រាជធានីភ្នំពេញ ៖ នារីជនជាតិអ៊ុយក្រែនម្នាក់ចេញពីឡានក្រុងជិះម៉ូតូកង់បីបម្រុងនឹងមកជួលផ្ទះសំណាក់ដើម្បីស្នាក់នៅ ខណៈមកដល់ចំណុចកើតហេតុស្រាប់តែលេចមុខជនសង្ស័យចំនួនពីរនាក់ជិះម៉ូតូពីរគ្រឿងមកឆក់យកកាបូបពីជនរងគ្រោះដែលទុកនៅខាងក្រោមកៅអី ។
ហេតុការណ៍នេះបានកើតឡើងកាលពីវេលាម៉ោង១០ និង៣០នាទីយប់ ថ្ងៃទី១៥ ធ្នូ ២០១៥ នៅចំណុចមុខផ្ទះសំណាក់យីហោពេជ្រ តាមបណ្តោយផ្លូវលេខ១៤៤ កែងផ្លូវលេខ១៩ ក្នុងសង្កាត់ផ្សារកណ្ដាលទី២ ខណ្ឌដូនពេញ។
តាមប្រភពព័ត៌មានពីជនរងគ្រោះបាននិយាយប្រាប់ឲ្យដឹងថា មុនពេលកើតហេតុ រូបនាងបានចុះពីរថយន្តក្រុងជិះរ៉ឺម៉កម៉ូតូមកស្នាក់នៅផ្ទះសំណាក់ក្នុងគោលបំណងមកធ្វើវីហ្សាកាត ខណៈពេលដែលម្ចាស់រ៉ឺម៉កម៉ូតូឌុបរូបនាងមកដល់មុខផ្ទះសំណាក់ស្រាប់តែលេចមុខជនសង្ស័យចំនួនពីរនាក់ជិះម៉ូតូពីរគ្រឿង ម៉ាកហុងដា សេ125 មួយគ្រឿង និងមួយទៀតម៉ាកSuzuki Let’s ពណ៌ខ្មៅ មិនចាំស្លាកជិះទិសដៅពីត្បូងទៅជើងមកឆក់យកកាបូបដែលនៅខាងក្រោមជើង ក្នុងនោះមានលុយដុល្លារចំនួន១.០០០ដុល្លារ ទូរសព្ទដៃHTC មួយគ្រឿង និងសំភារប្រើប្រាស់មួយចំនួនទៀតជនរងគ្រោះមានឈ្មោះ វីរុននីកា អាយុ២៤ឆ្នាំ រស់នៅក្នុងប្រទេសរុស្ស៊ី។
ក្រោយពេលកើតហេតុជនរងគ្រោះត្រូវបានអ្នករត់ម៉ូតូរ៉ឺម៉កដឹកយកមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលផ្សារកណ្ដាលទី២ រង់ចាំពេលព្រឹកធ្វើដំណើរទៅស្ថានទូតដើម្បីជួយសង្គ្រោះ និងបញ្ជូនទៅប្រទេសនាងវិញ ៕
ចែករំលែកព័តមាននេះ