ក្រុមអ្នកគាំទ្រស្ដ្រីក្នុងឆាកនយោបាយ បើកការពិភាក្សាស្ដីពីការរៃអង្គាសប្រាក់ ជួយលោកស្រីមូរ សុខហួរ
ដោយ ៖ អប្សរា
ថ្ងៃពុធ ទី១៤ ខែកក្កដា ឆ្នាំ២០១០ ម៉ោង ១៦:៣៩
កោះសន្តិភាព
.
រាជធានីភ្នំពេញ ៖ ស្ដ្រីមួយក្រុមតូច ដែលគេមិនសូវស្គាល់ដោយហៅខ្លួនឯងថា “ចលនាស្ដ្រីគាំទ្រស្ដ្រីក្នុងឆាកនយោបាយ” មកពីក្រុមផ្សេងៗគ្នា រួមមានកម្មការិនីកាត់ដេរ ស្ដ្រីលក់ស្រាបៀរ និស្សិត អ្នករត់ម៉ូតូឌុប កសិករ គ្រូបង្រៀន បានជួបជុំគ្នាកាលពីថ្ងៃ ថ្ងៃទី១៤ កក្កដា ឆ្នាំ២០១០ បើកការពិភាក្សា លើបញ្ហាស្ម័គ្រចិត្ដធ្វើការរៃអង្គាសប្រាក់តាម លទ្ធភាពដើម្បីជួយដល់លោកស្រីមូរ សុខហួរ ក្នុងការបង់ប្រាក់ពិន័យ និងសំណងជំងឺចិត្ដ ទៅឱ្យសម្ដេចនាយករដ្ឋមន្ដ្រី ហ៊ុន សែន បន្ទាប់ពីចាញ់ក្ដីពីបទបរិហារកេរ្ដិ៍ ។ក្រុមស្ដ្រីដែលមានឆន្ទៈចង់ជួយដល់អ្នកនយោបាយស្ដ្រី ជាពិសេសលោកស្រី មូរ សុខហួរ បានឱ្យដឹងទៀតថា ពួកគេបានរកលុយបានចំនួនជាង២,៦លានរៀល ពីអ្នកគាំទ្រ ប្រមាណជាង១.០០០នាក់ដែលបានបរិច្ចាគ។
តំណាងចលនាស្ដ្រីបានថ្លែងថា គេមិនចង់ឃើញលោកស្រីមូរ សុខហួរ ជាប់គុកទេ។ ក្នុងសន្និសីទកាសែតកាលពីម្សិលមិញ ក្រុមស្ដ្រីដែលគាំទ្រស្ដ្រីឱ្យប្រឡូកក្នុងវិស័យនយោបាយបានហៅករណីប្ដឹងប្ដល់រវាងលោកស្រី មូរ សុខហួរ និងសម្ដេចនាយករដ្ឋមន្ដ្រីជា ករណីលើកទី១សំរាប់ស្ដ្រីខ្មែរ ។ កញ្ញានាង សុវ៉ាតនា អាយុ២៣ឆ្នាំ ដែលអះអាងថា ជានិស្សិតមួយរូបបាននិយាយថា ក្រុមស្ដ្រីដែលមានបំណងចូលរួមក្នុងវិស័យនយោបាយនា ពេលអនាគតកំពុងតែយកចិត្ដទុកដាក់ចំពោះ ករណីលោកស្រី មូរ សុខហួរ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្ដិភាព .
