រាជធានីភ្នំពេញ ៖ នារីជាកម្មការិនីម្នាក់ ទៅលេងផ្ទះបងស្រី មិនបានជួបអត់មានលុយជិះម៉ូតូឌុបត្រលប់ទៅផ្ទះ វិញ បានដើរត្រលប់ទៅវិញ ជួបបុរសចំណាស់ជាអ្នកបើករ៉ឺម៉កលក់គ្រឿងក្លែម ក៏ហៅជិះជាមួយ ហើយប្រាប់ថាគាត់ចង់ស្រឡាញ់នាងដែរ តែរូបគាត់ចាស់ពេក លុះដល់គោលដៅ ហើយបែរជាអ្នកលក់គ្រឿងក្លែម មិនព្រមឈប់ដាក់នាងចុះ ធ្វើឲ្យនាងភ័យបានលោតចុះពីលើរ៉ឺម៉ករត់ទៅឲ្យគេជួយ បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ ថ្ងៃទី២០ ខែមិថុនា ឆ្នាំ២០១៧ ត្រង់ចំណុចស្ពានអាកាស៧មករា ស្ថិតតាមបណ្តោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
បើតាមសម្តីខាងនារីវ័យក្មេងមានឈ្មោះ ចក់ នី អាយុ១៧ឆ្នាំ មុខរបរកម្មការិនីរោងចក្រ ស្នាក់នៅផ្ទះជួលនៅម្តុំព្រែកលៀប សង្កាត់ព្រែកលៀប ខណ្ឌជ្រោយចង្វារ បានឲ្យដឹងថា កាលពីវេលាម៉ោង០៣រសៀល ថ្ងៃទី២០ ខែមិថុនា នេះ នាងបានជិះម៉ូតូឌុបចេញពីបន្ទប់ជួលរបស់នាងនៅម្តុំព្រែកលៀប គោលបំណងទៅលេងផ្ទះបងស្រីនៅម្តុំចោមចៅ សង្កាត់ចោមចៅ ខណ្ឌពោធិ៍សែនជ័យ ខណៈពេលនាងទៅដល់ផ្ទះបងស្រី តែគាត់មិននៅផ្ទះ នាងក៏អង្គុយចាំដល់ម៉ោង០៦ព្រលប់ថ្ងៃដដែល បងស្រីនៅតែមិនឃើញត្រលប់មកផ្ទះវិញ ដោយសារតែនៅក្នុងខ្លួនរបស់នាងគ្មានលុយជិះម៉ូតូឌុបត្រលប់មកផ្ទះវិញ ហើយលេខទូរស័ព្ទរបស់បងស្រីក៏មិនស្គាល់ទៀត នាងក៏សម្រេចចិត្តដើរត្រលប់ទៅផ្ទះជួលនៅឯព្រែកលៀបវិញ ខណៈពេលដើរមកដល់មុខអាកាសយាន្តដ្ឋានអន្តរជាតិភ្នំពេញ ស្រាប់តែបានជួប នឹងរ៉ឺម៉កលក់គ្រឿងក្លែមមួយគ្រឿង បើកបរដោយបុរសម្នាក់តាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត បានហៅនាងឲ្យជិះរ៉ឺម៉កជាមួយ ពេលនោះនាងក៏បានសួរថាអុំទៅដល់ណា គាត់និយាយថាទៅដល់ស្ពានអាកាស៧មករា នាងក៏ព្រមឡើងជិះរ៉ឺម៉កទៅ ខណៈពេលដែលកំពុងតែជិះបណ្តើរនិយាយគ្នាបណ្ដើរ បុរសជាអ្នកលក់គ្រឿងក្លែមបាននិយាយថាគាត់ចង់ស្រឡាញ់នាងដែរ តែគាត់មិនហ៊ានទេ ព្រោះគាត់ចាស់ហើយ នាងក៏មិននិយាយអ្វីដែរ ព្រោះគិតថាគាត់និយាយលេង លុះមកដល់ចំណុចស្ពានអាកាស៧មករា នាងបានសុំឲ្យគាត់ឈប់ តែគាត់មិនព្រមឈប់ នាងភ័យខ្លាចក្រែងគាត់មានបំណងមិនល្អ ក៏លោតចុះពីលើរ៉ឺម៉ករត់ទៅឲ្យគេជួយ បង្កឲ្យមានការភ្ញាក់ផ្អើលតែម្ដង ។
ចំណែកបុរសជាអ្នកបើករឺម៉កលក់គ្រឿងក្លែមបានឲ្យដឹងថា ខណៈពេលបើកមកដល់ស្ពានអាកាស៧មករា នាងឲ្យគាត់ឈប់ គាត់មិនឈប់មិនមែនគាត់មានបំណងមិនល្អនោះទេ ព្រោះតែនាងបាននិយាយថានាងជួយចេញថ្លៃសាំងចំនួនកន្លះលីត្រ តែមិនឃើញនាងឲ្យគាត់ ក៏មិនឈប់ទៅ ។ បន្ទាប់ពីមានការភ្ញាក់ផ្អើល សមត្ថកិច្ចមូលដ្ឋានបានមកដល់កន្លែងកើតហេតុ តែដោយភាគីខាងនារីមិនបានដាក់ពាក្យបណ្តឹង ហើយភាគីរ៉ឺម៉កលក់គ្រឿងក្លែម ព្រោះមិនបានប៉ះពាល់អ្វីគ្នានោះទេ ក្រោយមកភាគីរ៉ឺម៉កក៏បានជិះចេញពីកន្លែងកើតហេតុបាត់ទៅ ចំណែកភាគីខាងនារី ដោយអ្នកឃើញហេតុការណ៌អាណិតអាសូរ បានជួយជូនត្រលប់ទៅផ្ទះវិញ ៕
ចែករំលែកព័តមាននេះ