ហ្វីលីពីនចាប់ផ្តើមកាត់ទោសឃាតកក្នុងការសំលាប់រង្គាលជាប្រវត្តិសាស្ត្រ
ដោយ ៖ ប្រុសកោះ
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៦:១១
ប្រទេសហ្វីលីពីនបានចាប់ផ្តើមដំណើរការកាត់ទោសឃាតកសម្លាប់រង្គាលជាប្រវត្តិសាស្ត្ររបស់ខ្លួនកាលពីព្រឹកថ្ងៃទី៨ កញ្ញា ។ ការកាត់ទោសនោះធ្វើឡើងនៅក្នុងទីក្រុងម៉ានីលជាអ្វីដែលត្រូវបានគេចាត់ទុកថាជាការសំលាប់រង្គាលដោយហេតុផលនយោបាយដ៏អាក្រក់បំផុតក្នុងប្រវត្តិសាស្ត្ររបស់ហ្វីលីពីន ។ ដំណើរការកាត់ទោសនេះចាប់ផ្តើមជាមួយនឹងការផ្តល់សក្ខីកម្មរបស់សាក្សីខាងដើមចោទដែលបាននិយាយថា ខ្លួនបានចូលរួមកិច្ចប្រជុំចំនួន២ កាលពីខែវិច្ឆិកា ឆ្នាំ២០០៩ កន្លងមក ដែលក្នុងអំឡុងពេលនោះ គ្រួសារអ្នកនយោបាយដ៏មានអំណាចបានរៀបចំផែនការសំលាប់មនុស្សជាច្រើននាក់ក្នុងការហែក្បួនមួយ ។ ក្នុងករណីនៃការកាត់ទោសរបស់ប្រទេសហ្វីលីពីននោះមានជនដែលត្រូវជាប់ចោទចំនួន១៩៦នាក់ និងសាក្សី៥០០នាក់ ដំណើរការកាត់ទោសនេះត្រូវបានគេរំពឹងថា នឹងប្រើពេលអស់ច្រើនឆ្នាំ ៕
