ធនាគារអភិវឌ្ឍន៍ជនបទ ទទួលបានរង្វាន់ជ័យលាភីលើកទី៣របស់ខ្លួន
ដោយ ៖ អប្សរា
ថ្ងៃអាទិត្យ ទី២៣ ខែឧសភា ឆ្នាំ២០១០ ម៉ោង ១៤:៤៤
ដាណេ
ធនាគារអភិវឌ្ឍន៍ជនបទទទួលបានរង្វាន់ជ័យលាភីលើកទី៣របស់ខ្លួន
វិស័យអភិវឌ្ឍន៍សេដ្ឋកិច្ចមូលដ្ឋាន លើគម្រោងផ្សារភ្ជាប់វិស័យមីក្រូហិរញ្ញវត្ថុទៅនឹងវិស័យសហគ្រាសខ្នាតតូច និងមធ្យមជំរុញអភិវឌ្ឍន៍កសិផលមានសណ្ដែកសៀង កៅស៊ូ ពោត ល្ង នៅឃុំតាអុង ស្រុកចំការលើ ខេត្ដកំពង់ចាម ដែលអនុវត្ដដោយធនាគារអភិវឌ្ឍន៍ជនបទ តាមអនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងដោយមានការគាំទ្រយ៉ាងខ្លាំងក្លាពីលោកឧបនាយករដ្ឋមន្ដ្រីរដ្ឋមន្ដ្រី ក្រសួងសេដ្ឋកិច្ច និងហិរញ្ញវត្ថុ ត្រូវបានក្រុមប្រឹក្សាភិបាលជាន់ខ្ពស់របស់សមាគមនៃគ្រឹះស្ថានអភិវឌ្ឍន៍ហិរញវត្ថុតំបន់អាស៊ី-ប៉ាស៊ីហ្វិក (ADFIAP) វាយតំលៃ និងសំរេចផ្ដល់រង្វាន់ជ័យលាភីដល់ធនាគារអភិវឌ្ឍន៍ជនបទ សម្រាប់ឆ្នាំ២០១០ នេះ ។
ពិធីប្រគល់ និងទទួលរង្វាន់ជ័យលាភីលើកទី៣នេះ បានប្រារឰឡើងកាលពីថ្ងៃទី ១០ ឧសភា ឆ្នាំ២០១០ ក្នុងឱកាសនៃកិច្ចប្រជុំប្រចាំឆ្នាំលើកទី៣៣ របស់សមាគមនៃគ្រឹះស្ថានអភិវឌ្ឍន៍ហិរញវត្ថុតំបន់អាស៊ី-ប៉ាស៊ីហ្វិក (ADFIAP) នៅទីក្រុងវ៉ាន់គូវែ ប្រទេសកាណាដា ដែលមានសមាជិកចូលរួមជាតំណាងគ្រឹះស្ថានហិរញ្ញវត្ថុ និងធនាគារ ចំនួន១១៧មកពី៤២ប្រទេស និងក្រោមអធិបតីភាពដ៏ខ្ពង់ខ្ពស់របស់លោក Colin Hansen រដ្ឋមន្ដ្រីក្រសួងហិរញ្ញវត្ថុ និងជាអភិបាលរងទី១ខេត្ដ British Colombia ប្រទេសកាណាដា ។
ក្រុមប្រឹក្សាជាន់ខ្ពស់សមាគមនៃគ្រឹះស្ថានអភិវឌ្ឍន៍ហិរញវត្ថុអាស៊ី-ប៉ាស៊ីហ្វិក (ADFIAP) បានវាយតំលៃខ្ពស់ចំពោះការ ខិតខំប្រឹងប្រែងរបស់ធនាគារអភិវឌ្ឍន៍ជនបទកម្ពុជា ទោះបីជាធនាគារអភិវឌ្ឍន៍ជនបទជាធនាគារតូចជាងគេនៅក្នុងតំបន់ ប៉ុន្ដែបានដើរតួនាទីជាយន្ដការរបស់រាជរដ្ឋាភិបាល ក្នុងការអនុវត្ដការផ្ដល់ឥណទានគាំទ្រដល់គម្រោងជាច្រើនប្រកបដោយជោគជ័យ និង មានប្រសិទ្ធភាពចូលរួមដល់ការអភិវឌ្ឍន៍សេដ្ឋកិច្ចជនបទ រហូតមានការវាយតំលៃ និងសំរេចផ្ដល់រង្វាន់ជ័យលាភីប្រចាំឆ្នាំ២០១០ ដល់ធនាគារអភិវឌ្ឍន៍ជនបទកម្ពុជា ដែលទទួលដោយលោកសុន គន្ធរ ទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងជាប្រធានអគ្គនាយកធនាគារអភិវឌ្ឍន៍ជនបទកាលពីថ្ងៃទី១០ ឧសភា ឆ្នាំ ២០១០ នៅទីក្រុងវ៉ាន់គូវែ ប្រទេសកាណាដា ។
នៅក្នុងឱកាសនោះលោកសុន គន្ធរ ត្រូវបានស្នើឱ្យធ្វើបទបង្ហាញស្ដីពីការអនុវត្ដន៍ល្អប្រសើរលើវិស័យមីក្រូហិរញវត្ថុនៅកម្ពុជា ។ នេះជាមោទនភាពដ៏ធំធេងជាលើកទី៣ របស់ធនាគារអភិវឌ្ឍន៍ជនបទ ដែលបានអនុវត្ដនូវគំរោងតាមអនុសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន និងមានការគាំទ្រពីលោកឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ព្រមទាំងលោកប្រធានក្រុមប្រឹក្សាអភិវឌ្ឍន៍សេដ្ឋកិច្ចជាតិផងដែរ ។
