រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវបាននគរបាលប៉ុស្តិ៍រដ្ឋបាលផ្សារដើមថ្កូវ សហការជាមួយកម្លាំងប្រជាការពារសង្កាត់ផ្សារដើមថ្កូវ ធ្វើការស្រាវជ្រាវឈានដល់ការឃាត់ខ្លួន ក្រោយពីរូបគេនិងបក្សពួកម្នាក់ទៀត បានធ្វើសកម្មភាពគាស់ផ្ទះចូលលួចយកម៉ូតូមួយគ្រឿងបានហើយយកទៅលាក់ទុកនៅកន្លែងផ្ញើម៉ូតូមន្ទីរពេទ្យកាល់ម៉ែត កាលពីវេលាម៉ោង៦និង៣០នាទីព្រឹកថ្ងៃទី១៧ មករា នៅចំណុចផ្ទះជួលលេខ៣៥២ សង្កាត់ផ្សារដើមថ្កូវ ខណ្ឌចំការមន ។
មន្ត្រីនគរបាលបានឱ្យដឹងថា ជនសង្ស័យឈ្មោះ សូ បញ្ញា អាយុ២០ឆ្នាំ មុខរបរនិងទីលំនៅមិនពិតប្រាកដ ។ ចំណែកម្ចាស់ម៉ូតូឈ្មោះ ហេង ស៊ីណូ អាយុ២៥ឆ្នាំ ជានិស្សិត ស្នាក់នៅផ្ទះជួលកើតហេតុខាងលើ ។
មន្ត្រីនគរបាលបានបន្តថា នៅយប់មុនកើតហេតុ ម្ចាស់ម៉ូតូបានទុកម៉ូតូរបស់ខ្លួននៅខាងក្រោម និងឡើងទៅដេកលើឡៅតឿ ដោយគ្រាន់តែយកខ្សែចងទ្វារបិទ និងមិនបានចាក់សោត្រឹមត្រូវឡើយ លុះព្រឹកឡើងពេលភ្ញាក់ពីដំណេកចុះមកក្រោមឃើញទ្វារចំហហើយបាត់ម៉ូតូ ។ ក្រោយកើតហេតុ យុវនិស្សិតម្ចាស់ម៉ូតូក៏បានទៅដាក់ពាក្យបណ្តឹងនៅនគរបាលប៉ុស្តិ៍ផ្សារដើថ្កូវ ហើយកម្លាំងប្រជាការពារសង្កាត់ផ្សាដើមថ្កូវក៏ធ្វើការស្រាវជ្រាវទើបឈានទៅឃាត់ខ្លួនជនសង្ស័យខាងលើបានម្នាក់ចំណែកឯជនសង្ស័យម្នាក់ទៀតរត់គេចខ្លួនបាត់ ។
នៅចំពោះមុខសមត្ថកិច្ចជនសង្ស័យបានសារភាពថា គេពិតជាបានធ្វើសកម្មភាពគាស់ផ្ទះជួលខាងលើលួចយកម៉ូតូមួយគ្រឿងរបស់យុវនិស្សិតខាងលើប្រាកដមែន ដោយបានយកទៅលាក់ទុកនៅកន្លែងផ្ញើម៉ូតូខាងលើ ។
ជនសង្ស័យម្នាក់ខាងលើ ត្រូវបានសមត្ថកិច្ចធ្វើកំណត់ហេតុបញ្ជូនទៅអធិការដ្ឋាននគរបាលខណ្ឌចំការមន ដើម្បីចាត់ការទៅតាមនីតិវិធី ។ ចំណែកម៉ូតូដែលដកហូតបានត្រូវបាននគរបាលប្រគល់ទៅឱ្យម្ចាស់ដើមវិញ ៕
ចែករំលែកព័តមាននេះ