មន្ត្រីទេសចរ៦៥នាក់ បញ្ចប់វគ្គវិក្រិតការគ្រូបង្គោល
ដោយ ៖ អប្សរា
ថ្ងៃពុធ ទី១ ខែកញ្ញា ឆ្នាំ២០១០ ម៉ោង ១៤:៤៩
រាជធានីភ្នំពេញ ៖ សិក្ខាកាមជាមន្ត្រីទេសចរចំនួន៦៥នាក់ បានចូលរួមសិក្សាវគ្គវិក្រិតការគ្រូបង្គោលផ្នែកចំណាត់ថ្នាក់សណ្ឋាគារ និងសេវាកម្មស្នាក់នៅរយៈពេល២ថ្ងៃ (៣០-៣១ សីហា) នៅសណ្ឋាគារមិត្តភាពរាជធានីភ្នំពេញ ។ សិក្ខាកាមទាំងអស់មកពីនាយកដ្ឋាននានារបស់ក្រសួងទេសចរណ៍ និងជាប្រធាន អនុប្រធាន មន្ទីរទេសចរណ៍មកពីគ្រប់បណ្តាខេត្ត-រាជធានីទូទាំងប្រទេស ។ ក្នុងឱកាសបិទវគ្គវិក្រិតការខាងលើនេះ លោកសំ ព្រហ្មនា រដ្ឋលេខាធិការក្រសួងទេសចរណ៍ បានធ្វើការកោតសរសើរ និងវាយតំលៃខ្ពស់ចំពោះគ្រូឧទ្ទេស និងសិក្ខាកាមទាំងអស់ដែលបានព្យាយាមយកចិត្តទុកដាក់ក្នុងការពន្យល់ និងការត្រងត្រាប់នូវខ្លឹមសារនានា ដែលជាគោលដៅការងាររបស់ក្រសួងទេសសចរណ៍ ។ លោកសំ ព្រហ្មនា បានសំណូមពរដល់មន្ត្រីទាំងអស់ថា បន្ទាប់ពីបញ្ចប់វគ្គនេះ ទៅនឹងត្រូវជួយផ្សព្វផ្សាយ ពន្យល់ដល់ម្ចាស់អាជីវកម្មសណ្ឋាគារ ដើម្បីឱ្យពួកគាត់បានយល់ ពិសេសបញ្ជាក់បន្ថែមឱ្យបានច្បាស់អំពីច្បាប់ អនុក្រឹត្យ ដែលក្រសួងទេសចរណ៍បានដាក់ចេញឱ្យអនុវត្ត ហើយប្រធានមន្ទីរទេសចរណ៍គ្រប់ខេត្ត-រាជធានីទាំងអស់ ត្រូវជំរុញបង្កើតក្រុមការងារបង្កើតការបណ្តុះបណ្តាលពង្រឹងសមត្ថកិច្ចបំពេញការងារដោយស្មារតីទទួលខុសត្រូវ ។
ក្រសួងទេសចរណ៍តែងជំរុញឱ្យមានការបណ្តុះបណ្តាលតាមរយៈការបង្កើតវគ្គវិក្រិតការ ឬវគ្គបដិសណ្ឋារកិច្ចក្នុងទិសដៅពង្រឹងការគ្រប់គ្រង និងការវាយតំលៃចំណាត់ថ្នាក់សណ្ឋាគារ និងសេវាកម្មស្នាក់នៅ ។ នៅក្នុងប្រទេសកម្ពុជា បច្ចុប្បន្ន មានសណ្ឋាគារសរុបចំនួន ៤៥៤ស្មើនឹង២៣.៣៤៩បន្ទប់, ក្នុងរាជធានីភ្នំពេញ មានសណ្ឋាគារ១៥៩ សើ្មនឹង៦.៩២០បន្ទប់, ខេត្តព្រះសីហនុមានសណ្ឋាគារ ៤៤ ស្មើនឹង១.៧៧១បន្ទប់, ខេត្តសៀមរាប មានសណ្ឋាគារ១២០ស្មើនឹង៨.៧៦៣បន្ទប់ ។ ក្រសួងទេសចរណ៍កំពុងយកចិត្តទុកដាក់ក្នុងការចុះត្រូតពិនិត្យវាយតំលៃសណ្ឋាគារទាំងនោះ ដើម្បីផ្តល់ចំណាត់ថ្នាក់ ។ ក្នុងនោះការជំរុញឱ្យមានវគ្គសិក្សាជាហូរហែកន្លងមក គឺក្នុងទិសដៅពង្រឹងចំណេះដឹងមន្ត្រីទេសចរ ដើម្បីបំពេញការងារប្រកបដោយប្រសិទ្ទភាព ។ បច្ចុបុ្បន្នមានសណ្ឋាគារចំនួន៨ដែលក្រសួងបានផ្តល់ចំណាត់ថ្នាក់ផ្កាយ៥ និងមានលំដាប់ក្រោមផ្កាយ៥ ជាច្រើនទៀត ។ ការពង្រឹងសមត្ថភាពមន្ត្រីចុះត្រួតពិនិត្យវាយតំលៃ គឺជាករណីចាំបាច់មិនអាចខ្វះបាន ៕
