ខេត្តប៉ៃលិន ៖ ប្រជាពលរដ្ឋបាននាំគ្នារអ៊ូរទាំ និងរិះគន់យ៉ាងខ្លាំងថា មិនគួរអាជ្ញាធរមូលដ្ឋាន និងមន្ទីរពាក់ព័ន្ធបណ្តែតបណ្តោយចំពោះបញ្ហាសំរាមដែលគេយកទៅចាក់ចោលយ៉ាងអនាធិបតេយ្យ នៅចំណុចខាងត្បូងផ្លូវជាតិលេខ១០ចាស់ ចំងាយពីផ្លូវជាតិលេខ៥៧ប្រហែល១៥០ម៉ែត្រ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ជារៀងរាល់យប់ថ្ងៃឡើងធុំក្លិនស្អុយ ធ្វើឲ្យប៉ះពាល់ដល់សុខភាពផ្លូវដង្ហើម និងអាចបង្កទៅជាជម្ងឺដល់ប្រជាពលរដ្ឋបែបនេះទាល់តែសោះ ។
ជាក់ស្តែង កាលពីព្រឹកថ្ងៃទី១៧ ខែធ្នូ ឆ្នាំ២០១៥នេះ គេឃើញមានគំនរសំរាមដែលមានធុំក្លិនស្អុយបង្កឡើងដោយសំបកដូង សំបកផ្លែឈើ សំបកពងមាន់ ពងទា ក្បាលនិងស្រកាត្រី និងកាកសំណល់ផ្ទះបាយជាច្រើន ស្ថិតនៅរាយប៉ាយពាសពេញចិញ្ចើមផ្លូវ មានទាំងសត្វឆ្កែជាច្រើនក្បាលឈរចាំហែកស៊ីថែមទៀតផងដែរ ។
ស្ត្រីមួយចំនួនដែលមានផ្ទះនៅក្បែរគំនរសំរាម សុំមិនបញ្ចេញឈ្មោះ បានលើកឡើងថា ពួកគាត់រាល់ថ្ងៃពិតជាមានការលំបាករស់នៅខ្លាំងណាស់ ខណៈគំនរសំរាមស្អុយរលួយជះក្លិនអសោច ត្រូវបានប្រជាពលរដ្ឋរស់នៅភូមិផ្សារព្រំមួយចំនួនឌុបតាមម៉ូតូ និងរ៉ឺម៉កម៉ូតូយកទៅបោះចោលនៅពេលយប់ស្ងាត់ ហើយពួកគាត់ក៏មិនហ៊ានប្តឹងទៅខាងអាជ្ញាធរមូលដ្ឋាន ឬសមត្ថកិច្ចដែរ ក្រែងគេស្អប់ធ្វើបាបនៅពេលដេកលក់យប់ព្រលប់ ។ ពួកគាត់បន្តទៀតថា បើស្ងប់ខ្យល់មិនសូវមានក្លិនស្អុយប៉ុន្មានទេ តែខណៈពេលយប់ និងមានខ្យល់បក់មកពីទិសខាងលិច បណ្តាលឱ្យពួកគាត់ម្នាក់ៗអង្គុយ ឬដេកហិតក្លិនទាំងនេះស្ទើរតែដាច់ខ្យល់ស្លាប់ម្តងៗទៅហើយ ។
ប្រជាពលរដ្ឋដែលរស់នៅក្បែរគំនរសំរាមមួយកន្លែងនោះបានសំណូមពរឲ្យអាជ្ញាធរមូលដ្ឋាន ក៏ដូចជាមន្ទីរបរិស្ថានខេត្ត មេត្តាយកចិត្តទុកដាក់ចុះទៅត្រួតពិនិត្យបញ្ហាសំរាមដែលប្រជាពលរដ្ឋយកទៅបោះចោលនៅលើចិញ្ចើមផ្លូវនេះផង ព្រោះពួកគាត់លំបាករស់នៅខ្លាំងណាស់ ។
ពាក់ព័ន្ធទៅនឹងបញ្ហានេះ លោក មាស សាវ៉ាត មេភូមិផ្សារព្រំ បានឱ្យដឹងថា គំនរសំរាមទាំងនេះត្រូវបានប្រជាពលរដ្ឋមួយចំនួនរស់នៅភូមិផ្សារព្រំដែលមិនបានបង់ខែឱ្យរថយន្តដឹកសម្រាម យកទៅបោះចោលនៅលើចិញ្ចើមផ្លូវខាងលើ ជាពិសេសអ្នករស់នៅត្រង់ចំណុចសំបុកចាបមួយចំនួននាំគ្នាយកទៅបោះចោលនៅពេលយប់ ។ លោកបន្តទៀតថា ខាងភូមិបានរាយការណ៍ជូនទៅមេប៉ុស្តិ៍ឃុំស្ទឹងកាច់ឱ្យចាត់វិធានការជាច្រើនលើកច្រើនសារដែរ តែគ្មាននរណាម្នាក់អើពើចំពោះបញ្ហានេះឡើយ ។ សូម្បីតែខាងមន្ទីរបរិស្ថានខេត្តក៏លោកបានដាក់សំណើស្ទើររាប់ភ្លេចដែរ តែរហូតដល់ទ្រាំមិនបានក៏ឱ្យគ្រឿងចក្រអេស្កាវ៉ាទ័រឈូសទម្លាក់ទៅខាងក្រោមផ្លូវ ដើម្បីឱ្យស្រឡះល្អ លុះក្រោយមកស្រាប់តែពួកគេបន្តយកទៅចោលកន្លែងស្រឡះនោះដដែល ។
ចំណែកលោក គឹម សុខា ប្រធានមន្ទីរបរិស្ថានខេត្តប៉ៃលិន បានឲ្យដឹងតាមទូរស័ព្ទកាលពីវេលាម៉ោង១ និង៣០នាទីរសៀល ថ្ងៃទី១៧ ខែធ្នូ ឆ្នាំ២០១៥នេះថា ខាងលោកអត់ទាន់បានទទួលដំណឹងណាមួយពីខាងភូមិផ្សារព្រំឡើយ ហើយពេលនេះខាងលោកកំពុងជាប់រវល់ប្រជុំនៅខេត្តសៀមរាប ចាំចាត់ឱ្យមន្ត្រីក្រោមឱវាទចុះទៅត្រួតពិនិត្យមើល ៕
ចែករំលែកព័តមាននេះ