រាជធានីភ្នំពេញ ៖ លោកញ៉ែម សុគន្ធ ក្នុងវ័យ២៨ឆ្នាំ ជាអតីតហ្វ្រេស៊ីប៊យ ជំនាន់ដំបូងក្នុងអំឡុងឆ្នាំ២០០២-២០០៣ ហើយបានក្លាយជាតារាភាពយន្ត និងតារាសំដែងកាយវិការខារ៉ាអូខេ។ កន្លងមកលោកធ្លាប់បង្ហាញមុខតាមកញ្ចក់ទូរទស្សន៍នានាដែលចាក់ផ្សាយវីដេអូភាគ និងក្នុងកម្មវិធីប្រគំតន្ត្រីចុងសប្តាហ៍របស់ស្ថានីយទូរទស្សន៍នានា។ លោកញ៉ែម សុគន្ធ ជាតារាសំដែងមានទេពកោសល្យ និងមានការគាំទ្រពីប្រិយមិត្តទស្សនិកជនទាំងក្នុង និងក្រៅប្រទេសជាច្រើន។ លោកធ្លាប់ចូលរួមសំដែងភាពយន្ត-វីដេអូប្រមាណជាង៣០រឿង ក្នុងនោះភាគច្រើនសំដែងជាតួឯក។ ចុងក្រោយនេះ លោកកំពុងសំដែងក្នុងរឿង “ហង្សអន្ទាក់ស្នេហ៍”។
លោកញ៉ែម សុគន្ធ ឱ្យដឹងថា កន្លងមកលោកធ្លាប់ចេញទៅច្រៀងនៅសហរដ្ឋអាមេរិក បារាំង កាណាដា និងអូស្ត្រាលីជាដើម។ ទោះជាយ៉ាងណាក្តី ពេលនេះលោកបែរជាចង់លាឈប់ពីអាជីពសិល្បៈ ដោយលោកយល់ថា ការចាប់អាជីពសិល្បៈល្បីឈ្មោះបោះសំលេងដូចស្គរ តែខាងក្នុងគ្មានអ្វីទេ ម៉្លោះហើយលោកចង់ងាកទៅរកមុខរបររកស៊ីវិញម្តង។ តារារូបនេះនៅពេលជួបជាមួយអ្នកយកព័ត៌មានព្យាយាមគេចមុខ ដោយនិយាយថា “លោកមិនចង់សំភាសន៍ មិនចង់ល្បីអ្វីទេ ហើយក្រោយពីសំដែងរឿង “ហង្សអន្ទាក់ស្នេហ៍” ចប់លោកនឹងលាឈប់ពីសិល្បៈហើយ”។ លោកនិយាយបែបនេះបង្ហាញថា លោកឆ្អែតឆ្អន់នឹងអាជីពសិល្បៈដោយសារវាមិនលើកស្ទួយជីវភាពរបស់លោកឱ្យថ្កុំថ្កើង តែផ្ទុយទៅវិញមានអ្នកសិល្បៈជាច្រើនធូរធារដោយសារអាជីពនេះ។
សព្វថ្ងៃនេះលោកញ៉ែម សុគន្ធ ធ្វើជាអ្នកដឹកនាំតារាសំដែងកាយវិការខារ៉ាអូខេឱ្យផលិតកម្មរៃមាសផងដែរ។ គេនឹងរង់ចាំមើល តើលោកលាឈប់ពីអាជីពសិល្បៈមែនឬយ៉ាងណា ហើយបើឈប់មែនតើលោកប្រកបរបរអ្វី៕
ចែករំលែកព័តមាននេះ