ចំនួនអ្នកស្លាប់ដោយសារការបាក់ដីនៅហ្គាតេម៉ាឡា កើនឡើងដល់ជាង១០០នាក់
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១០:៣៦
គេហទំព័របរទេស
ក្រុមជួយសង្រ្គោះសែងសាកសពអ្នកស្លាប់ដោយការបាក់ដី
យោងតាមតុល្យការចុងក្រោយថ្មីមួយថា គិតត្រឹមព្រឹកថ្ងៃទី៦ កញ្ញា ចំនួនមនុស្សដែលស្លាប់ក្នុងការបាក់ដី និងទឹកជំនន់នៅតំបន់ភាគខាងលិចប្រទេសហ្គាតេម៉ាឡា បានកើនឡើងដល់ជាង១០០នាក់ហើយ ។ ចំនួនអ្នកស្លាប់បានកើនឡើងក្រោយពីក្រុមអ្នកជួយសង្គ្រោះបានរកឃើញសាកសពមនុស្ស១៨នាក់ទៀត ដោយធ្វើឱ្យចំនួនអ្នកស្លាប់កើនឡើងដល់១០០នាក់ ។ ការបាក់ដីនៅក្នុងប្រទេសហ្គាតេម៉ាឡា កើតឡើងដោយសារធ្លាក់ភ្លៀងខ្លាំងច្រើនថ្ងៃជាប់ៗគ្នា ។ ជាមួយគ្នានេះ កាលពីល្ងាចថ្ងៃទី៤ កញ្ញា កន្លងមក ការបាក់ដីទ្រង់ទ្រាយធំមួយបានកើតឡើងនៅក្បែរផ្លូវហាយវ៉េមួយក្នុងប្រទេសនេះ ដោយដីដែលបាក់បានកប់រថយន្ត៦គ្រឿង ក្នុងនោះមានរថយន្តបឺសមួយគ្រឿងបណ្តាលឱ្យស្លាប់មនុស្សជាច្រើននាក់ ។
តាមប្រភពព័ត៌មានមួយរាយការណ៍ថា ក្រុមអ្នកជួយសង្គ្រោះ១៥០នាក់ បានប្រើប្រាស់ត្រាក់ទ័រ និងគ្រឿងចក្រដើម្បីជួយសង្គ្រោះជនរងគ្រោះ ប៉ុន្តែដំណើរការជួយសង្គ្រោះរបស់ពួកគេត្រូវបានផ្អាកដោយសារការធ្លាក់ភ្លៀងខ្លាំង
ទៀត ៕
