ប្រមុខរបបយោធាភូមាទៅបំពេញទស្សនកិច្ចនៅចិន
ដោយ ៖ ប្រុសកោះ
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៥:១៥
គេហទំព័របរទេស
ប្រមុខយោធាភូមា ពេលទៅដល់ប៉េកាំង
ក្រោយការជួបពិភាក្សាគ្នារយៈពេលមួយម៉ោងក្នុងវិមានប្រជាជនក្រុងប៉េកាំង ប្រធានាធិបតីចិន លោកហ៊ូជីន តាវ និងប្រមុខរបបយោធាមីយ៉ាន់ម៉ា (ភូមា) ឧត្តមសេនីយ៍ថាន់ស្វេ បានឈានដល់កុងសង់ស៊ុលមួយ ។ ប្រទេសទាំង២បានព្រមព្រៀងគ្នាកាលពីថ្ងៃទី៨ កញ្ញា ឆ្លៀតឱកាសខួបគំរប់៦០ឆ្នាំ នៃការបង្កើតទំនាក់ទំនងការទូតជាមួយគ្នា ដើម្បីពង្រឹងមិត្តភាពជាប្រពៃណី ហើយពង្រឹងកិច្ចសហប្រតិបត្តិការក្នុងវិស័យសំខាន់ៗ ដូចជា ថាមពល និងការកសាងហេដ្ឋារចនាសម្ព័ន្ធជាដើម ។
លោកហ៊ូជីន តាវ មានប្រសាសន៍ថា ទំនាក់ទំនងទ្វេភាគីរវាងប្រទេសទាំង២ មានការពង្រឹង និងពង្រីកចាប់តាំងពីដើមមក ហើយនោះជាគំរូមួយសំរាប់ទំនាក់ទំនងមិត្តភាពរវាងបណ្តាប្រទេសដែលមានប្រព័ន្ធសង្គមខុសគ្នា ។ ដោយសំដែងការអបអរសាទរចំពោះការពង្រីកទំនាក់ទំនងរវាងប្រទេសទាំង២ ឧត្តមសេនីយ៍ថាន់ស្វេ គូសបញ្ជាក់ថា ភាគីទាំង២បានជួយទ្រទ្រង់គ្នា និងយោគយល់គ្នាទៅវិញទៅមក រយៈពេលជាច្រើនឆ្នាំមកហើយ ។ លោកបានរៀបរាប់ពីមិត្តភាព និងការពង្រឹងទំនុកចិត្ត ព្រមទាំងការផ្លាស់ប្តូរទស្សនកិច្ចគ្នាកំរិតខ្ពស់ជាញឹកញាប់ និងការពង្រីកយ៉ាងឆាប់រហ័សនៃកិច្ចសហប្រតិបត្តិការដែលមានផលប្រយោជន៍ទៅវិញទៅមកក្នុងវិស័យផ្សេងៗ ៕
