ខេត្តតាកែវ ៖ សាច់មាន់ខូចគុណភាពចំនួន ២៥០គីឡូក្រាម និងក្បាលត្រីប្រាប្រឡាក់ដែលអាជីវករលួចលាក់បង្កប់នៅក្នុងបន្លែផ្លែឈើនាំចូលពីស្រុកយួនតាមច្រកទ្វារអន្តរជាតិភ្នំដិនត្រូវមន្ត្រីកាំកុងត្រូលឃាត់ទុកជាបន្តបន្ទាប់ រួចយកទៅកំទេចចោលកាលពីថ្ងៃទី១៦ មិថុនា នៅខាងជើងច្រកទ្វារអន្តរជាតិ ។
លោកពៅ បូផា អនុប្រធានសាខាកាំកុងត្រូលខេត្ត និងជាអនុប្រធានស្នាក់ការកាំកុងត្រូលច្រកទ្វារអន្តរជាតិភ្នំដិនឱ្យដឹងថា អនុវត្តតាមបទបញ្ជារបស់លោកអគ្គនាយកនៃនាយកដ្ឋាន កាំកុងត្រូល សាខាកាំកុងត្រូលខេត្ត ក៏ដូចជាស្នាក់ការច្រកទ្វារអន្តរជាតិភ្នំដិនបានយកចិត្តទុកត្រួតពិនិត្យមុខទំនិញនៅតាមទីផ្សារនានានៅក្នុងខេត្តដែលក្រុមឈ្មួញមួយក្តាប់តូចចេះតែលួចបន្តនាំចូលមកពីប្រទេសជិតខាងយកទៅលក់នៅតាមផ្សារឱ្យប្រជាពលរដ្ឋយើងទិញយកមកធ្វើម្ហូបទទួលទានដែលបញ្ហា នេះវាបានប៉ះពាល់ដល់សុខភាពប្រជាពលរដ្ឋ។
លោកពៅ បូផា បន្តទៀតថា ដោយសារតម្លៃសាច់មាន់ សាច់ជ្រូក នៅក្នុងស្រុកមានតម្លៃខ្ពស់នោះធ្វើឱ្យក្រុមអាជីវករដែលនាំចូលទំនិញពីវៀតណាមតែងតែបង្កប់មុខទំនិញខូចគុណភាពចូលមកតាមចក្រទ្វារអន្តរជាតិ តែត្រូវកម្លាំងជំនាញចាប់បានជាបន្តបន្ទាប់ ។ រយៈពេល២ថ្ងៃ គឺថ្ងៃទី១៥ និង១៦ មិថុនា កម្លាំងជំនាញយើងដែលមានកិច្ចសហការពីលោកប្រធានស្នាក់ការត្រួតពិនិត្យគយ និងប៉ូលិសសេដ្ឋកិច្ចនោះចាប់សាច់មាន់ដែលបង្កប់ក្នុងទំនិញនាំចូលមានសាច់មាន់ដែលកាប់រួចមានជាតិគីមីចំនួន២៥០គីឡូក្រាម និងក្បាលត្រីប្រាប្រឡាក់ចំនួន៣០គីឡូហើយយើងនឹងដុតកំទេចចោល ។ ចំពោះការចាប់ឃាត់បានសាច់មាន់ខូចគុណភាពនាំចូលពីវៀតណាមនេះមិនមានការចូលរួមពីពេទ្យសត្វនៅទីនោះឡើយ ។ ទោះបីជាបែបណា មិនមានរបាយការណ៍ពីការចាប់ឈ្មួញនាំចូលល្មើសច្បាប់ផាកពិន័យ ឬចាត់វិធានការតាមផ្លូវច្បាប់ឡើយ ៕
ចែករំលែកព័តមាននេះ