លោកគីម ជុងអ៊ីល រៀបចំការឡើងកាន់អំណាចរបស់កូនប្រុសទី3
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១៥:១៥
គេហទំព័របរទេស
មេដឹកនាំកំពូលកូរ៉េខាងជើង
សកម្មភាពនានាត្រូវបានជំរុញនៅក្រុងព្យុងយ៉ាង។ ចាប់តាំងពីប៉ុន្មានថ្ងៃមកហើយផ្កាយរណបចារកម្មអាមេរិកចាប់បានរូបភាពនៃចលនាកងទ័ពគួរឱ្យសង្ស័យដែលកងទ័ពមិនត្រូវបានបញ្ជូនឆ្ពោះទៅកាន់រណសិរ្សឡើយ តែឆ្ពោះមកកាន់រដ្ឋធានីកូរ៉េខាងជើង។ ម៉្យាងទៀតមានការឃោសនាគួរឱ្យកត់សំគាល់មួយនៃរបបក្រុងព្យុងយ៉ាងដែលរៀបចំបទចំរៀងថ្មីមួយ។ ជាលើកដំបូងចាប់តាំងពី៣សតវត្សមកហើយដែលរបបនេះស្នើដល់បណ្តាសមមិត្តឱ្យបូជាជីវិតរបស់ខ្លួនដើម្បីការពារក្បាលម៉ាស៊ីនរបស់បក្ស។ នេះជាពាក្យដែលគេធ្លាប់ប្រើកាលពីទសវត្សឆ្នាំ១៩៧០ពេលមានការរៀបចំសំរាប់ការជ្រើសតាំងលោកគីម ជុងអ៊ីល ឡើងបន្តតំណែងពីឪពុកលោក គឺលោកគីម អ៊ីលស៊ុង ជា«ប្រធានាធិបតីអមតៈ»ដែលទទួលមរណភាពកាលពីឆ្នាំ១៩៩៤។ ក្រោយពីការរៀបចំជាសំងាត់រយៈពេលច្រើនឆ្នាំទីបំផុតលោកគីម ជុងអ៊ីល ត្រូវបានប្រកាសផ្លូវការជាមេដឹកនាំកំពូលកូរ៉េខាងជើងកាលពីឆ្នាំ១៩៨០នាឱកាសនៃសមាជវិសាមញ្ញមួយរបស់បក្សពលករកូរ៉េ។
ប្រវត្តិសាស្ត្របានជាន់ដានគ្នាដោយបក្សនេះត្រៀមសំរាប់បើកធ្វើសមាជមួយដូចគ្នានេះ។ សមាជវិសាមញ្ញនោះដែលសំដៅជ្រើសរើសមេដឹកនាំកំពូលថ្មីៗត្រូវបានប្រកាសជាមហោឡារិកកាលពីខែមិថុនាកន្លងមកនេះ។ កាលពីសប្តាហ៍មុន ការរៀបចំនានាត្រូវបានជំរុញហើយការជំរុញខ្លាំងអាចពិនិត្យឃើញតាមរយៈការធ្វើព្យុហយាត្រាយោធាយ៉ាងធំមួយនាថ្ងៃទី៩ កញ្ញា ខាងមុខនេះជាទិវាបង្កើតរបបកុំមុយនីស្តកូរ៉េខាងជើង។ នោះជាព្រឹត្តិការណ៍ពិសេសអាចជាមូលដ្ឋានគ្រឹះក្រោមការកាន់អំណាចរបស់លោកគីម ជុងអ៊ីល ជាមួយទិសដៅរៀបចំការឡើងកាន់អំណាចរបស់កូនប្រុសទី៣របស់លោក ឈ្មោះគីម ជុងអ៊ុន អាយុប្រមាណជា២៧ឆ្នាំ ដែលនោះនឹងជាការរក្សាអំណាចកំពូលក្នុងដៃរបស់គ្រួសារដដែល៣ជំនាន់ជាប់គ្នា៕
