រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៣កុម្ភៈ ២០១៦ នេះ បានអំពាវនាវដល់ជល់រួមជាតិកម្ពុជាទាំងឡាយ «យល់ដឹង និងប្រយ័ត្នអំពីមីន និងគ្រាប់មិនទាន់ផ្ទុះ» ។ ការអំពាវនាវរបស់សម្តេចតេជោ បានសរសេរនៅក្នុងបណ្តាញទំនាក់ទំនងសង្គមរបស់សម្តេចផ្ទាល់ ។
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៣កុម្ភៈ ២០១៦ នេះ បានអំពាវនាវដល់ជល់រួមជាតិកម្ពុជាទាំងឡាយ «យល់ដឹង និងប្រយ័ត្នអំពីមីន និងគ្រាប់មិនទាន់ផ្ទុះ» ។ ការអំពាវនាវរបស់សម្តេចតេជោ បានសរសេរនៅក្នុងបណ្តាញទំនាក់ទំនងសង្គមរបស់សម្តេចផ្ទាល់ ។
សម្តេចនាយករដ្ឋមន្ត្រីបានសរសេរទៀតថា កម្ពុជាបានចាប់ផ្ដើមបោសសំអាតគ្រាប់មីន ជាលក្ខណៈមនុស្សធម៌ និងជាបន្ទាន់នៅឆ្នាំ១៩៩២ ដើម្បីធានាសុវត្ថិភាព និងផ្ដល់ដីបង្កបង្កើនផល សម្រាប់ការធ្វើមាតុភូមិនិវត្ដន៍របស់ប្រជាជនភៀសសឹក មកពីតាមព្រំដែនកម្ពុជា-ថៃ ។
សម្តេចបានសរសេរបន្តថា ទន្ទឹមនិងនោះ គឺរំដោះដីជូនប្រជាពលរដ្ឋទូទៅធ្វើស្រែចំការ រៀបចំភូមិដ្ឋាន ផ្លូវថ្នល់សាលារៀន វត្ដអារាម ដើម្បីជីវិតរស់នៅដ៏សុខសាន្ដរបស់ប្រជាជន និងដើម្បីរដ្ឋាភិបាលមានឱកាសកសាងហេដ្ឋារចនាសម្ព័ន្ធជាសារវន្ដនានារបស់ជាតិ ។ សម្តេចបានសរសេរបញ្ជាក់ថា ចាប់តាំងពីឆ្នាំ១៩៩៥ មក រាជរដ្ឋាភិបាលកម្ពុជាបានរៀបចំទិវាយល់ដឹងអំពីមីននៅថ្ងៃទី២៤ កុម្ភៈ ដើម្បីអប់រំប្រជាពលរដ្ឋអោយយល់ដឹងពីគ្រោះថ្នាក់មីន និងគ្រាប់មិនទាន់ផ្ទុះ ព្រមទាំងវិធានការសង្គ្រោះជនរងគ្រោះដោយសារមីន ។សូមប្រជាពលរដ្ឋចូលរួមទាំងអស់គ្នា ដើម្បីចៀសវាងគ្រោះថ្នាក់នេះ ។
សម្តេចនាយករដ្ឋមន្ត្រីបានសរសេរក្នុងហ្វេសប៊ុក (Facebook) ថា សូមគ្រប់ស្ថាប័ន និងដៃគូពាក់ព័ន្ធ ជាពិសេសអាជ្ញាធរដែនដី ត្រូវតែយកចិត្ដទុកដាក់ពិនិត្យតាមដានសកម្មភាព និងគ្រប់បញ្ហាដែលកើតមានឡើងនៅក្នុងទឹកដីភូមិសាស្ដ្ររបស់ខ្លួន ដែលបានបង្កគ្រោះថ្នាក់មកលើប្រជាពលរដ្ឋដោយសារគ្រាប់មីន និងគ្រាប់មិនទាន់ផ្ទុះ ។
សម្តេចតេជោបានសរសេរដោយផ្ទល់ជាយុទ្ធសាស្ត្រថា «ត្រូវធ្វើសកម្មភាពអប់រំប្រជាពលរដ្ឋឱ្យយល់ដឹងចេះការពារខ្លួន និងដោះស្រាយជាបន្ទាន់នូវសំណូមពររបស់ប្រជាពលរដ្ឋ ។ ចំពោះបងប្អូនប្រជាពលរដ្ឋយុវជន និងសិស្សានុសិស្ស សូមប្រយ័ត្ន និងកុំប៉ះពាល់គ្រាប់មីន និងគ្រាប់មិនទាន់ផ្ទុះដែលអាចបណ្តាលឱ្យមានគ្រោះថ្នាក់» ។
ចែករំលែកព័តមាននេះ