រាជធានីកាន់តែរីកធំ២៧ឃុំពីស្រុកចំនួន៧ក្នុងខេត្តកណ្តាលនឹងផ្ទេរការគ្រប់គ្រងរដ្ឋបាល
ដោយ ៖ឈិត គឹមឆុន
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ០៩:៤៩
រាជធានីភ្នំពេញ ៖ នៅក្នុងសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី៣ កញ្ញា កន្លងមកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសំរេចឱ្យមានការកាត់យកឃុំចំនួន២៧ ក្នុងស្រុក៧នៃខេត្តកណ្តាល ឱ្យស្ថិតនៅក្រោមការគ្រប់គ្រងរដ្ឋបាលរបស់រាជធានីភ្នំពេញ ។ នេះមិនមែនជាការកាត់យកលើកដំបូងពីភូមិសាស្ត្ររដ្ឋបាលខេត្តកណ្តាលនោះទេ ដែលមុននេះខណ្ឌដង្កោ ក៏ជាអតីតស្រុកដង្កោរបស់ខេត្តកណ្តាលផងដែរ ត្រូវបានកាត់មកស្ថិតក្រោមការគ្រប់គ្រងរបស់ក្រុងភ្នំពេញ នៅឆ្នាំ១៩៨៦ ដែលកាលណោះក្នុងសម័យសាធារណរដ្ឋប្រជាមានិតកម្ពុជា ។
ការកាត់យកឃុំចំនួន២៧ ពីស្រុកចំនួន៧របស់ខេត្តកណ្តាល ដែលនៅព័ទ្ធជុំវិញរាជធានីភ្នំពេញ គឺជាការវិវត្តន៍មួយនៃការរីកធំកាន់តែទូលំទូលាយនៃរាជធានីភ្នំពេញ ដែលពីសម័យមុនសង្គ្រាមមានមនុស្សមិនដល់១លាននាក់ទេ ដែលបានរស់នៅ ហើយនៅសម័យសង្គ្រាមឆ្នាំ៧០ មានមនុស្សប្រមាណជាង១លាននាក់ តែបច្ចុប្បន្ននេះរាជធានីភ្នំពេញមានអ្នករស់នៅប្រមាណជាង៣លាននាក់ហើយ។ ជាបន្តបន្ទាប់ចំនួនប្រជាពលរដ្ឋក្នុងរាជធានី នឹងកើនឡើងទៀត នេះមិនទាន់និយាយពីអ្នកមកស្នាក់នៅធ្វើការរកសីុបណ្តោះអាសន្នផងទេ ។
មន្ត្រីសាលារាជធានី បានឱ្យដឹងថា តាមចំណារដ៏ខ្ពង់ខ្ពស់របស់សម្តេចតេជោ មានតាំងពី ឆ្នាំ២០០៥ មកម៉្លេះ បានឱ្យក្រសួងមហាផ្ទៃរៀបចំបែបបទដើម្បីផ្ទេរ ដូច្នេះសំរាប់ដំណើរការនេះ នឹងអនុវត្តទៅតាមអនុសាសន៍របស់សម្តេចតេជោ ដែលបានកំណត់ក្នុងសម័យប្រជុំគណៈរដ្ឋមន្ត្រីថ្មីៗនេះ ដែលជាការឆ្លើយតបទៅនឹងការរីកកាន់តែធំនៃទីក្រុងរបស់យើង ។ ចំពោះឃុំចំនួន២៧ នៃស្រុកចំនួន៧ ក្នុងខេត្តកណ្តាល ដាក់ឱ្យស្ថិតក្រោមការគ្រប់គ្រងរដ្ឋបាលរបស់រាជធានីភ្នំពេញ មានដូចតទៅ ៖ ១-ស្រុកពញាឮ បញ្ចូល៣ឃុំ លើ១៤ឃុំ ឃុំព្រែកព្នៅ សំរោង និងឃុំពញាពន់ ។ ២-ស្រុកអង្គស្នួល បញ្ចូល៦ឃុំ លើ១៦ឃុំ ឃុំពន្សាំង ស្នោ ឱឡោក បឹងធំ កំបូល កន្ទោក ។ ៣-ស្រុកកណ្តាលស្ទឹង បញ្ចូល៥ឃុំ លើ២៣ឃុំ ឃុំគងនយ ទៀន រលួស ស្ពានថ្ម ព្រែកកំពឹស ។ ៤-ស្រុកកៀនស្វាយ បញ្ចូល៤ឃុំ លើ១២ឃុំ ឃុំវាលស្បូវ ព្រែកឯង ក្បាលកោះ ព្រែកថ្មី។ ៥-ស្រុកល្វាឯម បញ្ចូល២ឃុំ លើ១៥ឃុំ ឃុំអរិយក្សត្រ សារិកាកែវ ។ ៦-ស្រុកខ្សាច់កណ្តាល បញ្ចូល៥ឃុំ លើ១៨ឃុំ ឃុំស្វាយជ្រុំ ព្រែកតាកូវ ព្រែកលួង ព្រែកអំពិល កោះឧកញ៉ាតី ។ និង៧-ស្រុកមុខកំពូល បញ្ចូល២ឃុំ លើ៩ឃុំ ឃុំបាក់ខែង កោះដាច់ ៕
