អាជ្ញាធរខណ្ឌ និងសង្កាត់ប្រមូលកំលាំងដាំកូនឈើអមប្រឡាយស្ថានីយបូមទឹក
ដោយ ៖ អប្សរា
ថ្ងៃសុក្រ ទី៦ ខែសីហា ឆ្នាំ២០១០ ម៉ោង ១៤:២០
ចោមចៅ
ដាំកូនឈើអមប្រឡាយស្ថានីយបូមទឹក
រាជធានីភ្នំពេញ ៖ អាជ្ញាធរខណ្ឌដង្កោ ដឹកនាំដោយលោកអភិបាលរង ហែម ដារិទ្ធិ បានប្រមូលកំលាំងអាជ្ញាធរសង្កាត់ទាំង១៥របស់ខណ្ឌ ចុះដាំដើមឈើអមប្រឡាយស្ថានីយបូមទឹកទំនប់កប់ស្រូវ ទៅតាមផែនការរបស់សាលា រាជធានីភ្នំពេញដាក់ចុះ ។ ពិធីដាំដើមឈើនោះ បានប្រព្រឹត្ដទៅកាលពីព្រឹកថ្ងៃទី៥ សីហា ឆ្នាំ ២០១០ តាមបណ្ដោយប្រឡាយស្ថានីយបូមទឹកទំនប់កប់ស្រូវ សង្កាត់ឃ្មួញ ខណ្ឌសែនសុខ ។ អញ្ជើញចូលរួមនាឱកាសនោះដែរ មានលោក អ៊ុន វណ្ណារិទ្ធិ នាយរងសង្កាត់រដ្ឋបាលព្រៃឈើភ្នំពេញ ព្រមទាំងសហការី និងអាជ្ញាធរសង្កាត់ ទាំង១៥របស់ខណ្ឌដង្កោផងដែរ ។
លោកហែម ដារិទ្ធិ អភិបាលរងខណ្ឌដង្កោ បានថ្លែងឱ្យដឹងថា ការដាំដើមឈើនាពេលនេះ គឺធ្វើឡើងអមប្រឡាយស្ថានីយបូមទឹកកប់ស្រូវទៅតាមផែនការរបស់សាលារាជធានី ដើម្បីសោភ័ណភាពប្រឡាយ និងរក្សាបរិស្ថាន ព្រម ទាំងដើម្បីអបអរសាទររុក្ខទិវា៩ កក្កដា ទៀតផង ។ លោកបានថ្លែងបន្ដទៀតថា តាមផែនការរបស់សាលារាជធានី គឺតំរូវឱ្យខណ្ឌទាំង៨ដាំដើមឈើអមប្រឡាយដែលមានប្រវែងជិត១០គីឡូម៉ែត្រ ។ ដោយឡែកសាលាខណ្ឌដង្កោ ទទួលដាំប្រវែង១.៨៧៥ម៉ែត្រ ហើយដើមឈើ ដែលត្រូវដាំនោះមាន ចំនួនសរុប៧៥៣ដើម ក្នុងនោះមានប្រភេទដើមលឿងរាជ ចំនួន ២៥១ដើម ស្ដៅចំនួន២៥១ដើម និងដើមគ្រាប់ បែកចំនួន២៥១ដើម។
លោកហែម ដារិទ្ធិ បានបន្ដទៀតថា ដើមឈើទាំងអស់នោះ គឺជាការឧបត្ថម្ភរបស់សង្កាត់ រដ្ឋបាលព្រៃឈើភ្នំពេញ ហើយក៏មានមន្ដ្រីរដ្ឋ បាលព្រៃឈើខាងលើជួយណែនាំពីបច្ចេកទេស ក្នុងការដាំដោយផ្ទាល់ផងដែរ ។ ដើមឈើទាំងនោះ ត្រូវដាំចន្លោះពី១ដើមទៅ១ដើម ប្រវែង៥ ម៉ែត្រពីគ្នាមិនឱ្យញឹកពេក និងមិនឱ្យរង្វើលពេកនោះឡើយ ។ ម្យ៉ាងទៀតក្រោយពេលដាំរួច លោកនឹងចាត់កំលាំងត្រួតពិនិត្យដើមឈើទាំងនោះ ដើម្បីឱ្យដឹងថា ដើមណាងាប់ និងដើមណា នៅរស់ បើសិនមានងាប់នឹងត្រូវយកដើមឈើថ្មី ទៅដាំជំនួសវិញ ។
តាមផែនការសាលារាជធានី ក្រៅពីខណ្ឌដង្កោនៅមានខណ្ឌចំនួន៧ទៀត ដែលត្រូវដាំដើមឈើអមប្រឡាយនោះ គឺខណ្ឌសែនសុខ ទទួលខុសត្រូវដាំ៣៦០ម៉ែត្រ ខណ្ឌ៧មករាប្រវែង៧៥៧ម៉ែត្រ ខណ្ឌឫស្សីកែវ ប្រវែង១.៧០៣ម៉ែត្រ ខណ្ឌដូនពេញប្រវែង ១.៣២០ម៉ែត្រ ខណ្ឌទួលគោកប្រវែង១.២០០ ម៉ែត្រ ខណ្ឌមានជ័យប្រវែង៧៥៧ម៉ែត្រ និងខណ្ឌចំការមនប្រវែង១.២៣៧ម៉ែត្រ ។ លោកអ៊ុន វណ្ណារិទ្ធិ នាយរងសង្កាត់រដ្ឋបាល ព្រៃឈើភ្នំពេញ បានថ្លែងថា កូនឈើដែលត្រូវចំណាយដាំអមប្រឡាយនាពេលនេះ មានចំនួនសរុប១១.០០០ដើម គឺសង្កាត់រដ្ឋបាលព្រៃឈើភ្នំពេញ ឧបត្ថម្ភជូនសាលារាជធានីភ្នំពេញ ដើម្បីបែងចែកទៅតាមខណ្ឌនីមួយៗសំរាប់ដាំ អមប្រឡាយស្ថានីយបូមទឹកខាងលើ ដើម្បីរក្សាសោភ័ណភាពប្រឡាយបង្កើតឱ្យមានបរិស្ថានល្អ មិនតែប៉ុណ្ណោះដើមឈើផ្ដល់ផល ប្រយោជន៍ខ្លាំងណាស់ សំរាប់មនុស្សយើងទាំងអស់គ្នា ៕
