុ។
លោកអធិការនគរបាលស្រុកស្ទឹងត្រង់បានបន្តថា បន្តិចក្រោយមកស្រាប់តែសំលេងផ្ទុះលាន់យ៉ាងទ្រហឹងកក្រើកឡើងចេញពីក្នុងទីប៉ាឆា ជាហេតុបណ្តាលឱ្យទ្វារដែកសំរាប់បិទឡបើកប៉ើងផ្លោងចេញមកក្រៅចំងាយ៧,៥០ម៉ែត្រចំក្មេងស្រីម្នាក់ឈ្មោះអូន ទូច អាយុ៨ឆ្នាំ ត្រូវជាចៅបង្កើតនៃសព បណ្តាលឱ្យស្លាប់ភ្លាមៗតែម្តង។ ក្រៅពីនេះបានរងរបួសដេកដួលរដូករណែលចំនួន១២នាក់មានក្មេងចាស់ប្រុសស្រី ត្រូវបានកំលាំងប៉ុស្តិ៍រដ្ឋបាលឃុំមេ.សជ្រៃមកជួយធ្វើអន្តរាគមន៍ហៅរថយន្តសង្គ្រោះរបស់មន្ទីរពេទ្យបង្អែកស្រុកចំការលើដឹកជាបន្តបន្ទាប់ទៅសង្គ្រោះ៕
ចែករំលែកព័តមាននេះ