ក្រុងប៉ោយប៉ែត ៖ ច្រករបៀងមួយចំនួនតាមបន្ទាត់ព្រំដែនស្រុក២ គឺស្រុកអូរជ្រៅ និងស្វាយចេក ឈមនឹងស្រុក២របស់សៀមគឺស្រុកគោកធ្យូង និងស្រុកតាបប្រាយ៉ា ខេត្តស្រះកែវ ត្រូវបានភាគីសៀមបិទ ដោយហាមមិនឱ្យប្រជាពលរដ្ឋឆ្លងទៅមកនោះទេ កាលពីថ្ងៃទី២៥ មិថុនា ២០១១ ។ ច្រករបៀងទាំង២ស្រុក ដែលភាគីសៀមបិទមិនឱ្យឆ្លងទៅមកនោះ រួមមានច្រកភូមិជោគជ័យ ច្រកអូរបីជាន់ ច្រកតំបន់៥ និងច្រកចំការគ។
ច្រកទាំងអស់ខាងលើនេះ ច្រកជោគជ័យ ច្រកអូរបីជាន់ និងច្រកតំបន់៥ ស្ថិតក្នុងស្រុកអូរជ្រៅ និងច្រកចំការគ ស្ថិតក្នុងស្រុកស្វាយចេក ។ ការបិទច្រកទាំងអស់ខាងលើ គឺភាគីសៀមតម្រូវឱ្យបិទតាំងពីម៉ោង៧ព្រឹក រហូតម៉ោង៥ល្ងាច ទើបគេបើកឱ្យដំណើរការវិញ ដោយប្រាប់ថា មេទ័ពរបស់ពួកគេចុះមកតាមបន្ទាត់ព្រំដែន ។ ទោះបីជាបែបណា ច្រកមួយដាច់ដោយឡែក គឺច្រកចំការគ ស្ថិតក្នុងភូមិចំការគ ឃុំស្វាយចេក ស្រុកស្វាយចេក ត្រូវបានភាគីសៀមបិទមិនឱ្យឆ្លងទៅមកជាងមួយសប្តាហ៍ហើយ ដោយពុំដឹងពីមូលហេតុច្បាស់លាស់នោះទេ ។
តាមប្រភពព័ត៌មានពីប្រជាពលរដ្ឋនៅភូមិចំការគ ក៏ដូចជាយោធាជួរមុខឈរជើងនៅចំណុចនោះបានប្រាប់ថា ការបិទច្រករបៀងនៅច្រកចំការគនោះអាចបណ្តាលមកពីជម្លោះរឿងដីដាំដំឡូងមួយកន្លែងជាប់បន្ទាត់ព្រំដែនក្នុងភូមិកើតហេតុ ដែលប្រជាពលរដ្ឋមួយគ្រួសារបានធ្វើការភ្ជួរដីរបស់ខ្លួនដាំដំឡូង ហើយត្រូវកម្លាំងជួរមុខសៀមនៅភូមិទ័ពសៀម ឃុំតាប់ប្រាយ៉ា ស្រុកតាបប្រាយ៉ា ខេត្តស្រះកែវ ចោទថា ការដាំនោះចូលដីរបស់គេ ហើយក៏បានតម្រូវឱ្យភាគីខ្មែរយើងដកដំឡូងមីនោះចេញទៀតផង ប៉ុន្តែភាគីខ្មែរមិនព្រម ព្រោះអាងថា ដីចំណុចនោះជាដីរបស់ខ្មែរ ។ ព្រោះតែខ្លាចសកម្មភាពកងទ័ពរបស់សៀមមកដកដំឡូង និងដោយសភាពការណ៍ព្រំដែនត្រូវពង្រឹងការប្រុងប្រយ័ត្នមុនពេលដែលប្រទេសសៀមឈានដល់ការបោះឆ្នោតនាពេលឆាប់ៗនេះ គេឃើញកម្លាំងយោធាកម្ពុជាយើងបានប្រុងជើងការខ្ពស់ពិសេសចំណុចកើតហេតុតែម្តង ៕
ចែករំលែកព័តមាននេះ