រាជធានីភ្នំពេញ ៖ ក្រុមអ្នកចាប់ម៉ូយនៅក្នុងហាងខារ៉ាអូខេ២កន្លែង ដែលមានទីតាំងស្ថិតនៅជាប់គ្នាមានជម្លោះដោយពាក្យសម្ដីហើយដោយមានការគាំទ្រពីសំណាក់ថៅកែ និងមេការរៀងៗខ្លួននោះ រហូតឈានដល់ការវាយតប់គ្នាយ៉ាងអនាធិបតេយ្យបង្កឱ្យភ្ញាក់ដល់ប្រជាពលរដ្ឋទាំងរំលងអធ្រាត្រ ដែលបណ្ដាលឱ្យមានអ្នករងរបួសបែកក្បាលម្នាក់ផងដែរ ។
ហេតុការណ៍នេះ កើតឡើងកាលពីវេលាម៉ោង១២ និង២៥នាទីយប់រំលងអធ្រាត្រឈានចូលថ្ងៃទី១៦ ធ្នូ ២០១៥ ស្ថិតនៅចំណុចហាងខារ៉ាអូរខេ «សប្បាយរាត្រី និងស្កាយស្តារ» ដែលមានទីតាំងស្ថិតនៅតាមបណ្ដោយផ្លូវលេខ២០០៤ ក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
ប្រភពបានឱ្យដឹងថា មុនពេលកើតហេតុ មានភ្ញៀវទៅរកកន្លែងច្រៀងខារ៉ាអូរខេ ខណៈនោះក្រុមអ្នកចាប់ម៉ូយប្រចាំនៅហាងទាំង២នោះបានដណ្ដើមគ្នាហៅម៉ូយឱ្យចូលទៅក្នុងហាងរៀងៗខ្លួន ដែលការចាប់ម៉ូយនោះ មានភាពអនាធិបតេយ្យពេញដងផ្លូវ និងស្រែកឡូឡាក្នុងស្ថានភាពរញ៉េរញ៉ៃបំផុត ។
ពេលនោះទំនាស់ពាក្យសម្ដីបានកើតឡើងយ៉ាងស្រួចស្រាល់ ហើយភាគីម្ខាងៗដោយមានការគាំទ្រពីសំណាក់ថៅកែ និងមេការហាងរៀងៗខ្លួន ក៏បានឈានដល់ការវាយតប់គ្នាមួយប្រាវ បង្កឱ្យមានការភ្ញាក់ផ្អើល និងភ័យខ្លាចដល់ប្រជាពលរដ្ឋដែលរស់នៅក្បែរនោះ និងបានបណ្ដាលឱ្យបុរសម្នាក់ ដែលជាអ្នកហៅម៉ូយប្រចាំនៅក្នុងហាងស្កាយស្តាររងរបួសក្បាល ដោយសារខាងហាងខារ៉ាអូខេ «សប្បាយរាត្រី» វាយនឹងឈើជ្រុង ហើយកម្លាំងសមត្ថកិច្ចប៉ូលិស និងប៉េអឹមខណ្ឌពោធិ៍សែនជ័យ បានចុះទៅអន្តរាគមន៍ទាំងយប់ភ្លាមៗដែរ។
ចែករំលែកព័តមាននេះ