ទុរគតជនពីរគ្រួសារទទួលអំណោយពីកាកបាទក្រហមកម្ពុជា ស្រុកមង្គលបុរី
ដោយ ៖ អប្សរា
ថ្ងៃអាទិត្យ ទី១៨ ខែកក្កដា ឆ្នាំ២០១០ ម៉ោង ១៧:៣១
រក្សា
ទុរគតជនពីរគ្រួសារទទួលអំណោយពីកាកបាទក្រហមកម្ពុជា
ខេត្ដបន្ទាយមានជ័យ ៖ ដូនចាស់វ័យ៦៧ឆ្នាំ ដែលមានចៅប្រុសស្រីចំនួន៣នាក់ នៅក្នុងបន្ទុកកំពុងរស់នៅក្នុងជំរកបណ្ដោះ អាសន្នក្នុងភូមិស្ទឹងចាស់ ឃុំគយម៉ែង ស្រុកមង្គលបុរី និងគ្រួសារទុរគតជនមួយទៀត មានសមាជិក៥នាក់ មានម្ដាយអាយុ៧៥ឆ្នាំ នៅភូមិស្ដីក្រោមឃុំគយម៉ែង ស្រុកមង្គលបុរី បានទទួលអំណោយកាកបាទក្រហម កាលពីព្រឹកថ្ងៃទី១៥ កក្កដា ឆ្នាំ២០១០ ។ លោកបេ ឱគិន ប្រធានគណៈកម្មាធិការអនុសាខាកាកបាទក្រហមកម្ពុជាស្រុក និងជាប្រធានក្រុមប្រឹក្សាស្រុកមង្គលបុរី ឱ្យដឹងថា អនុសាខាកាកបាទក្រហមស្រុក រួមនឹងអាជ្ញាធរស្រុក ដោយមានការចូលរួមពីសប្បុរសជនជាច្រើនទៀត បានទៅសួរសុខទុក្ខប្រជាពលរដ្ឋក្រខ្សត់ចំនួន២គ្រួសារនៅ ឃុំគយម៉ែង ដែលក្នុងនោះមានគ្រួសារ លោកយាយស៊ឹម សារុន អាយុ៦៧ឆ្នាំ រស់នៅជាមួយចៅចំនួន៣នាក់ ស្រី២នាក់ ដោយម្ដាយពួកគេបានស្លាប់ជាច្រើនឆ្នាំ ឯឪពុកផ្ទុកមេរោគអេដស៍ មិនរស់នៅក្នុងគ្រួសារនេះទេ និងគ្រួសារលោកយាយ ប៉ុក ដឿន អាយុ៧៥ឆ្នាំ ស្ថិតក្នុងស្ថានភាពជរាព្យាធិដែលមានកូនស្រីមេម៉ាយ និងចៅ៣នាក់ នៅក្នុងបន្ទុក ។
គ្រួសារទាំង២នេះសុទ្ធតែរស់នៅក្នុងជំរក បណ្ដោះអាសន្នលើដីរបស់គេ ដោយក្ដីអាណិតអាសូរពីអ្នកភូមិ ។ ក្នុងឱកាសនោះ លោកអ៊ី ឡូង ប្រធានកិត្ដិយសអនុសាខាកាកបាទក្រហមកម្ពុជា និងជាអភិបាលស្រុកមង្គលបុរី បានសំដែងនូវក្ដីអាណិតអាសូរចំពោះគ្រួសារដែលក្រខ្សត់ ជួបការលំបាកព្រមទាំងបានញំនាំការនឹក រលឹកប្រកបដោយទឹកចិត្ដសប្បុរសធម៌របស់ថ្នាក់ដឹកនាំកាកបាទក្រហមកម្ពុជា ពិសេសលោកជំទាវបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលគ្រប់កាលៈទេសៈលោកជំទាវបណ្ឌិត តែងតែផ្ដល់អនុសាសន៍ដល់គណៈកម្មាធិការកណ្ដាល គ្រប់សាខា និងអនុសាខាយកចិត្ដទុកដាក់ជួយ ដល់ប្រជាពលរដ្ឋងាយរងគ្រោះ និងរងគ្រោះ ដោយប្រការផ្សេងៗ មិនទុកឱ្យប្រជាពលរដ្ឋណាម្នាក់ស្លាប់ដោយខ្វះស្បៀងអាហារ និងមិនបានទទួលការសង្គ្រោះនោះឡើយ ។
ជាក់ស្ដែងកាកបាទក្រហមកម្ពុជា ស្រុកមង្គលបុរី ដោយមានការចូលរួមឧបត្ថម្ភគាំទ្រពីសប្បុរសជន ក្នុងស្រុកផងនោះ បាននាំយកអំណោយជាគ្រឿងឧបភោគបរិភោគ មកប្រគល់ជូនគ្រួសារទុរគតទាំង២ដែលក្នុងនោះគ្រួសារលោក យាយប៉ុក ដឿន ទទួលបានអង្ករចំនួន៥០គីឡូក្រាម មី៣កេស ទឹកត្រី ទឹកស៊ីអ៊ីវ៤យួរ ទឹកសណ្ដែក២យួរ ចាន ស្រាក់១ សារុង១ និងថវិកា២២ម៉ឺនរៀល ឯគ្រួសារលោកយាយស៊ឹម រុន ទទួលបានអង្ករ១០០គីឡូក្រាម មី៤កេស ទឹកសណ្ដែក ទឹកត្រី ទឹកស៊ីអ៊ីវ៦យួរ មុង១ ចាន ឆ្នាំង ស្លាបព្រា និងថវិកា២៨ម៉ឺនរៀល ។ លោកអ៊ី ឡុង បានសំណូមពរដល់អាជ្ញាធរឃុំ-ភូមិ និងប្រជាពលរដ្ឋ ពិសេសអ្នកជិតខាងបន្ដប្រពៃណីជួយឧបត្ថម្ភគាំទ្រដល់ជីវភាពគ្រួសារទុរគតនេះ ដោយចិត្ដសប្បុរសទៀត ៕
