ទាហានថៃជាច្រើនរយនាក់ចូលលុកលុយប្រាសាទតាមាន់ធំម្ដងទៀតខណៈសម្ដេចតេជោស្ថិតនៅក្បែរនោះ
narin
ថ្ងៃ ច័ន្ទ ទី ៨ ខែ កុម្ភៈ ឆ្នាំ ២០១០
កោះសន្តិភាព
ទិដ្ឋភាពនៅប្រាសាទតាមាន់ធំ
ទាហានឈុតខ្មៅ និងប៉ារ៉ារបស់ថៃជាច្រើនរយនាក់ បានរុលចូលមកឈរជើងនៅលើបរិវេណប្រាសាទតាមាន់ធំ ស្ថិតក្នុងស្រុកបន្ទាយអំពិល ខេត្ដឧត្ដរមានជ័យ នាព្រឹកថ្ងៃទី៨ កុម្ភៈ បង្កឱ្យមានភាពតានតឹងផ្នែកយោធាមួយកំរិតទៀត បន្ទាប់ពីបានធូរស្រាលកាល ពីប៉ុន្មានថ្ងៃមុន ។
ការមកឈរជើងរបស់ទាហានឈ្លានពានថៃលើកនេះ មានដំឡើងកាំភ្លើងធំជាច្រើនដើម និងកាំភ្លើងតូចគ្រប់ៗដៃ ហាក់ដូចជា មកបង្កជម្លោះនិងត្រៀមប្រយុទ្ធ ខណៈ ដែលទាហានកម្ពុជាមិនទាន់មានចំណាត់ការបែបណានៅឡើយទេ ប៉ុន្ដែបានពង្រាយកំលាំងត្រៀមនៅខាងក្រោមប្រាសាទ ដើម្បីប្រឆាំងនឹងទាហានឈ្លានពានរបស់ថៃវិញ ដោយគ្រាន់តែនៅរង់ចាំបញ្ជាពីមេប៉ុណ្ណោះ ។
សូមបញ្ជាក់ថា ការដាក់ទាហានឈ្លានពានរបស់ថៃមកក្នុងប្រាសាទតាមាន់ធំនេះ គឺស្របពេលគ្នានឹងសម្ដេចតេជោ ហ៊ុន សែន និងលោកជំទាវ ព្រមទាំងប្រតិភូរាជរដ្ឋាភិបាលអញ្ជើញជាអធិបតីក្នុងពិធីសម្ពោធបញ្ជាការដ្ឋានវរសេនាតូចលេខ៤២២ ចម្ងាយប្រមាណជាង៣គីឡូម៉ែត្រពីប្រាសាទតាមាន់ធំប៉ុណ្ណោះ ហើយពេលនេះទៀតសោត មេបញ្ជាការកងទ័ពកម្ពុជាជាច្រើននាក់រវល់ជួបបដិសណ្ឋារកិច្ចដល់សម្ដេចតេជោ មិនទាន់បានដោះស្រាយរឿងនេះយ៉ាងណានៅឡើយទេ ៕