ភ្លៀងធ្លាក់ខ្លាំងនៅចិនស្លាប់១០៧នាក់បាត់ខ្លួន៥៩នាក់
ដោយ ៖ ប្រុសកោះ
ថ្ងៃពុធ ទី១៤ ខែកក្កដា ឆ្នាំ២០១០ ម៉ោង ១៧:៥៦
គេហទំព័របរទេស
លំនៅឋានខូចខាតដោយសារភ្លៀងខ្លាំងនៅចិន
តុល្យការមួយចេញផ្សាយកាលពីថ្ងៃទី១៣ កក្កដា ដោយក្រសួងកិច្ចការស៊ីវិលចិនគូសបញ្ជាក់ថា ភ្លៀងធ្លាក់យ៉ាងខ្លាំង និងទឹកជំនន់បណ្ដាលឱ្យមនុស្សស្លាប់១០៧នាក់ និងបាត់ខ្លួន៥៩នាក់ ក្នុងខេត្ដ និងក្រុង១០ ដែលរងការប៉ះពាល់ខ្លាំងជាងគេស្ថិតនៅតាមបណ្ដោយទន្លេយ៉ង់សេ ។ តួលេខចុងក្រោយរបស់ក្រសួងនេះគូសបញ្ជាក់ថា មនុស្ស២៩លាននាក់ រងការប៉ះ ពាល់ដោយភ្លៀងធ្លាក់ខ្លាំងនេះនិងថា មនុស្ស៩៩៧.០០០នាក់ ត្រូវជំលៀសចេញ ។ ការខូចខាតខាងសេដ្ឋកិច្ចដោយផ្ទាល់ទាក់ទិនដល់ភ្លៀងធ្លាក់ខ្លាំងនេះមានដល់១៩,៧៥ពាន់លានយន់ (២,៨៩ពាន់លានដុល្លារ) ។ គេហដ្ឋាន៩៣.០០០ខ្នងរងការបំផ្លាញ ហើយផ្ទៃដីដាំដុះ២៥២.៨០០ហិកតារងការលិចលង់ ។
ខាងឧតុនិយមចិនព្យាករណ៍ថា រយៈពេល៣ថ្ងៃខាងមុខនេះភ្លៀងនឹងបន្ដធ្លាក់ខ្លាំងលើតំបន់ដែលរងការប៉ះពាល់រួចហើយ ក្នុងខេត្ដហ្គីហ្សូ ស៊ីឈួន ហ៊ូបី យ៉ាងស៊ូ ហ្សេយ៉ាង និងអានហ្វី ព្រមទាំងទីក្រុងចុងគិញ ។ ចំណែកសារព័ត៌មានចិនរាយការណ៍កាលពីថ្ងៃទី១៣ កក្កដា ថា ភ្លៀងធ្លាក់ខ្លាំងនៅភាគនិរតីបណ្ដាលឱ្យមានការបាក់ដីជាប្រភពនៃការស្លាប់មនុស្ស១៧នាក់ និងបាត់ខ្លួន៤៤នាក់ ។
ទីភ្នាក់ងារព័ត៌មានចិនស៊ិនហួ គូសបញ្ជាក់ថា ក្រុមជួយសង្គ្រោះត្រូវបានបញ្ជូនទៅកាន់តំបន់មួយនាភាគខាងជើងក្រុងគុនមិញ ខេត្ដយុនណាន់ ព្រមទាំងតំបន់៣ទៀត នៃខេត្ដស៊ីឈួន ៕
