ម៉ី សុភាព បែកចិញ្ចើមឆ្វេង ចាញ់ ពេជ្រ សម្បត្ដិ ខណៈ ម៉ន សាម៉េត ឈ្នះ លាភ សំណាង ដោយពិន្ទុនៅ TV3
ដោយ ៖ឈិត គឹមឆុន
ថ្ងៃចន្ទ ទី២៤ ខែឧសភា ឆ្នាំ២០១០ ម៉ោង ១៤:១៥
សំអូន
លោកអាជ្ញាកណ្ដាលលើកដៃ ម៉ន សាម៉េត ឈ្នះ លាភ សំណាង នៅរេញ TV3
រាជធានីភ្នំពេញ: បើទោះជាម៉ី សុភាព ព្យាយាមយកអស់ កំលាំងកាយ និងប្រើប្រាស់ល្បិចប្រយុទ្ធរារាំង មិនឱ្យពេជ្រ សម្បត្ដិ បន្សល់ទុកស្នាមរបួសលើផ្ទៃមុខរបស់គេយ៉ាងណាក៏ដោយ ក៏ទីបំផុតនៅតែមិនអាចធ្វើបានឡើយ ក្នុងការប្រកួតគ្នានៅលើសង្វៀនប៉ុស្ដិ៍លេខ៣ កាលពី រសៀលថ្ងៃសៅរ៍ ទី២២ ឧសភា កន្លងមកនេះ ដោយសុភាព មិនត្រឹមតែប្រកួតចាញ់ពិន្ទុ សម្បត្ដិ ម្ដងទៀតនោះទេ គឺគេថែមទាំងត្រូវ សម្បត្ដិ វាយ១កែងបណ្ដាលឱ្យមានរបួសនៅ លើចិញ្ចើមឆ្វេងដេរអស់៣ថ្នេរថែមទៀត ។
ម៉ី សុភាព មកពីក្លឹបព្រះខ័នរាជ្យ រីឯ ពេជ្រ សម្បត្ដិ មកពីក្លឹបកីឡាប្រដាល់ក្រសួងការពារជាតិ ។ រវាងគូនេះធ្លាប់បានប្រកួតគ្នា ច្រើនលើកមកហើយ ដោយមានចាញ់ មាន ឈ្នះទៅវិញទៅមក។ ប៉ុន្ដែអ្វីដែលជាការ សំខាន់នោះ គឺសុភាព រាល់ការប្រកួតម្ដងៗ តែងតែរងរបួសនៅលើផ្ទៃមុខជានិច្ច។ ចំណែកឯការប្រកួតគ្នាលើកនេះទៀត សុភាព ដែលទើបតែទទួលការបរាជ័យ កាលពីពេល ថ្មីៗមកនេះគេមិនចង់បានស្នាមរបួសពីសម្បត្ដិទៀតទេ ដូច្នេះហើយទើបគេព្យាយាមវាយ សំរុកយ៉ាងខ្លាំងក្លាទៅលើសម្បត្ដិ តាំងពីទឹកទី ១នោះ ។ ជាពិសេសស្នៀតជើងដ៏គួរជាទី ទុកចិត្ដរបស់គេបានទាត់សំរុកទៅលើសម្បត្ដិ មិនបង្អង់ឡើយ ។
ប៉ុន្ដែមិនងាយស្រួលដូច ជាការស្មានរបស់គេនោះទេ ពីព្រោះអ្នក ជំនាញខាងប្រើកណ្ដាប់ដៃ ពេជ្រ សម្បត្ដិ គេមិនញញើតសុភាពបន្ដិចណាឡើយ គឺគេ លោតគេចបណ្ដើរ និងវាយសងទៅវិញ បណ្ដើរ ។ នៅក្នុងទឹកទី១ និងទី២ ស្ថានភាព ប្រយុទ្ធរវាងគេទាំង២មានភាពតានតឹងយ៉ាង ខ្លាំង ពីព្រោះគេទាំង២បានប្ដូរស្នៀតកណ្ដាប់ ដៃ និងស្នៀតជើងដាក់គ្នាទៅវិញទៅមកឥត ឈប់ឈរ ។ ប៉ុន្ដែទោះបីជាយ៉ាងណា ស្នៀត កណ្ដាប់ដៃរបស់សម្បត្ដិ ធ្វើបានល្អជាង ចំណែកសុភាព ក្រៅតែពីប្រើស្នៀតកណ្ដាប់ ដៃវាយទៅលើសម្បត្ដិ មិនបានជោគជ័យ នោះ គឺគេព្យាយាមប្រើកែងទាំងប្រថុយ ប្រថានបន្ថែម ។
