លោកអូបាម៉ា ៖ អាមេរិកត្រៀមស្វែងរកសន្តិភាពស្ថិតស្ថេររវាងអ៊ីស្រាអែល និងប៉ាឡេស្ទីន
ដោយ ៖ ប្រុសកោះ
ថ្ងៃព្រហស្បត្ត៏ ទី២ ខែកញ្ញា ឆ្នាំ២០១០ ម៉ោង ១៧:០៩
គេហទំព័របរទេស
មេដឹកនាំប៉ាឡេស្ទីន និងអ៊ីស្រាអែលចាប់ដៃគ្នាមុនចរចា
ប្រធានាធិបតីអាមេរិក លោកបារ៉ាក់ អូបាម៉ា ថ្លែងកាលពីថ្ងៃទី១ កញ្ញា ថា សហរដ្ឋអាមេរិកបានត្រៀមស្វែងរកសន្តិភាពដ៏ស្ថិតស្ថេរមួយរវាងអ៊ីស្រាអែល និងប៉ាឡេស្ទីន ដោយលោកបន្តថា ការចរចាដោយផ្ទាល់គឺជាផ្លូវតែ មួយគត់ឆ្ពោះទៅរកសន្តិភាពដ៏ស្ថិតស្ថេរនៅមជ្ឈិមបូព៌ា ។
លោកអូបាម៉ា ថ្លែងបែបនេះទៅកាន់សារព័ត៌មាននៅសេតវិមាន ។ លោកមានប្រសាសន៍ថា ផ្លូវនេះបានបើកចំហសំរាប់ប្រជាជនអ៊ីស្រាអែល និងប្រជាជនប៉ាឡេស្ទីន ហើយការចរចាសន្តិភាពនៅមជ្ឈិមបូព៌ានឹងជួយដោះស្រាយរាល់ បញ្ហាស្តីពីលក្ខន្តិកៈចុងក្រោយ និងនាំទៅរកការបង្កើតរដ្ឋប៉ាឡេស្ទីនមួយ ។ រដ្ឋាភិបាលអាេមរិកនឹងធ្វើជាអាជ្ញាកណ្តាលក្នុងការចរចាដោយផ្ទាល់រវាងនាយករដ្ឋមន្ត្រីអ៊ីស្រាអែល លោកបេនចាមីន នេតាន់យ៉ាហ៊ូ និងប្រធានាធិបតីប៉ាឡេ ស្ទីន លោកម៉ាមូដ អាប់បាស់ ដែលការចរចានោះចាប់ផ្តើមថ្ងៃទី២ កញ្ញា ទៅ ដែលនោះជាការចរចាដោយផ្ទាល់រវាងភាគីទាំង២ ចាប់តាំងពីប្រមាណជា២០ខែមកហើយ។
លោកអូបាម៉ា ថ្លែងថា ខ្ញុំអំពាវនាវដល់នាយករដ្ឋមន្ត្រីអ៊ីស្រាអែល លោកនេតាន់យ៉ាហ៊ូ និងលោកប្រធានាធិបតីអាប់បាស់ ឱ្យឆ្លៀតឆក់យកឱកាសនេះ ។
នាព្រឹកថ្ងៃទី១ កញ្ញា លោកអូបាម៉ា បានជួបដាច់ដោយឡែកពីគ្នា ជាមួយមេដឹកនាំអ៊ីស្រាអែល និងមេដឹកនាំប៉ាឡេស្ទីន ដែលអ្នកទាំង២ត្រូវចរចាគ្នាដោយផ្ទាល់នាថ្ងៃទី២ កញ្ញា ។ លោកអូបាម៉ា បញ្ជាក់ថា ការចរចានេះគឺសំដៅដោះស្រាយរាល់បញ្ហាស្តីពីលក្ខន្តិកៈចុងក្រោយ៕
