ខេត្តកំពង់ស្ពឺ ៖ សេចក្តីរាយការណ៍ជំហានដំបូងឱ្យដឹងថា មនុស្ស០៤ស្លាប់ និងរងរបួសធ្ងន់-ស្រាលជិត២០នាក់ ក្នុងហេតុការណ៍គ្រោះថ្នាក់ចរាចរណ៍មួយ រវាងរថយន្តដឹកកម្មករចំនួន២គ្រឿង បើកជែងគ្នាមិនប្រយ័ត្នក៏ជ្រុលបុកគ្នាយ៉ាងពេញទំហឹង បណ្តាលឱ្យរថយន្តមួយគ្រឿងក្រឡាប់ផ្ងារជើង ដែលហេតុការណ៍នេះកើតឡើងនាវេលាម៉ោង០៦ និង៤០នាទីព្រឹកថ្ងៃទី១២ មករា ២០១៦ ស្ថិតនៅចំណុចភូមិតាគួន ឃុំរកាកោះ ស្រុកគងពិសី ខេត្តកំពង់ស្ពឺ ។
ប្រភពឱ្យដឹងថា ជនរងគ្រោះដែលស្លាប់ទាំង៤នាក់ ១-ឈ្មោះស៊ីម សុខុម អាយុ៣៣ឆ្នាំ ២-ឈ្មោះណុប លីម អាយុ៣៩ឆ្នាំ ៣-ឈ្មោះស្រី ម៉ិច អាយុ២៦ឆ្នាំ និង៤-ឈ្មោះអ៊ីវ ស្រីមុំ អាយុ៣០ឆ្នាំ ។ ចំណែកអ្នករងរបួសមិនត្រូវបានស្គាល់អត្តសញ្ញាណនោះទេ ដោយត្រូវបានបញ្ជូនទៅសង្គ្រោះភ្លាមៗ ។
បើតាមការអះអាងរបស់កម្មករឱ្យដឹងថា មុនពេលកើតហេតុ រថយន្តដឹកកម្មករទាំង២គ្រឿងនេះ ធ្វើដំណើរស្របទិសគ្នា ដោយរថយន្តបង្កពាក់ស្លាកលេខភ្នំពេញ2Q-0120 បានបើកជែងគ្នាចុះឡើងៗជាមួយរថយន្តដឹកកម្មករមួយគ្រឿងទៀតពាក់ស្លាកលេខភ្នំពេញ 2A-6890 ។ លុះមកដល់ចំណុចកើតហេតុ រថយន្តបង្កក៏បើកជែងម្តងគ្នាជួបរថយន្តមួយគ្រឿងនៅខាងមុខ ក៏អែបស្តាំវិញបណ្តាលឱ្យប៉ះរថយន្តដឹកកម្មករ បណ្តាលឱ្យក្រឡាប់តែម្តង ។
ចែករំលែកព័តមាននេះ