អ្នកទេសចរបរទេសជាង២លាន៤សែននាក់នៅឆ្នាំ២០១០
ដោយ ៖ អប្សរា
ថ្ងៃពុធ ទី១១ ខែសីហា ឆ្នាំ២០១០ ម៉ោង ០៩:២៩
រាជធានីភ្នំពេញ ៖ កិច្ចប្រជុំបូកសរុបការអនុវត្ដការងារទេសចរណ៍ឆមាសទី១ និងទិសដៅការងារឆមាសទី២ ឆ្នាំ២០១០ បានប្រារឰធ្វើឡើងនៅសណ្ឋាគារភ្នំពេញ កាលពី ថ្ងៃទី៩ សីហា ក្រោមអធិបតីភាពលោក ថោង ខុន រដ្ឋមន្ដ្រីក្រសួងទេសចរណ៍ និងមានការ ចូលរួមដោយតំណាងមកពីក្រសួង-ស្ថាប័នពាក់ព័ន្ធ អង្គការជាតិ-អន្ដរជាតិ សហគមន៍ទេសចរណ៍ និងផ្នែកឯកជនយ៉ាងច្រើនកុះករ ។ លោកថោង ខុន បានថ្លែងថា កិច្ចប្រជុំលើកនេះ ធ្វើឡើងដើម្បីបូកសរុប និងឆ្លុះបញ្ចាំងពីលទ្ធផលការងារដែលសំរេចបានក្នុងឆមាសទី១ និងលើកទិសដៅសំរាប់អនុវត្ដនៅឆមាសទី២ ឆ្នាំ២០១០ បន្ដទៀត ដើម្បីឆ្ពោះទៅធ្វើការរៀបចំព្រឹត្ដិការណ៍វេទិកាទេសចរណ៍អាស៊ាន (ATF) នៅខែមករា ឆ្នាំ២០១១ ។ វិស័យទេសចរណ៍ជាវិស័យមួយដែលមានលក្ខណៈ ជាប្រព័ន្ធ ទាមទារឱ្យមានការចូលរួមពីគ្រប់ ភាគីពាក់ព័ន្ធទាំងអស់ ហើយក៏ជាវិស័យអាទិ ភាពមួយក្នុងចំណោមវិស័យអាទិភាពទាំង១០ ដែលបានដាក់ចេញក្នុងយុទ្ធសាស្ដ្រចតុកោណ ដំណាក់កាលទី២របស់រាជរដ្ឋាភិបាលអាណត្ដិទី៤នេះ ដែលមានសម្ដេចអគ្គមហាសេនាបតី តេជោហ៊ុន សែន ជាប្រមុខ ។
វិស័យនេះបាន រួមចំណែកក្នុងការអភិវឌ្ឍសេដ្ឋកិច្ច-សង្គម ការបង្កើនឱកាសការងារ ការបង្កើនប្រាក់ចំណូល ការលើកកំពស់ជីវភាពរស់នៅ និងការកាត់បន្ថយភាពក្រីក្ររបស់ប្រជាពលរដ្ឋ ព្រមទាំងចូលរួមដល់ការកសាងសេដ្ឋកិច្ចបៃតង ស្របនឹងនិន្នាការសាកលលោកនាពេលបច្ចុប្បន្ន ។ ជាក់ស្ដែង យោងតាមការវាយតំលៃរបស់អង្គការទេសចរណ៍ពិភពលោក (UNWTO) វិស័យទេសចរណ៍បានរួមចំណែកប្រមាណ៤៥% នៃការនាំចេញសេវាកម្មសរុបរបស់បណ្ដា ប្រទេសកំពុងអភិវឌ្ឍន៍ ហើយវិស័យនេះ បាន និងកំពុងដើរតួនាទីយ៉ាងសំខាន់ក្នុងការសំរេច ឱ្យបាននូវគោលដៅអភិវឌ្ឍន៍សហស្សវត្សរបស់ អង្គការសហប្រជាជាតិ ពិសេសកាត់បន្ថយភាពក្រីក្រ ការជំរុញសមភាពយេនឌ័រ ការអភិរក្ស បរិស្ថានប្រកបដោយនិរន្ដរភាព និងភាពជាដៃ គូសំរាប់ការអភិវឌ្ឍ ។ លោកថោង ខុន បានលើកឡើងពីសភាពការណ៍ទេសចរណ៍ពិភពលោក សភាពការណ៍ ទេសចរណ៍តំបន់អាស៊ាន និងសភាពការណ៍ទេសចរណ៍កម្ពុជា ។ ចំពោះសភាពការណ៍ទេសចរណ៍ពិភពលោក លោករដ្ឋមន្ដ្រីបានបញ្ជាក់ថា កាលពីឆ្នាំ២០០៩ ការមកដល់របស់ទេសចរ អន្ដរជាតិ មានត្រឹមតែ៨៨០លាននាក់ថយចុះ អត្រា (-៤,៣%) ក្នុងនោះអាស៊ីប៉ាស៊ីហ្វិកធ្លាក់ ចុះ(-១,៩%) អឺរ៉ុបធ្លាក់ចុះ(-៥,៦%) មជ្ឈិមបូព៌ាធ្លាក់ចុះ(-៥,៦%) និងអាមេរិកធ្លាក់ចុះ(-៥%) លើកលែងតែអាហ្វ្រិកមានការកើនឡើង (៥%) ។
