ប្រទេសអីុរ៉ង់កាលពីថ្ងៃទី៧ មករា បានចោទប្រកាន់កងយន្តហោះអារ៉ាប៊ី សាអ៊ូឌីត ថា វាយប្រហារលើស្ថានទូតខ្លួនប្រចាំប្រទេសយេម៉ែន ហើយប្រកាសពីការសម្រេចចិត្តរបស់ខ្លួនបញ្ជូនសំណុំរឿងនេះ ដល់ក្រុមប្រឹក្សាសន្តិសុខ អ.ស.បដែលនេះជារឿងថ្មីដែលបង្កើនភាពតានតឹងកាន់តែខ្លាំងរវាងប្រទេសទាំង២ ។
ក្រុងតេហេរ៉ង់បានសម្រេចហាមឃាត់ការនាំចូលរាល់ផលិតផលរបស់អារ៉ាប៊ី សាអ៊ូឌីត ក៏ប៉ុន្តែទីក្រុងរីយ៉ាដជាប្រភពនៃកំហឹងរបស់ពិភពស៊ីអីុត ក្រោយការប្រហារជីវិតមេដឹកនាំសាសនាស៊ីអីុត អារ៉ាប៊ី សាអ៊ូឌីត មួយរូបបានបដិសេធថា ពុំបានវាយប្រហារលើស្ថានទូតអុីរ៉ង់ប្រចាំក្រុងសាណាឡើយ ។
អនុរដ្ឋមន្ត្រីការបរទេសអីុរ៉ង់ លោក HOSSEIN AMIR ABDOLLAHIAN ថ្លែងថា ក្នុងការវាយប្រហារតាមអាកាសមួយរបស់អារ៉ាប៊ី សាអ៊ូឌីត ប្រចាំក្រុងសាណា គ្រាប់រ៉ុក្កែតមួយគ្រាប់ធ្លាក់ក្បែរស្ថានទូតយើង ហើយឆ្មាំការពារស្ថានទូតយើងម្នាក់រងរបួសធ្ងន់ ។ ប៉ុន្មានម៉ោងទៀតយើងនឹងជម្រាបរឿងលម្អិតពីការវាយប្រហារនេះដល់ក្រុមប្រឹក្សាសន្តិសុខ អ.ស.ប ។
យោងតាមក្រុងតេហេរ៉ង់ថា ការវាយប្រហារនេះជាអំពើគិតទុកមុនរបស់អារ៉ាប៊ី សាអ៊ូឌីត ។ ទោះបីយ៉ាងណា ក្នុងសេចក្តីប្រកាសមួយចេញផ្សាយដោយទីភ្នាក់ងារព័ត៌មានផ្លូវការអារ៉ាប៊ី សាអ៊ូឌីត SPA ក្រុមចម្រុះអារ៉ាប់ នាំមុខដោយក្រុងរីយ៉ាដអះអាងថា ពុំបានធ្វើប្រតិបត្តិការណាមួយ លើបរិវេណស្ថានទូតអីុរ៉ង់ និងតំបន់ជុំវិញស្ថានទូតនេះឡើយ ៕
ចែករំលែកព័តមាននេះ