ក្រុមSo Nyeo Shi Dae ទទួលបានភាពជោគជ័យក្នុងការសំដែងនៅជប៉ុន
ដោយ ៖ សាម៉ន
ថ្ងៃសុក្រ ទី៣ ខែកញ្ញា ឆ្នាំ២០១០ ម៉ោង ០៩:១២
គេហទំព័របរទេស
ក្រុម So Nyeo Shi Dae
ក្រុមតារាចំរៀងស្រីល្បីឈ្មោះរបស់ប្រទេសកូរ៉េ So Nyeo Shi Dae បានទទួលភាពជោគជ័យក្នុងការផ្សាយអាល់ប៊ុមចំរៀងថ្មីរបស់គេជាភាសាជប៉ុន និងចាប់ផ្តើមទទួលបានការចាប់អារម្មណ៍ជាច្រើនផងដែរ នេះបើតាមការឱ្យដឹងពីអ្នកតំណាងរបស់ក្រុមនេះ ។ ការប្រគំតន្ត្រីរបស់គេបានចាប់ផ្តើមនៅថ្ងៃទី២៥ សីហា ចាប់ពីម៉ោង២រសៀលនៅឯមហោស្រព Ariake Colosseum នាទីក្រុងតូក្យូដែលមានទស្សនិកជនប្រហែល៧.០០០នាក់ បានចូលរួមជាមួយនឹងអាល់ប៊ុមចំរៀងថ្មីដែលមានចំណងជើងថា Genie ដែលមានពីរភាសាគឺភាសាជប៉ុន និងកូរ៉េ ។
បទចំរៀងដែលទទួលបានការគាំទ្របំផុតគឺបទ Tell Me Your Wish ក៏បានច្រៀងក្នុងពេលនៃការប្រគំតន្ត្រីនេះផង ដែរ។ ពួកគេម្នាក់ៗបានបង្ហាញពីមន្តស្នេហ៍របស់គេចំនួន៣០នាទី។ ក្នុងពេលសំដែងនេះ ពួកគេបានច្រៀងបទល្បីៗរបស់ខ្លួនចំនួន៥បទ ដូចជាបទ Oh ! បទ Run devil Run បទInto The new world បទGee ជាដើម ។ ពួកគេទទួលបានការគាំទ្រយ៉ាងខ្លាំងពីសំណាក់យុវនារីក្នុងប្រទេសជប៉ុនក្នុងពេលសំដែងនេះ ។ ក្រុមតារាចំរៀងកូរ៉េបានទទួលកាដូ ជាច្រើនពីអ្នកគាំទ្ររបស់ពួកនាងក្នុងប្រទេសជប៉ុន ។ អ្នកតំណាងរបស់ក្រុមនេះ បាននិយាយថា ក្រុមរបស់គេក៏ទទួលបានការស្វាគមន៍ពីប្រិយមិត្តយ៉ាងកក់ក្តៅដែរ ហើយក៏សប្បាយចិត្តនឹងទទួលបានការលើកទឹកចិត្តពីអ្នកគាំទ្រស្ត្រីក្នុងប្រទេសជប៉ុនដែរ ។
អ្នកដែលចូលទស្សនានាពេលនោះមានទស្សនិកជនជាស្ត្រីប្រហែល៨០ភាគរយ។ ជាមួយគ្នានេះដែរ ក្រុមតារាចំរៀងស្រីកូរ៉េនេះនឹងទៅសហរដ្ឋអាមេរិកសំរាប់ទេសចរណ៍តន្ត្រីដែលមានឈ្មោះថា 10 World Tour ដែលនឹងចាប់សំដែងនៅថ្ងៃទី៤ កញ្ញា ខែក្រោយទៅ ៕