ការសង្កេតជារួមនៅឆ្នាំ២០០៩ ការវិវត្ដទេសចរណ៍សាកលលោកត្រូវបានចែក ជា២ដំណាក់កាល គឺ៦ខែ ដើមឆ្នាំ ធ្លាក់ចុះ(-៦%) តែបានកើនឡើងបន្ដិចវិញ ចាប់ពី៦ខែ ចុងឆ្នាំ២០០៩ ។ មកដល់ឆ្នាំ២០១០នេះ ជាមួយ នឹងសញ្ញាងើបឡើងវិញនៃសេដ្ឋកិច្ចសាកល លោក ទោះជានៅមានភាពមិនទាន់ប្រាកដ ប្រជាសំរាប់តំបន់មួយចំនួនពិសេសតំបន់អឺរ៉ុបក្ដី ក៏យើងសង្កេតឃើញថា ក្នុងរយៈពេល៤ខែដើមឆ្នាំនេះ ទេសចរណ៍ពិភពលោកទទួលបានភ្ញៀវទេសចរអន្ដរជាតិចំនួន២៥៨លាននាក់ ក្នុងកំណើនប្រមាណ៧% បើប្រៀបធៀបរយៈពេល ដូចគ្នាទៅនឹងឆ្នាំ២០០៩ ។ ចំពោះសភាពការណ៍ទេសចរណ៍នៅក្នុងតំបន់អាស៊ាន លោក ថោង ខុន បានឱ្យដឹងថា ប្រទេសអាស៊ានទាំង១០ ត្រូវបានមើលឃើញថា ជាតំបន់ដែលមានការអភិវឌ្ឍទេសចរណ៍ យ៉ាងខ្លាំងក្លាមួយនៃពិភពលោក ។ ជាក់ស្ដែង នៅឆ្នាំ២០០៩ ទោះបីស្ថិតក្រោមរលកនៃវិបត្ដិសេដ្ឋកិច្ចសាកលលោកក្ដីក៏អាស៊ានទទួលបាន ភ្ញៀវទេសចរអន្ដរជាតិជាង៦៥លាននាក់ ជាមួយអត្រាកំណើន០,១៩% ។ ទាក់ទង នឹងសភាពការណ៍ទេសចរណ៍នៅក្នុងប្រទេសកម្ពុជា លោករដ្ឋមន្ដ្រីថោង ខុន បានអះអាងថា ទេសចរណ៍កម្ពុជាបាននិងកំពុងមានសន្ទុះ រីកចំរើននៅក្នុងដំណាក់កាលងើបឡើងវិញនៃ វិបត្ដិសេដ្ឋកិច្ចពិភពលោក ។
សំរាប់ឆមាសទី១ ឆ្នាំ២០១០នេះ ភ្ញៀវទេសចរអន្ដរជាតិមក ទស្សនាកម្ពុជាមានចំនួន១.២២១.១៥៦នាក់ កើនឡើងក្នុងអត្រា១២,៣៩% ធៀបនឹងរយៈ ពេលដូចគ្នាឆ្នាំ២០០៩ ។ សភាពការណ៍នេះ បានបង្ហាញនូវនិន្នាការនៃការបន្ដស្ទុះងើបឡើង វិញយ៉ាងឆាប់រហ័សនៃវិស័យទេសចរណ៍កម្ពុជា ដែលតាមការសិក្សាជំហានដំបូងបានព្យាករណ៍ថា យើងអាចទទួលបានអ្នកទេសចរ ប្រមាណ២,៤លាននាក់ សំរាប់ឆ្នាំ២០១០ ក្នុងអត្រាកំណើនប្រមាណ១២% ។ លោករដ្ឋមន្ដ្រីបានសង្កត់ធ្ងន់ថា ដោយឡែកសកម្មភាពទេសចរណ៍ក្នុងស្រុកក៏មានសន្ទុះ កើនឡើងគួរឱ្យកត់សំគាល់ដែរនៅក្នុងឆមាសទី១នេះ ក្នុងអត្រាកំណើនប្រមាណ៧% ដែលបញ្ជាក់កាន់តែច្បាស់ថា កម្ពុជាមានសុខសន្ដិភាព ស្ថិរភាពនយោបាយ សន្ដិសុខ សុវត្ថិភាព បរិបូរណ៍ ហេដ្ឋារចនាសម្ព័ន្ធល្អប្រសើរ រមណីយ ដ្ឋានស្អាត សេវាទេសចរណ៍ល្អ និងស្ថានភាព សេដ្ឋកិច្ច មានលំនឹងល្អ ។ ស្របនឹងស្ថានភាពនេះ ក៏បានបង្ហាញផងដែរនូវកំណើនទេសចរ កម្ពុជាចេញទៅក្រៅប្រទេសចំនួន ២៣២.