ចាប់ពីទឹកទី៤ ទៅកំលាំង សុភាព បានស្រុតចុះបន្ដិចម្ដងៗ មិនដូច សម្បត្ដិ ដែលគេបានរក្សាជំហរវាយលុកយ៉ាង រឹងមាំដដែល ។ ដូច្នេះសម្បត្ដិ មានឱកាសប្ដូរ ស្នៀតកែងវាយទៅលើសុភាពបានយ៉ាងល្អ ហើយគេធ្វើឱ្យសុភាព មានរបួសចិញ្ចើមឆ្វេង ទាល់តែបាន ។ ស្ថិតនៅក្នុងដំណាក់កាលចុង ក្រោយនៃទឹកទី៤ និងទី៥នោះ ស្ថានភាព របស់សុភាព បានធ្លាក់ដុនដាបយ៉ាងខ្លាំង គេ អាចដឹងមុនបានថា សុភាព នឹងត្រូវចាញ់ សម្បត្ដិ ចៀសមិនផុតឡើយ ។
ម៉ន សាម៉េត មកពីក្លឹបព្រៃកឯងកីឡា បានប្រកួតឈ្នះលាភ សំណាង មកពីក្លឹប កងពលតូចលេខ៧០ បានដោយពិន្ទុ ។ ការប្រកួតនៅទឹកទី១ដំបូង សាម៉េត ដូចជាមិនទាន់រវល់ចង់បញ្ចេញកំលាំងប៉ុន្មានឡើយ គេ ធ្វើដូចជារបៀបប្រឡែងគ្នាលេងអ៊ីចឹង។ សំណាងដែលមានបំណងចង់យកឈ្នះលើការប្រកួតនេះស្រាប់នោះ គេមិនទុកឱកាសឱ្យ កន្លងផុតទៅដោយឥតប្រយោជន៍នោះទេ គឺ គេបានចាប់ផ្ដើមសំរុកទៅលើសាម៉េតមុន ភ្លាមតែម្ដង ទាំងស្នៀតជើង និងស្នៀត កណ្ដាប់ដៃបានបញ្ចេញព្រមគ្នាវាយស្រោច ទៅលើសាម៉េត តែសាម៉េត នៅតែលោតគេច ចេញទាំងមុខញញឹម ។
ប៉ុន្ដែអ្វីដែលធ្វើឱ្យ សាម៉េត ក្ដៅស្លឹកត្រចៀកខ្លាំងនោះ គឺចាប់ពី ទឹកទី២ និងទី៣ ឡើងទៅ នៅពេលដែល សំណាង បានធ្វើឱ្យគេឈឺសាច់។ ម្ដងនេះ សាម៉េត លែងបន្ធូរដៃដូចលើកមុនទៀត ហើយ ស្នៀតជើងរបស់គេបានទាត់សំរុកទៅ លើសំណាង យ៉ាងរន្ថើន និងបានរុញច្រាន សំណាងផ្ទប់ទៅនឹងខ្សែរេញជាច្រើនលើក ។ ទឹកទី៤ និងទី៥ សាម៉េត មិនខុសពីខ្លាត្រូវ របួសប៉ុន្មានឡើយ ក្នុងខ្លួនរបស់គេដូចជា ឡើងកំដៅយ៉ាងខ្លាំង ពីព្រោះថា គេបានបង្កើនការវាយលុកទៅលើសំណាង រហូត ទាល់តែសំលេងជួងបញ្ចប់ទឹកទី៥បន្លឺឡើង ទើបគេឈប់ ។ លាភ សំណាង ចាញ់ម៉ន សាម៉េត ដោយពិន្ទុយ៉ាងអស់ចិត្ដបំផុត ។
រីឯការប្រកួតគ្នារវាងគង់ សុភ័ក្ដ្រា មកពី ក្លឹបបឹងទំពុន និងសូយ សុភ័ណ្ឌ មកពីក្លឹបអូ ដឹមកីឡាវិញ ក៏មិនធម្មតាដែរ គឺមានសភាព ស្វិតស្វាញខ្លាំងណាស់ ចាប់តាំងពីទឹកទី១ រហូតដល់ទឹកទី៥ គង់ សុភ័ក្ដ្រា មានឱកាស យកឈ្នះពិន្ទុសូយ សោភ័ណ្ឌ ទាំងវេទនាបំផុត ។ ឆាយ ម៉េត មកពីក្លឹបវីអាយភីចំការ មន បានវាយកែវ មុន្នី មកពីក្លឹបសាលវ័ន្ដ កីឡា រហូតដល់អ្នកឱ្យទឹកខាងកែវ មុន្នី បោះ កន្សែងសុំចុះចាញ់នៅក្នុងទឹកទី៤ ។ ឈិន សុខគា មកពីក្លឹបអន្លង់វែង ចំណាយពេលតែ ២ទឹកប៉ុណ្ណោះ អាចធ្វើឱ្យហេង ប៊ុនណាត មក ពីក្លឹបកងទ័ពជើងគោក ចាញ់ដោយសន្លប់នៅ ក្នុងទឹកទី២បានយ៉ាងងាយ ៕
