តាមប្រមាញ់ក្រុមឧក្រិដ្ឋជន ចាប់និស្សិតកូនស្រីមន្ត្រីប្លន់អលង្ការ និងរថយន្តទៅលាក់នៅខេត្តតាកែវ
ដោយ ៖ អប្សរា
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ០៨:៤៧
ចោមចៅ
ក្រុមគ្រួសារជួយសង្គ្រោះនារីរងគ្រោះពេលនាំដល់មន្ទីរពេទ្យ
រាជធានីភ្នំពេញ ៖ ប្រភពព័ត៌មានបានឱ្យដឹងថា បន្ទាប់ពីមានការស៊ើបអង្កេត និងស្រាវជ្រាវយ៉ាងយកចិត្តទុកដាក់ពីសំណាក់សមត្ថកិច្ចនគរបាលរាជធានីភ្នំពេញ និងនគរបាលខេត្តតាកែវ លើក្រុមឧក្រិដ្ឋជនប្លន់កូនមន្ត្រីរាជការម្នាក់ ពេលនេះត្រូវបានស្គាល់អត្តសញ្ញាណហើយគឺជាក្រុមចោរជើងចាស់ ។ ក្រុមចោរប្លន់កូនមន្ត្រីរាជការម្នាក់នោះ ត្រូវបានសមត្ថកិច្ចនគរបាលព្រហ្មទណ្ឌរាជធានីភ្នំពេញធ្វើរបាយការណ៍ដាក់ទៅស្ថាប័នអយ្យការសាលាដំបូងរាជធានី ដើម្បីសុំដីកាស្វែងរកចាប់ខ្លួន ដែលពេលមានដីកាចាប់ខ្លួនហើយមិនអាចគេចខ្លួនទៅណារួចទេ ហើយក្រុមនោះក៏កំពុងស្ថិតក្នុងការតាមប្រមាញ់របស់សមត្ថកិច្ចដែរ ។ រថយន្តរបស់ជនរងគ្រោះត្រូវបាននាំមករក្សាទុកនៅស្នងការដ្ឋាននគរបាលរាជធានីភ្នំពេញ ដោយឡែកម្ចាស់ផ្ទះដែលក្រុមចោរយករថយន្តទៅផ្ញើ មិនត្រូវបានឃាត់ខ្លួនទេ ។
ប្រភពដដែលបន្តថា បានជាមានការអះអាងថា ស្គាល់អត្តសញ្ញាណជនល្មើសនេះព្រោះ ១-តាមរយៈកាម៉េរ៉ាស្ថានីយប្រេងចាប់បាន និង២-តាមរយៈទូរស័ព្ទដែលជនសង្ស័យបានទាក់ទងគ្នា ។ ចំណែកសមត្ថកិច្ចវិញមិនធ្វើអត្ថាធិប្បាយទេ ដោយអះអាងថា កំពុងធ្វើការស្រាវជ្រាវ ។ ព័ត៌មានជុំវិញអំពើប្លន់និស្សិតស្រីយករថយន្តស៊េរីទំនើប១គ្រឿង និងគ្រឿងអលង្ការ ព្រមទាំងលុយ គិតមកដល់ត្រឹមថ្ងៃទី៥ កញ្ញា ឆ្នាំ២០១០ ក្រុមចោរប្លន់ប្រដាប់អាវុធនៅពុំទាន់ត្រូវបានចាប់ខ្លួននៅឡើយទេ ប៉ុន្តែសមត្ថកិច្ចបានស្គាល់អត្តសញ្ញាណអស់ហើយ ហើយកំពុងតែតាមប្រមាញ់តែពុំដឹងថាចាប់បាននៅពេលណាឡើយ ។ ក្រុមចោរប្លន់ខាងលើពុំត្រូវបានសមត្ថកិច្ចបង្ហើបឱ្យដឹងឈ្មោះទេ គ្រាន់តែប្រាប់ថា បានស្គាល់អត្តសញ្ញាណអស់ហើយ ប៉ុន្តែប្រភពព័ត៌មានខ្លះបានបង្ហើបថា ក្រុមចោរនោះជាអតីតអ្នករត់តាក់ស៊ី «ក្រុមអាផ្តាច់ព្រលឹង»។ ទាក់ទិនទៅនឹងសកម្មភាពប្លន់នោះ ក្រោយពេលប្លន់បាន ក្រុមចោរបានបើករថយន្តយកទៅលាក់ទុកនៅក្នុងផ្ទះមន្ត្រីរាជការម្នាក់ក្នុងស្រុកគិរីវង់ ខេត្តតាកែវ ហើយឮថា ជាមន្ត្រីយោធាការពារព្រំដែនទៀតផង ។