៣១៧នាក់ គឺកើន៥៩% ។ ជោគជ័យ ទាំងនេះគឺដោយសារប្រសិទ្ធភាពនៃយុទ្ធសាស្ដ្រ គន្លឹះទាំង៧ចំណុច ដែលដាក់ចេញដោយ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រី ក្នុងដំណាក់កាលមានវិបត្ដិដូច ជាការជំរុញការផ្សព្វផ្សាយ ការសំរួលការធ្វើ ដំណើរនិងការដឹកជញ្ជូនទេសចរ ការកាត់បន្ថយ តំលៃកញ្ចប់ទេសចរណ៍ ការបង្កើតផលិតផល ទេសចរណ៍ថ្មី ការពង្រឹងគុណភាពផលិតផល និងសេវាកម្មទេសចរណ៍ ការជំរុញចលនាទេស ចរក្នុងស្រុក និងការការពារសន្ដិសុខរក្សា សុវត្ថិភាពទេសចរ ។
លោករដ្ឋមន្ត្រីបានលើកឡើងទៀតថា ដោយសារតែប្រទេសកម្ពុជារក្សាបាននូវសន្តិភាព និងសន្តិសុខល្អពេញលេញ រួមផ្សំជាមួយប្រទេសកម្ពុជាយើងសំបូរទៅដោយរមណីយដ្ឋានវប្បធម៌ និងធម្មជាតិយ៉ាងសំបូរបែប ក្នុងនោះមានប្រាសាទអង្គរវត្ត និងប្រាសាទព្រះវិហារជាបេតិកភណ្ឌពិភពលោកដ៏ល្បីល្បាញ និងតំបន់ឆ្នេរសមុទ្រ រួមទាំងតំបន់អេកូទេសចរណ៍នៅតំបន់ខ្ពង់រាប និងត្រីផ្សោតនៅខេត្តក្រចេះផងនោះ បានធ្វើឱ្យប្រទេសកម្ពុជានៅតែជាគោលដៅទេសចរណ៍វប្បធម៌ និងធម្មជាតិដ៏សំខាន់មួយនៅក្នុងតំបន់ ដែលធ្វើឱ្យកំណើនភ្ញៀវទេសចរកើនឡើងពីមួយឆ្នាំទៅមួយឆ្នាំ ។ វិស័យទេសចរណ៍ត្រូវបានគេចាត់ទុកថា ជាឧស្សាហកម្មគ្មានផ្សែង ប៉ុន្តែអាចទាញយកចំណូលយ៉ាងច្រើនសំបើម សំរាប់បង្កើនកំណើនសេដ្ឋកិច្ចជាតិបានយ៉ាងល្អ និងមានការបំពុលបរិស្ថានតិចតួចបំផុត ក៏ប៉ុន្តវិស័យដ៏សំខាន់នេះត្រូវបានស្រុតចុះយ៉ាងគំហុកខណៈ ពេលដែលសេដ្ឋកិច្ចពិភពលោកបានរអិល ដាំក្បាលចុះក្រោមតាំងពីឆ្នាំ២០០៨រហូតមក ។ ក្រុមអ្នកវិភាគសេដ្ឋកិច្ចបានធ្វើការប៉ាន់ប្រមាណថា ភ្ញៀវទេសចរបរទេសដែលមកទស្សនាប្រទេសកម្ពុជាបានចំណាយជាមធ្យម៧០០ដុល្លារក្នុងម្នាក់ ដោយមិនគិតពីសំបុត្រយន្តហោះ និងថ្លៃទិដ្ឋាការ ដូច្នេះបើប្រទេសកម្ពុជាទទួលបានភ្ញៀវទេសចរជាង២លាន៤សែននាក់ដូចការរំពឹងទុករបស់មន្ត្រីក្រសួង ទេសចរណ៍នោះ គឺប្រទេសកម្ពុជាអាចទទួលបានចំណូលគួរឱ្យកក់ក្តៅមិនខានសំរាប់ឧស្សាហកម្មគ្មានផ្សែងនេះ ៕
