អុជចង្កៀងលើក្បាលដំណេកធ្លាក់ដីឆាបឆេះជាអគ្គីភ័យសន្ធោសន្ធៅ
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៧:៤៥
សេសាន
លំនៅឋានមួយខ្នងត្រូវអគ្គីភ័យឆាបឆេះ
ខេត្តស្ទឹងត្រែង ៖ លំនៅឋានមួយខ្នងមាន២គ្រួសារជាបងប្អូនបង្កើតនឹងគ្នា រស់នៅដោយខណ្ឌដាច់ដោយឡែកពីគ្នា ត្រូវភ្លើងឆេះនៅវេលាម៉ោង៩និង៣០នាទីយប់ ថ្ងៃទី៨ កញ្ញា ក្នុងភូមិថ្មលាត ឃុំស្រះប្ញស្សី ក្រុងស្ទឹងត្រែង ។
ម្ចាស់ផ្ទះទី១-ឈ្មោះសា រឿន អាយុ៣៣ឆ្នាំ និងប្រពន្ធឈ្មោះសាវ៉ាត អាយុ២៨ឆ្នាំ ប្រកបរបរលក់គ្រឿងទេសនៅផ្ទះ និងទី២-ឈ្មោះនៅ នុយ អាយុ២៨ឆ្នាំ ជាអ្នកកាត់ស្មៅ និងប្រពន្ធឈ្មោះសេង លាប អាយុ២៣ឆ្នាំ ។
លោកនៅ នុយ និងប្រពន្ធឈ្មោះសេង លាប ឱ្យដឹងថា អគ្គីភ័យកើតឡើងនៅវេលាម៉ោង៩និង៣០នាទីយប់ ដោយសារលោក និងប្រពន្ធដុតចង្កៀងប្រេងកាតដាក់នៅលើក្បាលដំណេក ហើយប៉ះដៃបណ្តាលឱ្យធ្លាក់មកដីឆាបឆេះរាលដាលដល់ម៉ាស៊ីនកាត់ស្មៅដែលនៅក្បែរនោះចំនួន២គ្រឿង រួចឆាបឆេះដល់ម៉ូតូបន្ថែមទៀត ។ ដោយភ័យស្រឡាំងកាំងពេករកអ្វីមកពន្លត់ពុំបាន ភ្លើងបន្តឆាបឆេះដល់ប្រេងសាំងដែលនៅក្បែរនោះទៀត ។
ប្រភពដដែលបន្តថា ដោយសារតែអណ្តាតភ្លើងឆាបឆេះដោយសារប្រេងសាំងសន្ធោសន្ធៅខ្លាំងពេកពុំបានយកទ្រព្យសម្បត្តិចេញទាន់ទេ ។ ក្រោយពេលភ្លើងឆេះប្រហែលជាង១០នាទីមក រថយន្តពន្លត់អគ្គីភ័យចំនួន២គ្រឿងទៅជួយបាញ់ពន្លត់ ។ ប៉ុន្តែភ្លើងឆាបឆេះលឿនតាមអំណាចប្រេងសាំង ទើបការជួយអន្តរាគមន៍ពុំបានជោគជ័យ ។
ម្ចាស់ផ្ទះទីបានបញ្ជាក់ប្រាប់អ្នកសារព័ត៌មានយើងថា សំភារដែលបាត់បង់រួមមានម៉ូតូ C125 ស៊េរី២០០៦ ពណ៌ខ្មៅមួយគ្រឿង ម៉ាស៊ីនកាត់ស្មៅរបស់មន្ទីរសាធារណការ និងដឹកជញ្ជូនចំនួន២គ្រឿង ប្រាក់ចំនួន១លានរៀល និងសំភារប្រើប្រាស់ដទៃទៀត ។ តែអគ្គីភ័យនេះមិនបានបង្កឱ្យមានរបួសស្នាមដល់មនុស្សណាម្នាក់ទេ ៕
