អាជ្ញាធរបដិសេធចំណុចខ្លះនៃសំណង់ការពារទឹកជំនន់របស់ជប៉ុន ខណៈសាងសង់រួច
narinchin
ថ្ងៃ សុក្រ ទី ១៩ ខែ មិនា ឆ្នាំ ២០១០
កោះសន្តិភាព
លោក កែប ជុតិមា អញ្ជើញទៅពិនិត្យមើលប្រព័ន្ធលូ
រាជធានីភ្នំពេញ ៖ ក្នុងឱកាសអញ្ជើញទៅពិនិត្យការដ្ឋានសំណង់គំរោងការពារទឹកជំនន់ និងកែលំអប្រពន្ធប្រឡាយ-លូក្នុងរាជធានីភ្នំពេញជំហានទី២ ក្រោមជំនួយឥតសំណងរបស់រាជរដ្ឋាភិបាលជប៉ុន នាព្រឹកថ្ងៃ ទី១៩ មីនា លោកកែប ជុតិមា អភិបាលរាជធានីភ្នំពេញ បានធ្វើការបដិសេធមិនទទួលយកចំណុចខ្លះរបស់សំណង់នេះដែលខុសលក្ខណៈបច្ចេកទេស ពាក់ព័ន្ធទៅនឹងការបង្ហូរទឹកសំអុយយ៉ាងខ្មៅងងឹតចូលក្នុងទន្លេដែលពុំមានសំណង់ស្ទាក់ត្រឹមត្រូវ បង្កឱ្យប៉ះពាល់ដល់បរិស្ថានទន្លេសាប គឺតម្រូវឱ្យធ្វើការកែលំអឡើងវិញ ទើបអាចទទួលយកបាន ។
គំរោងការពារទឹកជំនន់ និងកែលំអមានប្រព័ន្ធប្រឡាយ-លូ ជំហានទី២ក្នុងរាជធានីភ្នំពេញនេះ ត្រូវបានបញ្ចប់ជាស្ថាពរហើយដោយមានស្ថានីយបូមទឹក និងអាងស្ដុកទឹកចំនួន៤កន្លែង ចាប់ពីមុខផ្សារចាស់ ដល់សាលសន្និសីទចតុមុខ។ ការកែលំអច្រាំងទន្លេ និង ប្រព័ន្ធលូដែលមានវិសាលភាពចាប់ពីតំបន់ជុំវិញវត្ដភ្នំ ផ្សារធំថ្មី ព្រះបរមរាជវាំង សារមន្ទីរជាតិ និងសំណង់ស្ទាក់ទឹកផងដែរ ដែលគំរោងនេះបានចាប់ផ្ដើមដំណើរការកាលពីខែតុលា ឆ្នាំ២០០៧កន្លងមក ពេលនេះបានរួចរាល់ ហើយនិងត្រូវត្រៀមសម្ពោធក្នុងខែកញ្ញា ឆ្នាំ ២០១០ខាងមុខនេះ ។
លោកកែប ជុតិមា បានឱ្យដឹងថា គំរោងការពារទឹកជំនន់ខាងលើនេះ ផ្ដោតសំខាន់ទៅលើប្រព័ន្ធទឹកស្អុយដែលប្រជាពលរដ្ឋប្រើប្រាស់រួចឱ្យហូរទៅតាមប្រឡាយ-លូបឹង ត្របែក និងបឹងទំពុន ហើយគំរោងនេះត្រូវបានបញ្ចប់ដោយគ្រោងអញ្ជើញសម្ដេចតេជោនាយករដ្ឋមន្ដ្រី ដើម្បីធ្វើពិធីសម្ពោធ និងប្រគល់ទទួលក្នុងពេលឆាប់ៗនេះ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្ដិភាព ។