រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ កាលពីល្ងាចថ្ងៃទី២០ ធ្នូ បានធ្វើការចោទប្រកាន់ជនជាតចិនចំនួន៨នាក់ ក្រោមបទឃុំឃាំង និងបង្ខាំងមនុស្ស រួមមានអ្នកសមគំនិតដោយខុសច្បាប់មានស្ថានទម្ងន់ទោស និងបានបញ្ជួនទៅចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
ជនជាតិចិនទាំង៨នាក់នេះ ក្នុងនោះមាន៦នាក់ ត្រូវបានសមត្ថកិច្ចកងរាជអាវុធហត្ថរាជធានីភ្នំពេញ ចាប់ឃាត់ខ្លួនជាបន្តបន្ទាប់កាលពីយប់ថ្ងៃទី១៤.១៥.១៦ ធ្នូ ២០១៥ នៅខណ្ឌមានជ័យ និងខណ្ឌទួលគោក ចំណែក២នាក់កំពុងរត់គេចខ្លួន ។
ជនជាតិចិនទាំង៨នាក់នេះ មាន ១.ឈ្មោះ សៀវ ហ្វី ភេទប្រុស អាយុ៣៥ឆ្នាំ ២.ឈ្មោះ ស៊ី អូថុង ភេទប្រុស អាយុ៤៦ឆ្នាំ ៣.ឈ្មោះ លី ស៊ីហួរ ភេទប្រុស អាយុ៥៩ឆ្នាំ ៤.ឈ្មោះ ស៊ី ឈីង ភេទប្រុស អាយុ៤១ឆ្នាំ ៥.ឈ្មោះ វ៉ា ជី ភេទប្រុស អាយុ៣៥ឆ្នាំ ៦.ឈ្មោះ ចាំង សុងឈីង ភេទប្រុស អាយុ៣៥ឆ្នាំ (ទាំង៦នាក់នេះត្រូវបានសមត្ថកិច្ចកងរាជអាវុធហត្ថរាជធានី ចាប់បញ្ជួនទៅទៅសាលាដំបូង) ៧.ឈ្មោះ លីវ សាមិន និង៨.ឈ្មោះ ជូ ពីឡុង (ទាំង២នាក់នេះកំពង់រត់គេចខ្លួន) ។
គួរបញ្ជាក់ថា តាមរបាយការណ៍របស់សមត្ថកិច្ចកងរាជអាវុធហត្ថ ជនត្រូវចោទទាំង៨នាក់ខាងលើនេះ បានប្រព្រឹត្តបទល្មើសចាប់ឃុំឃាំង និងបង្ខាំងមនុស្សនៅចំណុចផ្ទះជួលលេខ៤២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីថ្ងៃទី១០ សីហា ២០១៥ និងនៅផ្ទះលេខ១២EH ផ្លូវលេខ១៧៣ សង្កាត់ទួលស្វាយព្រៃទី១ ខណ្ឌចំការមន នៅថ្ងៃទី១១ ធ្នូ ២០១៥ ដែលបទល្មើសននេះមានចែងបញ្ញត្តិឲ្យផ្តន្ទាទោសតាមមាត្រា២៥៤ នៃក្រមព្រហ្មទណ្ឌ ។
ការឃាត់ខ្លួនជនជាតិចិនទាំង៦នាក់នេះ កងរាជអាវុធហត្ថបានធ្វើឡើងតាមពាក្យបណ្តឹងរបស់ជនរងគ្រោះជាជនជាតិចិនដូចគ្នា ដែលបានរត់គេចផុតពីការចាប់ឃុំឃាំង និងបង្ខាំងទុកក្នុងបំណងគំរាម និងជំរិតទារប្រាក់ ។ កិច្ចប្រតិបត្តិការនោះក៏មានការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញផងដែរ ។
ក្រោយពីឃាត់ខ្លួន សមត្ថកិច្ចបានកសាងសំណុំរឿងបញ្ជួនជនសង្ស័យទាំង៦នាក់នេះ ទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ហើយក៏បានស្មើសុំដីកាស្វែងរកតាមចាប់ខ្លួនបក្សពួក២នាក់ទៀតដែលកំពុងរត់គេចខ្លួននោះ ៕
ចែករំលែកព័តមាននេះ