វេទិកាសាធារណៈ «រួមគ្នាទប់ស្កាត់ការជួញដូរនិងការរំលោភផ្លូវភេទលើក្មេងប្រុស»
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៤:២១
រាជធានីភ្នំពេញ ៖ ការសម្តែងសិល្បៈកម្ពុជាដែលរួមមានល្ខោនស្កុប សៀករហស្សកម្ម និងការបញ្ចាំងខ្សែភាពយន្តនឹងរៀបចំធ្វើឡើងដើម្បីបង្ហាញនូវតម្លៃសិល្បៈដ៏ល្អផូរផង់ ហើយជាមួយគ្នានេះផងដែរគឺដើម្បីបញ្ជូនសារទៅកាន់ទស្សនិកជនទាំងអស់ឱ្យបានជ្រាបថា យើងទាំងអស់គ្នាជាតួអង្គដ៏សំខាន់ក្នុងការការពារក្មេងប្រុសចាកផុតពីការរំលោភបំពានផ្លូវភេទ ។ វេទិកាសាធារណៈ «រួមគ្នាទប់ស្កាត់ការជួញដូរនិងការរំលោភផ្លូវភេទលើក្មេងប្រុស» នឹង ប្រព្រឹត្តធ្វើឡើងនៅថ្ងៃសៅរ៍ទី១១ ខែកញ្ញា ចាប់ពីម៉ោង៤រសៀលតទៅនៅសួនច្បារសាធារណៈនាគបាញ់ទឹក«ស្ថិតនៅទល់មុខអគ្គិសនីខេត្ត»ក្នុងខេត្តបាត់ដំបង ។
វេទិកាសាធារណៈនេះរៀបចំឡើងដោយគម្រោងកូនប្រុសខ្ញុំរបស់អង្គការទស្សនៈពិភពលោកកម្ពុជា សហការជាមួយគណៈបញ្ជាការដឹកនាំយុទ្ធនាការក្នុងការប្រយុទ្ធប្រឆាំងអំពើជួញដូរ ការរត់ពន្ធ ការធ្វើអាជីវកម្មលើមនុស្ស និងការធ្វើអាជីវកម្មផ្លូវភេទលើស្ត្រី និងកុមារខេត្តបាត់ដំបង ក្នុងគោលបំណងដើម្បីផ្សព្វផ្សាយការយល់ដឹងអំពីបញ្ហានៃការរំលោភបំពានផ្លូវភេទលើក្មេងប្រុស មធ្យោបាយក្នុងការជួយសង្គ្រោះ និងគាំទ្រក្មេងប្រុសពីការរំលោភបំពានផ្លូវភេទចំពោះឧប្បត្តិហេតុកើតឡើងភ្លាមៗ ព្រមទាំងអំពាវនាវស្វែងរកការគាំទ្រពីសហគមន៍ក្នុងក្រុងបាត់ដំបង ដើម្បីបង្កើតបរិយាកាសរស់នៅប្រកបដោយសុវត្ថិភាពសម្រាប់កុមារ ។
លោកស្រី ម៉ន បូរីណា ប្រធានគម្រោងកូនប្រុសខ្ញុំបានមានប្រសាសន៍ថា វេទិកានេះនឹងមិនត្រឹមតែផ្តល់ការកំសាន្តដល់ទស្សនិកជនប៉ុណ្ណោះទេ ប៉ុន្តែថែមទាំងទាក់ទាញនិងផ្តល់ព័ត៌មានដល់ពួកគាត់ថា ការកេងប្រវ័ញ្ច និងរំលោភបំពានផ្លូវភេទលើក្មេងប្រុសពិតជាកើតមានមែនក្នុងប្រទេសកម្ពុជា ។ ករណីរំលោភបំពានលើក្មេងប្រុសភាគច្រើនកើតឡើងទៅលើក្មេងប្រុសអនាថា ឬក្មេងប្រុសរស់នៅតាមផ្លូវ ក្មេងប្រុសដែលអាណាព្យាបាលមិនអើពើ និងក្មេងប្រុសដែលមានតួនាទីជាអ្នកចំណូលចិញ្ចឹមគ្រួសារជាដើម ។ ថ្មីៗនេះ មានករណីរំលោភផ្លូវភេទលើក្មេងប្រុសចំនួន៣ ត្រូវបានរកឃើញក្នុងខេត្តបាត់ដំបងដែលជនល្មើសសុទ្ធតែជាជនជាតិខ្មែរ ។
អំពើហិង្សាលើកុមារជាពិសេសការរំលោភបំពានផ្លូវភេទ ការជួញដូរលើការកេងប្រវ័ញ្ចផ្លូវភេទរបស់កុមារមានលក្ខណៈទូទៅនៅឡើយនៅកម្ពុជា ។ នៅក្នុងឆ្នាំកន្លងទៅ មានករណីរំលោភផ្លូវភេទលើកុមារីចំនួន៥៧ ត្រូវបានរាយការណ៍នៅក្នុងតំបន់ប្រតិបត្តិការរបស់អង្គការទស្សនៈពិភពលោកកម្ពុជា ។ គ្រប់ករណីដែលរាយការណ៍ទៅអង្គការទស្សនៈពិភពលោកសុទ្ធតែពាក់ព័ន្ធនឹងកុមារី ។ ទោះជាយ៉ាងនេះក្តី គេរកឃើញថា ក្មេងប្រុសនិងបុរសក៏ជាជនរងគ្រោះដោយសារការរំលោភបំពានផ្លូវភេទផងដែរ ។ ក្មេងប្រុសចំនួន១១នាក់ត្រូវបានគេរកឃើញថា ជាជនរងគ្រោះដោយសារការរំលោភបំពានផ្លូវភេទ «ក្នុងឆ្នាំ២០០៩-២០១០»។
នៅក្នុងកិច្ចខំប្រឹងប្រែងដើម្បីលើកកម្ពស់សុវត្ថិភាពរបស់កុមារ គម្រោងកូនប្រុសខ្ញុំរបស់អង្គការទស្សនៈពិភពលោកកម្ពុជាសហការជាមួយរដ្ឋាភិបាល និងសហគមន៍ក្នុងខេត្តបាត់ដំបង និងរាជធានីភ្នំពេញ ដើម្បីធានាការទប់ស្កាត់ការរំលោភបំពានផ្លូវភេទលើក្មេងប្រុស។ អង្គការទស្សនៈពិភពលោកផ្តល់សេវាថែទាំ និងគាំទ្រផ្នែករាងកាយ និងផ្លូវចិត្តដល់ក្មេងប្រុសដែលត្រូវបានរំលោភបំពាន ៕
