មេដឹកនាំនយោបាយកូរ៉េខាងជើងនឹងបើកកិច្ចប្រជុំកម្រមួយក្នុងខែនេះ
ដោយ ៖ ប្រុសកោះ
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៥:២៣
គេហទំព័របរទេស
លោកគីម ជុងអ៊ុន
បណ្តាមេដឹកនាំនយោបាយកូរ៉េខាងជើងត្រូវបានគេរំពឹងទុកថានឹងជួបប្រជុំគ្នានៅក្នុងខែនេះ ក្នុងកិច្ចប្រជុំដ៏កម្រមួយ ដែលគេសន្និដ្ឋានថា រៀបចំឡើងដើម្បីកំណត់ពីការផ្ទេរអំណាចរបស់លោកគីម ជុងអ៊ីល ទៅឱ្យកូនប្រុសពៅរបស់លោក ។ លោកគីម ជុងអ៊ីល បានក្លាយជាមេដឹកនាំកូរ៉េខាងជើងអស់រយៈពេល២០ឆ្នាំ ហើយដោយលោកបន្តវេនពីឪពុករបស់លោកដែរ ។
អ្នកចេះដឹងកូរ៉េខាងជើងម្នាក់និយាយថា ប្រសិនបើលោកគីម ជុងអ៊ីល ផ្ទេរអំណាចទៅឱ្យកូនប្រុសរបស់លោកកាន់តែឆាប់ គឺកាន់តែល្អ ព្រោះអាចផ្តល់ឱកាសច្រើនដល់កូនប្រុសរបស់លោកក្នុងការពង្រឹងអំណាច និងបង្កើតបណ្តាញទំនាក់ទំនងជាមួយអង្គការសន្តិសុខ ។ ដំណើរទស្សនកិច្ចរបស់លោកគីម ជុងអ៊ីល ទៅកាន់ប្រទេសចិន កាលពីចុងខែសីហាកន្លងមក ត្រូវបានគេមើលឃើញថា ដើម្បីប្រមែប្រមូលការគាំទ្រសំរាប់កូនប្រុសរបស់លោកដែលលោកមានបំណងផ្ទេរអំណាចឱ្យ ។ កាលពីខែមិថុនាកន្លងមក កូរ៉េខាងជើងមានការព្រួយបារម្ភយ៉ាងខ្លាំងអំពីមេដឹកនាំរបស់ខ្លួន ដែលជាការត្រួសត្រាយផ្លូវសំរាប់លោកគីម ជុងអ៊ុន កូនប្រុសរបស់លោកគីម ជុងអ៊ីល ក្នុងការក្លាយជាមេដឹកនាំ ៕