គេនៅចាំបានថា ហេតុការណ៍ប្លន់ប្រដាប់ អាវុធនោះបានកើតឡើងកាលពីវេលាម៉ោង៨និង៣០នាទីយប់ថ្ងៃទី៣ កញ្ញា ឆ្នាំ២០១០ នៅចំណុចស្ថានីយប្រេងឥន្ធនៈស្តុបអំបាសាឌ័រ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។ ក្រុមចោរប្លន់មានគ្នា២នាក់ស្លៀកពាក់ស៊ីវិល ប្រដាប់ដោយកាំភ្លើងខ្លី១ដើម វិទ្យុទាក់ទង១គ្រឿង និងដំបងឆក់ផងដែរ បានធ្វើសកម្មភាពភ្ជង់គំរាមបាញ់សម្លាប់និស្សិតស្រីម្នាក់ប្លន់យកលុយ គ្រឿងអលង្ការ និងរថយន្តស៊េរីទំនើបមួយគ្រឿង ។ និស្សិតស្រីរងគ្រោះឈ្មោះអ៊ិត សុជាតា អាយុ១៩ឆ្នាំ ជានិស្សិតនៅវិទ្យាស្ថានជាតិគ្រប់គ្រង មានទីលំនៅផ្ទះលេខ២៣C ផ្លូវលេខ៦១៦ សង្កាត់បឹងកក់២ ខណ្ឌទូលគោក ។ សំភារដែលត្រូវក្រុមចោរប្លន់នាពេលនោះមានរថយន្តមួយគ្រឿងម៉ាកកាមរីបាឡែន ស៊េរីឆ្នាំ២០០២ ពណ៌ទឹកមាស ពាក់ស្លាកលេខ ភ្នំពេញ 2G-9228 ក្រវិលពេជ្រ មានតំលៃ១.០០០ដុល្លារមួយគូ ចិញ្ចៀនពេជ្រ១វង់ លុយខ្មែរ និងលុយដុល្លារ សរុប៥០ដុល្លារ និងទូរស័ព្ទដៃ២គ្រឿង ។
តាមប្រភពព័ត៌មានបានឱ្យដឹងថា នៅមុនពេលកើតហេតុ និស្សិតស្រីរូបនេះបានបើករថយន្តចេញពីវិទ្យាស្ថានជាតិគ្រប់គ្រងឆ្ពោះទៅផ្ទះតែម្នាក់ឯង លុះដល់ចំណុចខាងលើក៏បានឈប់ចូលផ្សាររកទិញចំណីហូប ។ បន្ទាប់ពីទិញបានហើយនាងក៏បានដើរចេញពីផ្សារក្នុងបំណងឡើងរថយន្តបើកបន្តដំណើរទៅមុខទៀត ពេលនោះស្រាប់តែមានជន២នាក់ដើរទៅជិតដកកាំភ្លើងខ្លីភ្ជង់គំរាមបាញ់សម្លាប់ និងរុញបញ្ចូលទៅក្នុងរថយន្តចាប់វាយខ្នោះជើងរួចវាយខ្នោះដៃស្លាបសេក ទៅក្រោយ និងយកខ្សែចងដៃ និងជើងជាប់គ្នា ព្រមទាំងដាក់ឱ្យនាងដេកផ្កាប់មុខក្នុងរថយន្តថែមទៀត ។ ប្រភពដដែលបានបន្តថា បន្ទាប់មកជនម្នាក់បានបើករថយន្តចេញដំណើរ ឯម្នាក់ទៀតបានយកដំបងឆក់មិនឱ្យស្ត្រីរងគ្រោះស្រែក ដែលពេលនោះនាងពុំដឹងថា ក្រុមចោរនាំយកនាងទៅណាឡើយ ប៉ុន្តែបានឮពួកគេនិយាយទូរស័ព្ទទៅកាន់ខ្សែម្ខាងទៀតដែលម្តងថា ស្រុកអង្គស្នួល ខេត្តកណ្តាល ម្តងថាទៅកាន់ក្រុងតាខ្មៅ ខេត្តកណ្តាល ។
លុះក្រោយមកក្រុមចោរបានដឹកម្ចាស់រថយន្តយកទៅទម្លាក់ចោលនៅក្បែរផ្លូវត្រង់ចំណុចទួលតាឯក ខាងត្បូងភូមិប្រាសាទ ឃុំស្នោ ស្រុកអង្គស្នួល ខេត្តកណ្តាល ទាំងកំពុងមានភ្លៀងធ្លាក់ខ្លាំងទៀតផង ។ ប្រភពដដែលបានបន្តទៀតថា បន្ទាប់ពីទម្លាក់និស្សិតរងគ្រោះចុះហើយ ក្រុមចោរបានបើករថយន្តចេញទៅបាត់ ហើយនារីរងគ្រោះបានខំប្រឹងក្រោកអង្គុយទាំងដៃជើងជាប់ខ្នោះ និងចំណងរួចរំកិលខ្លួនបន្តិចម្តងៗ ទៅក្បែរផ្លូវបានចំងាយប្រមាណ២០០ម៉ែត្រពីកន្លែង ដែលចោរទម្លាក់ចេញពីរថយន្ត ។ ពេលនោះ ទើបជួបរថយន្តដឹកកម្មកររោងចក្រ ហើយស្រែកឱ្យគេជួយ ឯអ្នកបើកបររថយន្តក៏ទូរស័ព្ទរាយការណ៍ប្រាប់ប៉ូលិសឱ្យទៅពិនិត្យមើល ។ មន្ត្រីប៉ូលិសនិយាយថា ពេលទៅដល់បានឃើញនារីរងគ្រោះរូបនេះជាប់ខ្នោះដៃជើង ឯខ្លួនប្រាណទទឹកជោក និងប្រឡាក់ដី ហើយយំយ៉ាងខ្លាំងទៀតផង ។ ពេលនោះកំលាំងប៉ូលិសក៏បានដោះខ្នោះដៃ ខ្នោះជើងចេញ និងបាននាំនាងទៅប្រគល់ឱ្យក្រុមគ្រួសារ ដែលបានទៅចាំទទួលយកនៅឯអធិការដ្ឋានស្រុកអង្គស្នួល ៕
