រាជធានីភ្នំពេញ ៖ សេចក្តីរាយការណ៍ឱ្យដឹងថា បុរសជនជាតិចិនដែលរងរបួសក្នុងហេតុការណ៍ភ្លើងឆេះនៅក្នុងបន្ទប់ជួលកាលពីម្សិលមិញនោះ នៅព្រឹកថ្ងៃទី២១ មិថុនា នេះ បានបាត់បង់ជីវិតហើយ នៅឯមន្ទីរកាល់ម៉ែត ព្រោះតែស្ថានភាពធ្ងន់ធ្ងរពេក ។ ដោយឡែកស្ត្រីជាប្រពន្ធខ្មែរដែលរងរបួសធ្ងន់ កំពុងសម្រាកព្យាបាលនៅឯមន្ទីរពេទ្យមិត្តភាពខ្មែរ-សូវៀត ដោយនៅមិនទាន់ដឹងលទ្ធផលយ៉ាងណាដែរ គ្រាន់តែស្ថានភាពរបួសក៏ធ្ងន់ធ្ងរដូចគ្នា ។
ប្រភពឱ្យដឹងថា បុរសជនជាតិចិនដែលស្លាប់ខាងលើ មានឈ្មោះម៉ាយ សាវហ្វ័ន អាយុ៥១ឆ្នាំ ជាពាណិជ្ជកររកស៊ីក្នុងស្រុកខ្មែរ ។ រីឯប្រពន្ធខ្មែរឈ្មោះស៊ឹម សំណាង អាយុ២៧ឆ្នាំ មានស្រុកកំណើត ។
យោងតាមរបាយការណ៍សមត្ថកិច្ចឱ្យដឹងដែរថា ករណីអគ្គិភ័យនៅបន្ទប់ជួលគឺបានកើតឡើង កាលពីវេលាថ្ងៃត្រង់ថ្ងៃទី២០ មិថុនា ស្ថិតនៅផ្ទះលេខ៣៧ ផ្លូវលេខ៣០០ ក្រុមទី៥៤ ក្នុងសង្កាត់បឹងកេងកងទី១ ខណ្ឌចំការមន ។
ទាំងប្តីប្រពន្ធខាងលើ គឺមានទំនាក់ទំនងស្នេហានឹងគ្នារយៈពេល៣ឆ្នាំមកហើយ ដោយបាននាំគ្នាមកជួលផ្ទះខាងលើ (ផ្ទះឆេះ) ស្នាក់នៅ ។ ការទំនាក់ទំនងរួមរស់រវាងអ្នកទាំង២ គឺមិនចុះសម្រុងគ្នាទេ តែងតែឈ្លោះគ្នាផ្អើលគេផ្អើលឯង ។ កន្លងមក ត្រូវគេដឹងថា បុរសចិនឈ្មោះសាវហ្វ័ននេះ សុំបែកគ្នាជាមួយនារីជាប្រពន្ធខ្មែរនោះ ។ ស្រាប់តែនៅវេលាកើតហេតុ ឃើញស្ត្រីជាប្រពន្ធបានទិញសាំងមកផ្ទះជួលខាងលើនោះ មួយសន្ទុះក៏កើតភ្លើងឆេះបន្ទប់ឆេះទាំងទាំងប្តី និងប្រពន្ធតែម្តង ។
ចែករំលែកព័តមាននេះ