រាជធានីភ្នំពេញ ៖ នៅសាលប្រជុំរួមរបស់សាលាខណ្ឌមានជ័យកាលពីព្រឹកថ្ងៃទី ២១ កក្កដា ឆ្នាំ២០១០ លោកគួច ចំរើន អភិបាលខណ្ឌបានដឹកនាំអង្គប្រជុំដោយផ្ដោតលើការដាក់បទបញ្ជាតឹងរ៉ឹងដល់ភ្នាក់ងារផាកពិន័យក្នុងការផាកពិន័យបុគ្គលដែលបោះ សំរាមចោលលើទីធ្លាសាធារណៈ និងតំបន់ហាមឃាត់ផ្សេងៗគ្មានសណ្ដាប់ធ្នាប់ ។ កិច្ចប្រជុំនោះមានការចូលរួមពីតំណាង មកពីបណ្ដាផ្សារនានាទូទាំងខណ្ឌមានជ័យ និងលោកចៅសង្កាត់ទាំង៨នៅទូទាំងខណ្ឌ ។លោកគួច ចំរើន មានប្រសាសន៍ថា មន្ដ្រីដែលមានភារកិច្ចចុះប្រតិបត្ដិការចាប់ផាកពិន័យជនដែលបោះសំរាមចោលពាសវាលពាសកាលនោះ ត្រូវអនុវត្ដដោយស្មារតីទទួលខុសត្រូវខ្ពស់បំផុតទើបមានប្រសិទ្ធភាព ។
មន្ដ្រីជាភ្នាក់ងារផាកពិន័យមិនត្រូវមានមនោសញ្ចេតនាលើបុគ្គលដែលមានកំហុសទេ ។ ការធ្វើដូច្នេះ គឺដើម្បីឱ្យប្រជាពលរដ្ឋឆាប់ជ្រួតជ្រាបលើការចូលរួមថែ រក្សាបរិស្ថានក្នុងរាជធានីភ្នំពេញតាមរយៈ ពួកគាត់ធ្លាប់ត្រូវទទួលរងការផាកពិន័យ ដោយសារការបោះសំរាមចោលគ្មានសណ្ដាប់ធ្នាប់ ។ ចំពោះកំរិតនៃការផាកពិន័យ គឺចាប់ពីមួយម៉ឺនរៀលឡើងទៅ ។ លោកគួច ចំរើន មានប្រសាសាន៍ថា នៅទីក្រុងសាំងហ្គាពួរអ្នកដែលបោះស្ករកៅស៊ូ ចោលក្រៅពីធុងសំរាម ត្រូវផាកពិន័យម្ដង៥០០ដុល្លារ ។ ចំពោះជនដែលបោះចោលកន្ទុយបារីពាសវាលពាសកាល គឺត្រូវផាកពិន័យ១០០ដុល្លារក្នុងកន្ទុយបារីមួយដើម ។
ការអនុវត្ដវិធានការនេះគឺធ្វើឱ្យទីក្រុង របស់គេមានសោភ័ណភាពគ្រប់ទីកន្លែង ។ ដោយឡែកនៅក្នុងរាជធានីភ្នំពេញ បើមន្ដ្រីតាមមូលដ្ឋាននាំគ្នាអនុវត្ដវិធានការផាកពិន័យលើបុគ្គលដែលមានការធ្វេសប្រហែស ភ្លេចខ្លួនបោះចោលសំរាមប៉ាតណា ប៉ាតណី ឱ្យបានតឹងរ៉ឹងតាមគោលការណ៍កំណត់នោះ ថ្ងៃអនាគតទីក្រុងរបស់យើងនឹងស្អាតដូច បណ្ដាប្រទេសជឿនលឿនដែរ ។ នៅព្រឹកដដែលនោះ លោកអភិបាលខណ្ឌមានជ័យបានអញ្ជើញជាអធិបតីក្នុងពិធីបើក ការដ្ឋានស្ថាបនាផ្លូវបេតុងមួយខ្សែនៅសង្កាត់ ចាក់អង្រែលើខណ្ឌមានជ័យដែលជាគំរោង របស់មូលនិធិសង្កាត់ រួមជាមួយប្រជាពលរដ្ឋ ៕
ចែករំលែកព័តមាននេះ