រាល់អាងទឹកស្ថិតក្នុងតំបន់៣នឹងត្រូវបំផ្លាញចោលទាំងស្រុងគ្មានការរើសអើង
ដោយ ៖ អប្សរា
ថ្ងៃអង្គារ ទី២៩ ខែមិថុនា ឆ្នាំ២០១០ ម៉ោង ១៤:០០
រាជធានីភ្នំពេញ ៖ លោកលឹម គានហោ ប្រធានអាជ្ញាធរទន្លេសាប បានគូសបញ្ជាក់ថា រាល់អាងទឹកណាដែលកំពុងស្ថិតនៅក្នុងតំបន់៣ គឺត្រូវបំផ្លាញចោលទាំងស្រុង គ្មានលើកលែងទេ ឬអនុគ្រោះទេ ត្រូវយកចេញឱ្យអស់ ដើម្បីទុកឱ្យព្រៃលិចទឹកដុះឡើងវិញ ។ នៅពេលណាឃើញមានអាងទឹកនៅជាប់ៗគ្នា គឺត្រូវបើកមុខទឹក ដូច្នេះអាងទឹក២ ឬអាងទឹក៣ត្រូវយកចេញបំផ្លាញចោលទាំងស្រុងតែម្ដង ។ លោកលឹម គានហោ គូសបញ្ជាក់បែបនេះ នារសៀលថ្ងៃទី២៨ មិថុនា ឆ្នាំ២០១០ នៅសាលប្រជុំអាជ្ញាធរទន្លេសាបប្រាប់អ្នកកា សែតជាតិ-អន្ដរជាតិក្នុងឱកាសជួបសំភាសន៍ ពាក់ព័ន្ធទៅនឹងអាងទឹកដែលមាននៅជុំវិញ បឹងទន្លេសាបទាំងអស់ ទាំងតូច ទាំងធំ ២៣ អាងទឹក ដែលត្រូវបំផ្លាញចោល និងកែសំរួល ដើម្បីឱ្យព្រៃលិចទឹកដុះឡើងវិញ ។
លោកប្រធានអាជ្ញាធរទន្លេសាបបន្ដថា អាងទឹកមួយចំនួនទៀតគឺត្រូវទុកឱ្យនៅមាន ដោយចាត់វិធានការកែសំរួល ។ បច្ចុប្បន្នគេធ្វើទំនប់រាងបួនជ្រុងព័ទ្ធជុំវិញ ដូច្នេះវិធាន ការគឺត្រូវកែសំរួល ដោយកាត់យកចេញ ប្រមាណ៦០% ដោយយកគ្រឿងចក្រកាយដីទំនប់ដែលកាត់នោះ មកដាក់នៅរណ្ដៅដែល គាត់បានកាយពីមុនមកលើកធ្វើជាទំនប់បំពេញវិញ ដូច្នេះនៅសល់តែចំណុចក្រោម ដែលនៅសល់ផ្ទៃដី៣០% ល្មមគ្រប់គ្រាន់ ដែលហៅថា អាងពន្លិចទឹក ។ ពេលណាទឹកឡើង លិច ពេលណាទឹកស្រកទៅវិញ គឺតំកល់ទឹកទុកក្នុងអាងនេះ ហើយការធ្វើបែប នេះទន្លេសាបអាចមានទឹកបែកវាលពេលទឹកឡើង ហើយនៅពេលទឹកស្រកប្រជាពលរដ្ឋ មានទឹកតំកល់នៅក្នុងអាងបានទឹកដើម្បីស្រោចស្រពស្រែជុំវិញ ។ ព័ត៌មានលំអិតនឹង ផ្សាយជូននៅពេលក្រោយ និងនៅលើទំព័រកាសែតកោះសន្ដិភាព .
