ស្រូវជាង១ម៉ឺនតោនក្នុងមួយខែត្រូវបានលក់ឱ្យឈ្មួញវៀតណាម
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៥:០២
គោកធ្លក
រថយន្តដឹកស្រូវតាមស្រុកគីរីវង់
ខេត្តតាកែវ ៖ យ៉ាងហោចណាស់ក្នុងមួយខែមានស្រូវប្រមាណជាង១ម៉ឺនតោន ត្រូវបានឈ្មួញនាំចេញទៅលក់នៅស្រុកយួន ធ្វើឱ្យអ្នករកស៊ីទិញស្រូវក្នុងស្រុកមានចិត្តរីករាយយ៉ាងខ្លាំង ព្រោះនៅពេលប្រមូលផលបានហើយមានទីផ្សារប្រមូលទិញ ហើយការប្រមូលទិញស្រូវដឹកទាំងរថយន្តៗទៅលក់នៅស្រុកយួនរាល់ថ្ងៃនេះ គឺលក់ចេញតាមច្រក២ មានស្រុកបុរីជលសា និងស្រុកគីរីវង់ ។ មន្ត្រីសាលាខេត្តតាកែវមួយរូបបានប្រាប់កោះសន្តិភាពឱ្យដឹងថា ក្នុងរយៈពេលនេះ ឈ្មួញកំពុងតែប្រមូលទិញស្រូវក្នុងខេត្ត ក៏ដូចជាតាមបណ្តាខេត្តផ្សេងទៀត ពីប្រជាកសិករដោយ១តោនឈ្មួញទិញពីពលរដ្ឋតំលៃ៨០ម៉ឺនរៀល និងលក់ទៅឱ្យឈ្មួញវៀតណាម១តោន១លានរៀល ហើយច្រកស្រុកបុរីជលសា នៅពេលដឹកស្រូវទៅដល់កំពង់ទូកកំពង់អំពិលត្រូវផ្ទេរពីរថយន្តដាក់ទូកដឹកតាមស្ទឹងឆ្លងទៅវៀតណាមតែម្តង ។ ដោយសារតែមានសកម្មភាពដឹកស្រូវទៅលក់ឱ្យឈ្មួញវៀតណាមនេះ គេក៏សង្កេតឃើញកុងត្រូលជជុះចាំស្ទាក់ទូកដឹកទំនិញ ឬទូកដឹកស្រូវយកលុយក៏មិនប្រណីដៃដែរ គឺគ្រាន់តែទូកទទេចូលមកដឹកស្រូវត្រូវយកលុយមួយសា លុះទូកដឹកស្រូវចេញពីកំពង់ត្រូវគេជាន់ក្បាលទូកយកលុយមួយសាទៀត ។
មន្ត្រីសាលាខេត្តដដែលបានបន្តទៀតថា សំរាប់ទូកដឹកស្រូវពីកំពង់ទូកកំពង់អំពិលចំណុះ៥០តោន គឺតាមផ្លូវអស់ពី៥ម៉ឺនទៅ១០ម៉ឺនរៀលសំរាប់ទូក១គ្រឿង លុះទូកស្រូវចូលតាមប្រឡាយឆៃ១ ត្រូវបង់អស់៤០ម៉ឺនរៀលទៀត ។ នេះជាការប្រាប់ឱ្យដឹងពីអ្នករត់ទូក ។ ដោយឡែករថយន្តដឹកស្រូវតាមស្រុកគីរីវង់ វិញ ពេលនេះទឹកឡើង រថយន្តដឹកស្រូវត្រូវចូលផ្ទេរដាក់ទូកនៅប្រឡាយព្រៃតាម៉ៅ ស្ថិតក្នុងឃុំគិរីចុងកោះ ។ ទីនោះក៏សំបូរកុងត្រូលជជុះណាស់ដែរ មានទាំងកំលាំងចំរុះស្រុក និងប៉ូលិសសេដ្ឋកិច្ចរាប់ក្បាលរថយន្តយកលុយ១សា ពេលទូកដាក់ស្រូវចេញដំណើរជាន់ក្បាលទូកយកលុយមួយសាទៀត ។ ប្រភពដដែលបានបញ្ជាក់ថា ពេលនេះស្រូវកំពុងតែត្រូវប៉ាន់ដឹកទៅស្រុកយួនដែលក្នុង១ខែៗ តាមច្រកស្រុកទាំងពីរខាងលើនេះ មានស្រូវជាង១ម៉ឺនតោន ត្រូវបានលក់ចេញ ហើយនៅខែខាងមុខនេះគេជឿថា ស្រូវលក់ទៅស្រុកយួនតាមច្រកស្រុក២នេះ នឹងកើនពី១៥.០០០តោនទៅ២ម៉ឺនតោន ជាក់ជាមិនខាន ៕
